ಪಾದೋದಕ ಪ್ರಸಾದೋದಕ ಲಿಂಗೋದಕಗಳಲ್ಲಿ,
ಕೊಂಬ ಕೊಡುವ ಇಂಬಿಡುವ ಭೇದವನರಿಯಬೇಕು.
ಪಾದೋದಕವ ಲಿಂಗಕ್ಕೆ ಮಜ್ಜನಕ್ಕೆರೆಯಲಿಲ್ಲ.
ಪ್ರಸಾದೋದಕವ ಸೂಸಲಿಲ್ಲ, ಲಿಂಗೋದಕವ ತನ್ನಂಗಕ್ಕೆ ಕೊಳಲಿಲ್ಲ.
ಅದೆಂತೆಂದಡೆ:
ಪಾದಕ್ಕೂ ಲಿಂಗಕ್ಕೂ ಸಂಬಂಧವಿಲ್ಲವಾಗಿ,
ಆ ಪ್ರಸಾದೋದಕಕ್ಕೂ ಆತ್ಮಕ್ಕೂ ಸಂಬಂಧವಿಲ್ಲವಾಗಿ,
ಆ ಲಿಂಗೋದಕಕ್ಕೂ ಲಿಂಗಕ್ಕೂ ಸಂಬಂಧವಿಲ್ಲವಾಗಿ.
ಇಂತೀ ತ್ರಿವಿಧಂಗಳಲ್ಲಿ ಕೊಡಬಲ್ಲಡೆ, ಕೊಳಬಲ್ಲಡೆ,
ಆದಿ ಆಧಾರವನರಿತು, ಅನಾದಿ ಪೂರ್ವಯುಕ್ತವ ತಿಳಿದು,
ಗುರುವಾರು ಲಿಂಗವಾರು ಜಂಗಮವಾರೆಂಬುದ ತಿಳಿದು,
ಪೂರ್ವ ಉತ್ತರಂಗಳಲ್ಲಿ ನಿಶ್ಚಯಿಸಿ,
ಪಾದೋದಕವಾರಿಗೆ, ಪ್ರಸಾದೋದಕವಾರಿಗೆ ಲಿಂಗೋದಕವಾರಿಗೆಂಬುದನರಿತು,
ಮರಕ್ಕೆ ನೀರನೆರೆದಲ್ಲಿ ಬೇರಿಗೋ, ಮೇಲಣ ಕೊಂಬಿಗೋ ?
ಎಂಬ ಭೇದವ ಕಂಡು,
ಗುರುಲಿಂಗಜಂಗಮ ಮೂರೊಂದೆನಬೇಕು.
ಹೀಗಲ್ಲದೆ ಕಾಬವರ ಕಂಡು ಏಗೆಯ್ದು ಮಾಡಿದಡೆ,
ಅದು ಭವಭಾರಕ್ಕೊಳಗು, ನಿಃಕಳಂಕ ಮಲ್ಲಿಕಾರ್ಜುನಾ.
Transliteration Pādōdaka prasādōdaka liṅgōdakagaḷalli,
komba koḍuva imbiḍuva bhēdavanariyabēku.
Pādōdakava liṅgakke majjanakkereyalilla.
Prasādōdakava sūsalilla, liṅgōdakava tannaṅgakke koḷalilla.
Adentendaḍe:
Pādakkū liṅgakkū sambandhavillavāgi,
ā prasādōdakakkū ātmakkū sambandhavillavāgi,
ā liṅgōdakakkū liṅgakkū sambandhavillavāgi.
Intī trividhaṅgaḷalli koḍaballaḍe, koḷaballaḍe,
Ādi ādhāravanaritu, anādi pūrvayuktava tiḷidu,
guruvāru liṅgavāru jaṅgamavārembuda tiḷidu,
pūrva uttaraṅgaḷalli niścayisi,
pādōdakavārige, prasādōdakavārige liṅgōdakavārigembudanaritu,
marakke nīraneredalli bērigō, mēlaṇa kombigō ?
Emba bhēdava kaṇḍu,
guruliṅgajaṅgama mūrondenabēku.
Hīgallade kābavara kaṇḍu ēgeydu māḍidaḍe,
adu bhavabhārakkoḷagu, niḥkaḷaṅka mallikārjunā.
