ಪಂಚಭೂತೇಂದ್ರಿಯಂಗಳ ವಂಚನೆಯನತಿಗಳೆದ
ನಿರ್ವಂಚಕನ ನೋಡಾ.
ತನುವ್ಯಸನ, ಮನವ್ಯಸನ, ಧನವ್ಯಸನ, ರಾಜ್ಯವ್ಯಸನ,
ವಿಶ್ವಾವ್ಯಸನ, ಉತ್ಸಾಹವ್ಯಸನ, ಸೇವಕಾವ್ಯಸನವೆಂಬ
ಸಪ್ತವ್ಯಸನಂಗಳ ಸಂಹಾರವ ಮಾಡಿದ ನಿರ್ವ್ಯಸನಿಯ ನೋಡಾ.
ಷಡೂರ್ಮಿ ಷಡುವರ್ಗಂಗಳ ಹೊಡೆದಪ್ಪಳಿಸಿ
ದಶವಾಯುಗಳ ಗಮನಾಗಮನದ ಶಿರವನರಿದ
ಶಿವಜ್ಞಾನ ಸಂಪನ್ನನ ನೋಡಾ.
ಅಷ್ಟತನುಮೂರ್ತಿಗಳ ಒಳಹೊರಗೆ ತೊಳಗಿ ಬೆಳಗುವ
ಸ್ವಯಂಜ್ಯೋತಿ ತಾನಾಗಿ
ಅಷ್ಟತನುಮೂರ್ತಿಯ ಮದಂಗಳ ಸುಟ್ಟುರುಹಿ
ಒತ್ತಿ ಒರಸಿದ ಉಪಮಾತೀತನ ನೋಡಾ.
ಸರ್ವವಿಕಾರಂಗಳ ಗರ್ವಪರ್ವತವ ಮುರಿದು
ನಿರ್ವಿಕಾರಿಯಾದ ನಿಶ್ಚಲ ವಿರಕ್ತನ ನೋಡಾ.
ಒಳ ಹೊರಗೆಂಬ ಕುಳವಳಿದ ನಿಃಕಳಂಕ ನಿರಾಕುಳನ ನೋಡಾ.
ಅರುಹು ಮರಹಳಿದು, ನಿರ್ದೇಹಿಯಾಗಿ
ನಿರ್ಮಲಾತ್ಮಕನಾಗಿ ಲಿಂಗವನಪ್ಪಿ ಅಗಲದಿಪ್ಪ ಮಹಾತ್ಮ ಶರಣರಿಂಗೆ
ನಮೋ ನಮೋಯೆಂದು ಬದುಕಿದೆನಯ್ಯ,
ಮಹಾಲಿಂಗಗುರು ಶಿವಸಿದ್ಧೇಶ್ವರ ಪ್ರಭುವೇ.
Transliteration Pan̄cabhūtēndriyaṅgaḷa van̄caneyanatigaḷeda
nirvan̄cakana nōḍā.
Tanuvyasana, manavyasana, dhanavyasana, rājyavyasana,
viśvāvyasana, utsāhavyasana, sēvakāvyasanavemba
saptavyasanaṅgaḷa sanhārava māḍida nirvyasaniya nōḍā.
Ṣaḍūrmi ṣaḍuvargaṅgaḷa hoḍedappaḷisi
daśavāyugaḷa gamanāgamanada śiravanarida
śivajñāna sampannana nōḍā.
Aṣṭatanumūrtigaḷa oḷahorage toḷagi beḷaguva
Svayan̄jyōti tānāgi
aṣṭatanumūrtiya madaṅgaḷa suṭṭuruhi
otti orasida upamātītana nōḍā.
Sarvavikāraṅgaḷa garvaparvatava muridu
nirvikāriyāda niścala viraktana nōḍā.
Oḷa horagemba kuḷavaḷida niḥkaḷaṅka nirākuḷana nōḍā.
Aruhu marahaḷidu, nirdēhiyāgi
nirmalātmakanāgi liṅgavanappi agaladippa mahātma śaraṇariṅge
namō namōyendu badukidenayya,
mahāliṅgaguru śivasid'dhēśvara prabhuvē.
