ಕಾಯಬಂಧನ ಭಾವ, ಭಾವಬಂಧನ ಜ್ಞಾನ,
ಜ್ಞಾನಬಂಧನ ಸಕಲೇಂದ್ರಿಯ.
ಇಂತೀ ಸ್ವರೂಪಂಗಳ ಕಲ್ಪಿಸುವಲ್ಲಿ,
ಕಾಯಕ್ಕೆ ಬಂಧವಲ್ಲದೆ ಜೀವಕ್ಕೆ ಬಂಧವುಂಟೆ ಎಂದೆಂಬರು.
ಭೇರಿಗೆ ಬಂಧವಲ್ಲದೆ ನಾದಕ್ಕೆ ಬಂಧವುಂಟೆ ಎಂಬರು.
ಉಭಯದ ಭೇದವ ತಿಳಿದಲ್ಲಿ, ಕಾಯಕ್ಕೆ ಬಂಧವುಂಟೆ, ಜೀವಕ್ಕಲ್ಲದೆ ?
ಭೇರಿಗೆ ಬಂಧವುಂಟೆ, ನಾದಕ್ಕಲ್ಲದೆ ?
ಇಂತೀ ಅಳಿವುಳಿವ ಎರಡ ವಿಚಾರಿಸುವಲ್ಲಿ,
ಜೀವ ನಾನಾ ಭವಂಗಳಲ್ಲಿ ಬಪ್ಪುದ ಕಂಡು, ಮತ್ತಿನ್ನಾರನೂ ಕೇಳಲೇತಕ್ಕೆ ?
ನಾದ ಸ್ಥೂಲ ಸೂಕ್ಷ್ಮಂಗಳಲ್ಲಿ ಹೊರಳಿ ಮರಳುತ್ತಿಹುದ ಕಂಡು,
ಆರಡಿಗೊಳಲೇಕೆ ? ಇಂತಿವ ಶ್ರುತದಲ್ಲಿ ಕೇಳಿ, ದೃಷ್ಟದಲ್ಲಿ ಕಂಡು,
ಅನುಮಾನದಲ್ಲಿ ಅರಿದ ಮತ್ತೆ,
ಲಿಂಗಕ್ಕೆ ಪ್ರಾಣವೋ, ಪ್ರಾಣಕ್ಕೆ ಲಿಂಗವೋ
ಎಂಬುದ ಪ್ರಮಾಣಿಸಿದಲ್ಲಿ,
ಐಕ್ಯಾನುಭಾವ, ನಿಃಕಳಂಕ ಮಲ್ಲಿಕಾರ್ಜುನಾ.
Transliteration Kāyabandhana bhāva, bhāvabandhana jñāna,
jñānabandhana sakalēndriya.
Intī svarūpaṅgaḷa kalpisuvalli,
kāyakke bandhavallade jīvakke bandhavuṇṭe endembaru.
Bhērige bandhavallade nādakke bandhavuṇṭe embaru.
Ubhayada bhēdava tiḷidalli, kāyakke bandhavuṇṭe, jīvakkallade?
Bhērige bandhavuṇṭe, nādakkallade?
Intī aḷivuḷiva eraḍa vicārisuvalli,
Jīva nānā bhavaṅgaḷalli bappuda kaṇḍu, mattinnāranū kēḷalētakke?
Nāda sthūla sūkṣmaṅgaḷalli horaḷi maraḷuttihuda kaṇḍu,
āraḍigoḷalēke? Intiva śrutadalli kēḷi, dr̥ṣṭadalli kaṇḍu,
anumānadalli arida matte,
liṅgakke prāṇavō, prāṇakke liṅgavō
embuda pramāṇisidalli,
aikyānubhāva, niḥkaḷaṅka mallikārjunā.
