ಎಲೆ ಮನವೆ ಕೇಳಾ,
ಶಿವನು ನಿನಗೆ ಅನಂತಾನಂತಯುಗದಲ್ಲಿ
ಶಿವಾನುಭಾವಸ್ಥಿತಿಯ ಕಳುಹಿತ್ತ,
ಲೋಕಕ್ಕೆರಡು ಸ್ಥಿತಿಯಲ್ಲಿ ಜನ್ಮಾದಿ ಕಟ್ಟಣೆಯ ಹರಿಯೆಂದು.
ಆ ಪ್ರಭಾಮೂರ್ತಿಯಾಗಿ ಗುರುವೆಂಬ ನಾಮವಂ ಧರಿಸಿ,
ಮಹಾಲಿಂಗೈಕ್ಯವನು, ಮಹಾಲಿಂಗ ಯೋಗಪ್ರಭಾವವನು,
ಅಷ್ಟಾಷಷ್ಟಿತೀರ್ಥಂಗಳನು,
ಶಿವನು ಅನಂತಪ್ರಾಣಿಗಳಿಗೆ ಸಾಧನವೆಂದು ಮಾಡಿದನು.
ಮಂದರಗಿರಿ ರಜತಗಿರಿ ಮೇರುಗಿರಿ ಹಿಮಗಿರಿ
ಮೊದಲಾದ ಅಷ್ಟಕುಲಪರ್ವತಂಗಳನು ಸ್ಥಲಂಗೊಳಿಸಿದನು.
ಅನಾದಿಸಂಸಿದ್ಧದಾದಿಲಿಂಗೇಶ್ವರದೇವರ ಸ್ಥಲಂಗೊಳಿಸಿದನು.
ಎಲ್ಲಾ ಯಂತ್ರಕ್ಕೆ ಅಮೃತಕಳೆಯನೀಯಲೆಂದು
ಕಪಿಲಸಿದ್ಧಮಲ್ಲಿಕಾರ್ಜುನದೇವರ ಸ್ಥಲಂಗೊಳಿಸಿದನು.
ಸಿದ್ಧಸಿಂಹಾಸನದ ಮೇಲೆ ನಾಮಕರಣ ರಾಮನಾಥನಾಗಿ
ಗುರು ಮರ್ತ್ಯಕ್ಕೆ ಬಂದ ಕಾಣಾ ಮನವೆ.
ಆಚಾರ ಗೋಚರವಾಗಬೇಕೆಂದು ಆ ನಿರ್ವಯಲೆಂಬ ಸ್ವಾಮಿ
ತಾನೆಯಾಗಿ, ಓಂಕಾರ ಊರ್ಧ್ವರೇತ ಶಿವನಾಗಿ,
ಬೆಳಗನುಟ್ಟು ಬಸವಣ್ಣ ಬಂದ ಕಾಣಾ ಮನವೆ.
ಎಲ್ಲಾ ಪ್ರಾಣಿಗಳಿಗೆ ಜಿಹ್ವೆಗಳನು ಪವಿತ್ರವ ಮಾಡಲೆಂದು
ಶುದ್ಧಸಿದ್ಧಪ್ರಸಿದ್ಧಪ್ರಸಾದವ ತೋರಿಹೆವೆನುತ
ಮಹಾಪ್ರಸಾದಿ ಚೆನ್ನಬಸವಣ್ಣ ಬಂದ ಕಾಣಾ ಮನವೆ.
ಜ್ಞಾನವಾಹನವಾಗಿ ತನುಮನಧನದ ಮೇಲೆ ನಡೆದು,
ಅನಂತಮೂರ್ತಿಗಳ ಪವಿತ್ರವ ಮಾಡಲೆಂದು
ಎಲ್ಲಾ ಸಂಬಂಧವನು ಕರಸ್ಥಲದಲ್ಲಿ ಹಿಡಿದುಕೊಂಡು,
ಜಂಗಮವಾಗಿ ಪ್ರಭುದೇವರು ಬಂದರು ಕಾಣಾ ಮನವೆ.
ಗುರುವೆ ಮಹಾಭಕ್ತನಾಗಿ ಅರ್ಪಿತವ ಮಾಡಿ,
ಪ್ರಸಾದಿಯ ಅನುಭಾವದ ಆಭರಣವೆ ಜಂಗಮವಾಗಿ,
ಇಂತೀ ಚತುರ್ವಿಧಸ್ಥಲಂಗಳು ಎನ್ನ ಪ್ರಾಣನ ಕೊರಳಲ್ಲಿಹವಾಗಿ,
ನಿಮ್ಮ ಅನಿಮಿಷವಾಗಿ ನಾ ನೋಡುತಿರ್ದೆ ಕಾಣಾ, ಕಲಿದೇವಯ್ಯಾ.
Transliteration Ele manave kēḷā,
śivanu ninage anantānantayugadalli
śivānubhāvasthitiya kaḷuhitta,
lōkakkeraḍu sthitiyalli janmādi kaṭṭaṇeya hariyendu.
Ā prabhāmūrtiyāgi guruvemba nāmavaṁ dharisi,
mahāliṅgaikyavanu, mahāliṅga yōgaprabhāvavanu,
aṣṭāṣaṣṭitīrthaṅgaḷanu,
śivanu anantaprāṇigaḷige sādhanavendu māḍidanu.
Mandaragiri rajatagiri mērugiri himagiri
modalāda aṣṭakulaparvataṅgaḷanu sthalaṅgoḷisidanu.
Anādisansid'dhadādiliṅgēśvaradēvara sthalaṅgoḷisidanu.
Ellā yantrakke amr̥takaḷeyanīyalendu
kapilasid'dhamallikārjunadēvara sthalaṅgoḷisidanu.
Sid'dhasinhāsanada mēle nāmakaraṇa rāmanāthanāgi
guru martyakke banda kāṇā manave.
Ācāra gōcaravāgabēkendu ā nirvayalemba svāmi
tāneyāgi, ōṅkāra ūrdhvarēta śivanāgi,
beḷaganuṭṭu basavaṇṇa banda kāṇā manave.
Ellā prāṇigaḷige jihvegaḷanu pavitrava māḍalendu
śud'dhasid'dhaprasid'dhaprasādava tōrihevenuta
Mahāprasādi cennabasavaṇṇa banda kāṇā manave.
Jñānavāhanavāgi tanumanadhanada mēle naḍedu,
anantamūrtigaḷa pavitrava māḍalendu
ellā sambandhavanu karasthaladalli hiḍidukoṇḍu,
jaṅgamavāgi prabhudēvaru bandaru kāṇā manave.
Guruve mahābhaktanāgi arpitava māḍi,
prasādiya anubhāvada ābharaṇave jaṅgamavāgi,
intī caturvidhasthalaṅgaḷu enna prāṇana koraḷallihavāgi,
nim'ma animiṣavāgi nā nōḍutirde kāṇā, kalidēvayyā.
