ಗೃಹಸ್ಥಧರ್ಮದ ಗುರುವಿನ ದೀಕ್ಷಾಚಾರ್ಯನ ಭೇದ
ಪಿಂಡೋತ್ಪತ್ಯ ಜಾತಿ ಗೋತ್ರ ಛಾಂದಸ ಭೇದ
ಸಲಕ್ಷಣ ನೀತಿ ಭಕ್ತಿ ಸಂಪೂರ್ಣ ಕಳೆಯನರಿತು
ಕುಚಿತ್ತ ಕುಹಕ ಕ್ಷುದ್ರ ಪಿಸುಣತ್ವ ಅಸಿಘಾತಕ ಪಾರದ್ವಾರ
ಇಂತಿವು ಮುಂತಾದವೆಲ್ಲವ ಸಂತೈಸಿ ಸೋದಿಸಿ
ಹದಿನೆಂಟನೆಯ ದೋಷಂಗಳ ವಿಭಾಗಿಸಿ ತೋರಿ
ಪಾಪದ ಹೆಚ್ಚುಗೆಯ ಪುಣ್ಯದ ಸನ್ನದ್ಧವಂ ತೋರಿ
ಹದಿನೆಂಟು ಸೂತ್ರವಂ ಪ್ರಕರಣಮಂ ಮಾಡಿ
ಜಾನು ಜಂಘೆ ಕಟಿ ನಾಭಿ ಹೃದಯಮಧ್ಯ
ಕಂಠ ಕರ್ಣ ಜಿಹ್ವೆ ನಾಸಿಕ ನಯನ
ಕಪಾಲ ಕರ ಮುಂತಾಗಿ ಪೂರ್ವಾಶ್ರಯಂಗಳಂ ಬಿಡಿಸಿ
ಮಾಂಸಪಿಂಡವ ಕಳೆದು ಮಂತ್ರಪಿಂಡವ ಮಾಡುವಲ್ಲಿ
ಸ್ಥೂಲದ ವ್ಯವಹರಣೆ ಸೂಕ್ಷ್ಮದ ಪ್ರಕೃತಿ
ಕಾರಣದ ಪ್ರಮೇಯವಂ ಕಾಣಿಸಿಕೊಂಡು
ರಸ ಗಂಧ ರೂಪು ಶಬ್ದ ಸ್ಪರ್ಶ
ಪಂಚೇಂದ್ರಿಯಂಗಳಲ್ಲಿ ಸಂಶಯಮಂ ಪರಿಹರಿಸಿ
ಮನ ವಚನ ಕಾಯ ತ್ರಿಕರಣವಂ ಶುದ್ಧಾತ್ಮವಂ ಮಾಡಿ
ಈಶ್ವರಧ್ಯಾನದಿಂದ ಕರಕಮಲವಂ
ಕಪಾಲದ ಮೇಲೆ ಮೂರ್ತಿಗೊಳಿಸಿ
ಧ್ಯಾನ ಪ್ರಯೋಗಮಂ ಕಲ್ಪಿಸಿ ಜ್ಞಾನಪ್ರಯೋಗಮಂ ವೇಧಿಸಿ
ಮೇಲೆ ಪ್ರಾಣಲಿಂಗ ಪ್ರತಿಷ್ಠೆಯ ಮಾಡುವಲ್ಲಿ
ಅಂಗಕ್ಕೆ ಆಚಾರ ಆತ್ಮಂಗೆ ಅರಿವು ಈ ಗುಣ ಸಂಭವಿಸಿದ ಮೇಲೆ
ಹಸ್ತಮಸ್ತಕದ ಸಂಯೋಗವ
ಇಷ್ಟತನುವಿಂಗೆ ಇಷ್ಟಲಿಂಗವ ಸಂಬಂಧಿಸಬೇಕು.
ಇದು ಚತುರ್ವಿಧಮತದ ಆಚಾರ್ಯನಂಗ, ಗುರುಸ್ಥಲದ ಭಿತ್ತಿ
ಚನ್ನಬಸವಣ್ಣಪ್ರಿಯ ಭೋಗಮಲ್ಲಿಕಾರ್ಜುನಲಿಂಗದಲ್ಲಿ
ಗುರುದೀಕ್ಷಾಸೂತ್ರ.
Transliteration Gr̥hasthadharmada guruvina dīkṣācāryana bhēda
piṇḍōtpatya jāti gōtra chāndasa bhēda
salakṣaṇa nīti bhakti sampūrṇa kaḷeyanaritu
kucitta kuhaka kṣudra pisuṇatva asighātaka pāradvāra
intivu muntādavellava santaisi sōdisi
hadineṇṭaneya dōṣaṅgaḷa vibhāgisi tōri
pāpada heccugeya puṇyada sannad'dhavaṁ tōri
hadineṇṭu sūtravaṁ prakaraṇamaṁ māḍi
jānu jaṅghe kaṭi nābhi hr̥dayamadhya
Kaṇṭha karṇa jihve nāsika nayana
kapāla kara muntāgi pūrvāśrayaṅgaḷaṁ biḍisi
mānsapiṇḍava kaḷedu mantrapiṇḍava māḍuvalli
sthūlada vyavaharaṇe sūkṣmada prakr̥ti
kāraṇada pramēyavaṁ kāṇisikoṇḍu
rasa gandha rūpu śabda sparśa
pan̄cēndriyaṅgaḷalli sanśayamaṁ pariharisi
mana vacana kāya trikaraṇavaṁ śud'dhātmavaṁ māḍi
īśvaradhyānadinda karakamalavaṁ
Kapālada mēle mūrtigoḷisi
dhyāna prayōgamaṁ kalpisi jñānaprayōgamaṁ vēdhisi
mēle prāṇaliṅga pratiṣṭheya māḍuvalli
aṅgakke ācāra ātmaṅge arivu ī guṇa sambhavisida mēle
hastamastakada sanyōgava
iṣṭatanuviṅge iṣṭaliṅgava sambandhisabēku.
Idu caturvidhamatada ācāryanaṅga, gurusthalada bhitti
cannabasavaṇṇapriya bhōgamallikārjunaliṅgadalli
gurudīkṣāsūtra.
