ಅಯ್ಯಾ, ಎನ್ನ ಜೀವ ಮನ ಪ್ರಾಣಂಗಳಿಂದ,
ಸಮಸ್ತ ಯುಗಾಂತರದಲ್ಲಿ ಬರಬಾರದ
ಯೋನಿಯಲ್ಲಿ ಬಂದೆನಯ್ಯ,
ಉಣ್ಣಬಾರದ ಆಹಾರಂಗಳನುಂಡೆನಯ್ಯ,
ಮಾಡಬಾರದ ವ್ಯವಹಾರಂಗಳ
ಮಾಡಿದೆನಯ್ಯ.
ನೂರೊಂದುಕುಲ ಮೊದಲಾದ ಸಮಸ್ತಜಾತಿಯ
ಸ್ತ್ರೀಯರ ಭೋಗಿಸಿದೆನಯ್ಯ.
ನುಡಿಯಬಾರದಪವಾದವ ನುಡಿದೆನಯ್ಯ,
ನಡೆಯಬಾರದನಾಚಾರದಲ್ಲಿ ನಡೆದೆನಯ್ಯ,
ತಿರುಗಬಾರದ ದೇಶವ ತಿರುಗಿದೆನಯ್ಯ.
ಹುಸಿಯನೆ ಮನೆಗಟ್ಟಿದೆನಯ್ಯ;
ಹುಸಿಯನೆ ಹಾಸಿ ಹೊದ್ದೆನಯ್ಯ.
ಹುಸಿಯನೆ ಆಭರಣವ ಮಾಡಿ
ಸರ್ವಾಂಗಕ್ಕೆ ಆಚ್ಫಾದಿಸಿಕೊಂಡೆನಯ್ಯ,
ಇನ್ನೆನಗೆ ಗತಿಮೋಕ್ಷವುಂಟೆ?
ಎಲೆದೇವ, ನಿನ್ನೊಲುಮೆಯಿಂದ ಏನಾದಡಾಗಲಿ.
ಎನ್ನಲ್ಲಿ ನೋಡಿದಡೆ ಅಣುಮಾತ್ರ ಸುಗುಣವಿಲ್ಲವಯ್ಯ,
ನಿಷ್ಪ್ರಪಂಚ ನಿರಾತಂಕಮೂರ್ತಿ ಶ್ರೀಗುರುಲಿಂಗಜಂಗಮವೆ
ಹರಹರ ಶಿವಶಿವ ಜಯಜಯ ಕರುಣಾಕರ
ಮತ್ಪ್ರಾಣನಾಥ ಮಹಾಶ್ರೀಗುರುಸಿದ್ಧಲಿಂಗೇಶ್ವರ.
Transliteration Ayyā, enna jīva mana prāṇaṅgaḷinda,
samasta yugāntaradalli barabārada
yōniyalli bandenayya,
uṇṇabārada āhāraṅgaḷanuṇḍenayya,
māḍabārada vyavahāraṅgaḷa
māḍidenayya.
Nūrondukula modalāda samastajātiya
strīyara bhōgisidenayya. Nuḍiyabāradapavādava nuḍidenayya,
naḍeyabāradanācāradalli naḍedenayya,
tirugabārada dēśava tirugidenayya.
Husiyane manegaṭṭidenayya;
husiyane hāsi hoddenayya.
Husiyane ābharaṇava māḍi
sarvāṅgakke ācphādisikoṇḍenayya,
Innenage gatimōkṣavuṇṭe?
Eledēva, ninnolumeyinda ēnādaḍāgali.
Ennalli nōḍidaḍe aṇumātra suguṇavillavayya,
niṣprapan̄ca nirātaṅkamūrti śrīguruliṅgajaṅgamave
harahara śivaśiva jayajaya karuṇākara
matprāṇanātha mahāśrīgurusid'dhaliṅgēśvara.
