ಪೃಥ್ವಿ ಅಪ್ಪು ತೇಜ ವಾಯು ಆಕಾಶವೆಂಬ
ಪಂಚಭೌತಿಕದ ಜಗದುತ್ಪತ್ಯವೆಂಬುದು ಹುಸಿಮಾತು.
ನಾನೆಂಬುದೆ ಐದು, ಆ ಐದರಿಂದ ಒದಗಿದ ಜಗ,
ಲಯವಾದ ಮತ್ತೆ ಜಗವಿಲ್ಲವಾಗಿ.
ತನ್ನ ಗುಣವೆ ಪೃಥ್ವಿ, ತನ್ನ ಗುಣವೆ ಅಪ್ಪು,
ತನ್ನ ಗುಣವೆ ವಾಯು, ತನ್ನ ಗುಣವೆ ಆಕಾಶ,
ತನ್ನಿಂದನ್ಯವಪ್ಪುದೊಂದಿಲ್ಲವಾಗಿ.
ಅದಕ್ಕೆ ದೃಷ್ಟ: ಮರ್ಕಟ ದರ್ಪಣಸ್ಥಾನವೆಂದರಿವುದು.
ಆ ಉಚಿತ ಬೀಜಕ್ಕುಚಿತವಪ್ಪುದೆ ಅದಕ್ಕೆ ದೃಷ್ಟ.
ಪರುಷದ ಗಿರಿಯಲ್ಲಿ ಕಬ್ಬುನದ ಮೊರಡಿಯುಂಟೆ ?
ಕ್ಷೀರ ಜಲಧಿಯಲ್ಲಿ ಕ್ಷಾರಜಲ ಸ್ಥಾಪ್ಯವುಂಟೆ ?
ಕಲ್ಪದ್ರುಮದಗ್ರದಲ್ಲಿ ದತ್ತೂರದ ಫಲವುಂಟೆ ?
ನೆರೆ ಸತ್ಯನಲ್ಲಿ [ಹಾ]ರುವ ಮನದವನುಂಟೆ ?
ಇಂತಿವನರಿದು ನಿಃಶಬ್ದನಾದ ಮಹಾತ್ಮಂಗೆ
ಗುರುವೆಂದರು, ಲಿಂಗವೆಂದರು, ಜಂಗಮವೆಂದರು.
ಸ್ಥಾವರವೊಂದಾದಡೆ, ಶಾಖೆಯ ಲಕ್ಷ್ಯದ ತೆರನಂತೆ.
ಅದಕ್ಕೆ ಪರಿಯಾಯ ಭಕ್ತ ಮಾಹೇಶ್ವರ ಪ್ರಸಾದಿ ಪ್ರಾಣಲಿಂಗಿ ಶರಣೈಕ್ಯ.
ಇಂತೀ ಷಟ್‍ಸ್ಥಲದ ಎಲ್ಲಾ ಬೆಳಗಿನ ಕಳೆಯನೊಳಕೊಂಡಿಪ್ಪ ಮಹಾತ್ಮನಂ
ಶಿವಭೌತಿಕವೆಂದರಿಯದೆ, ಬೀಗವ ತೆಗೆದಲ್ಲಿಯೆ ಕಂಡಿತ್ತು,
[ಆಭ]ರಣದ ಇರವು, ನಿಃಕಳಂಕ ಮಲ್ಲಿಕಾರ್ಜುನಾ.
Transliteration Pr̥thvi appu tēja vāyu ākāśavemba
pan̄cabhautikada jagadutpatyavembudu husimātu.
Nānembude aidu, ā aidarinda odagida jaga,
layavāda matte jagavillavāgi.
Tanna guṇave pr̥thvi, tanna guṇave appu,
tanna guṇave vāyu, tanna guṇave ākāśa,
tannindan'yavappudondillavāgi.
Adakke dr̥ṣṭa: Markaṭa darpaṇasthānavendarivudu.
Ā ucita bījakkucitavappude adakke dr̥ṣṭa.
Paruṣada giriyalli kabbunada moraḍiyuṇṭe?
Kṣīra jaladhiyalli kṣārajala sthāpyavuṇṭe?
Kalpadrumadagradalli dattūrada phalavuṇṭe?
Nere satyanalli [hā]ruva manadavanuṇṭe?
Intivanaridu niḥśabdanāda mahātmaṅge
guruvendaru, liṅgavendaru, jaṅgamavendaru.
Sthāvaravondādaḍe, śākheya lakṣyada teranante.
Adakke pariyāya bhakta māhēśvara prasādi prāṇaliṅgi śaraṇaikya.
Intī ṣaṭsthalada ellā beḷagina kaḷeyanoḷakoṇḍippa mahātmanaṁ
śivabhautikavendariyade, bīgava tegedalliye kaṇḍittu,
[ābha]raṇada iravu, niḥkaḷaṅka mallikārjunā.
