ದೇವರು ಮುಂತಾಗಿ ನಡೆ, ದೇವರು ಮುಂತಾಗಿ ನುಡಿ.
ದೇವರು ಮುಂತಾಗಿ ಅನುಭಾವಿಸಬಲ್ಲಡೆ,
ದೇವ ಬ್ರಾಹ್ಮಣರೆನಿಸಿಕೊಂಡಡೆ ದೇವರು ಮೆಚ್ಚುವನು.
ದೇವ ದಾನವ ಮಾನವ ದೇವನ ಸುದ್ದಿಯನರಿಯದೆ,
ವಾದಿತನಕ್ಕೆ ಹೋರಿಹೋರಿ ನಾಯಸಾವ ಸತ್ತರು.
ಗುರುಲಿಂಗ ಮುಂತಾಗಿ ನಡೆ, ಗುರುಲಿಂಗ ಮುಂತಾಗಿ ನುಡಿ.
ಗುರುಲಿಂಗ ಮುಂತಾಗಿ ಅನುಭಾವಿಸಬಲ್ಲಡೆ
ಗುರುವೆನಿಸಿಕೊಳಬೇಕು.
ಗುರುಲಿಂಗವ ಹಿಂದು ಮಾಡಿ, ತಾ ಮುಂದಾಗಿ,
ಗುರುದೇವನೆನಿಸಿಕೊಂಡಡೆ ಗುರು ತಾ ಮೆಚ್ಚುವನೆ ?
ಗುರುಲಿಂಗಜಂಗಮದ ಪರಿಯವನರಿಯದೆ,
ಸುರೆಯ ದೈವದ ಎಂಜಲ ಭುಂಜಿಸುವವರು,
ತಾವು ಗುರುತನಕ್ಕೆ ಹೋರಿಹೋರಿ ನರಕದಲ್ಲಿ ಬಿದ್ದರು.
ಭಕ್ತಿ ಮುಂತಾಗಿ ನಡೆ, ಭಕ್ತಿ ಮುಂತಾಗಿ ನುಡಿ.
ಭಕ್ತಿ ಮುಂತಾಗಿ ನುಡಿಯ ಅನುಭಾವಿಸಬಲ್ಲಡೆ
ಬಣಜಿಗನು ತಾ ಭಕ್ತನೆ?
ಭಕ್ತಿಯಿಲ್ಲದ ವ್ಯರ್ಥಜೀವಿಗಳು
ಭಕ್ತನ ಸರಿಯೆನಿಸಿಕೊಂಡಡೆ ಶಿವ ಮೆಚ್ಚುವನೆ?
ಸತ್ಯಸದಾಚಾರದ ಹವನನರಿಯದೆ,
ಮೃತ್ಯು ಮಾರಿಯ ಎಂಜಲ ತಿಂದು,
ಮರ್ತ್ಯದಲ್ಲಿ ಹೋರಿಹೋರಿ ವ್ಯರ್ಥವಾಗಿ ಕೆಟ್ಟರು.
ಶಿವಭಕ್ತನು ಗುರುದೇವ ನಮ್ಮ ಬ್ರಾಹ್ಮಣನು
ಬಸವರಾಜದೇವರ ಸಂತತಿಗಲ್ಲದೆ ಮತ್ತಾರಿಗುಂಟು,
ಕಲಿದೇವರದೇವಾ ?
Transliteration Dēvaru muntāgi naḍe, dēvaru muntāgi nuḍi.
Dēvaru muntāgi anubhāvisaballaḍe,
dēva brāhmaṇarenisikoṇḍaḍe dēvaru meccuvanu.
Dēva dānava mānava dēvana suddiyanariyade,
vāditanakke hōrihōri nāyasāva sattaru.
Guruliṅga muntāgi naḍe, guruliṅga muntāgi nuḍi.
Guruliṅga muntāgi anubhāvisaballaḍe
guruvenisikoḷabēku.
Guruliṅgava hindu māḍi, tā mundāgi,
gurudēvanenisikoṇḍaḍe guru tā meccuvane?
Guruliṅgajaṅgamada pariyavanariyade,
sureya daivada en̄jala bhun̄jisuvavaru,
tāvu gurutanakke hōrihōri narakadalli biddaru.
Bhakti muntāgi naḍe, bhakti muntāgi nuḍi.
Bhakti muntāgi nuḍiya anubhāvisaballaḍe
baṇajiganu tā bhaktane?
Bhaktiyillada vyarthajīvigaḷu
bhaktana sariyenisikoṇḍaḍe śiva meccuvane?
Satyasadācārada havananariyade,
mr̥tyu māriya en̄jala tindu,
martyadalli hōrihōri vyarthavāgi keṭṭaru.
Śivabhaktanu gurudēva nam'ma brāhmaṇanu
basavarājadēvara santatigallade mattāriguṇṭu,
kalidēvaradēvā?
