ಆಸ್ತಿ ಜಾಯತೇ ವಿಪರಿಣಮತೇ ವಿವರ್ಧತೇ
ಅಪಕ್ಷೀಯತೇ ವಿನಶ್ಯತಿ ಎಂಬ ಷಡ್ಭಾವ ವಿಕಾರಂಗಳು
ಕೆಡುವುದಕ್ಕೆ ವಿವರವೆಂತೆಂದಡೆ;
ಶ್ರೀಗುರುವಿನ ಕೃಪಾಗರ್ಭದ ಮಧ್ಯದಲ್ಲಿರ್ದವ
ನಾನಹುದೆಂದರಿದಾಗವೆ
ಅಸ್ತಿ ಎಂಬ ವಿಕಾರ ಕೆಟ್ಟಿತ್ತು.
ಗುರು ಕರದಲ್ಲಿ ಜನಿಸಿದೆನಾಗಿ
ನಾ ಮಾಯಾಯೋನಿಜನವಲ್ಲವೆಂದು ಅರಿದಾಗವೆ
ಜಾಯತೇ ಎಂಬ ವಿಕಾರ ಕೆಟ್ಟಿತ್ತು.
ಗುರುವಿನ ಸದ್ಭಾವಜಾತ ಲಿಂಗವನಂಗದಲ್ಲಿ ಧರಿಸಿ
ಪರಮ ಪರಿಣಾಮದಲ್ಲಿ ಪರಿಣಮಿಸುತ್ತಿರ್ದ ಕಾರಣ
ವಿಪರಿಣಮತೇ ಎಂಬ ವಿಕಾರ ಕೆಟ್ಟಿತ್ತು.
ಗುರುವಿನ ಆಚಾರ ಜ್ಞಾನಮಾರ್ಗದಲ್ಲಿ
ಆಚರಿಸಿ ಬೆಳೆವುತ್ತಿದ್ದ ಕಾರಣ
ವಿವರ್ಧತೇ ಎಂಬ ವಿಕಾರ ಕೆಟ್ಟಿತ್ತು.
ದೇಹೇಂದ್ರಿಯಾದಿಗಳೆಲ್ಲ ಲಿಂಗದಲ್ಲಿ ಅಡಗಿ ಶಿಥಿಲವಾಗಲು
ಅಪಕ್ಷೀಯತೇ ಎಂಬ ವಿಕಾರ ಕೆಟ್ಟಿತ್ತು.
ಲಿಂಗಾಂಗದ ಐಕ್ಯವನರಿದು ಲಿಂಗದಲ್ಲಿ ಲೀಯವಾಗಲು
ವಿನಶ್ಯತಿ ಎಂಬ ವಿಕಾರ ಕೆಟ್ಟಿತ್ತು.
ಇಂತೀ ಲಿಂಗಸಂಗದಿಂದ ಷಡ್ಭಾವ ವಿಕಾರಂಗಳಳಿದು
ನಿಮ್ಮವಿಕಾರವೆಡೆಗೊಂಡಿತ್ತು
ನಿಜಗುರು ಸ್ವತಂತ್ರಸಿದ್ಧಲಿಂಗೇಶ್ವರ, ನಿಮ್ಮ ಭಕ್ತಂಗೆ.
Transliteration Āsti jāyatē vipariṇamatē vivardhatē
apakṣīyatē vinaśyati emba ṣaḍbhāva vikāraṅgaḷu
keḍuvudakke vivaraventendaḍe;
śrīguruvina kr̥pāgarbhada madhyadallirdava
nānahudendaridāgave
asti emba vikāra keṭṭittu.
Guru karadalli janisidenāgi
nā māyāyōnijanavallavendu aridāgave
jāyatē emba vikāra keṭṭittu.
Guruvina sadbhāvajāta liṅgavanaṅgadalli dharisi
parama pariṇāmadalli pariṇamisuttirda kāraṇa
vipariṇamatē emba vikāra keṭṭittu.
Guruvina ācāra jñānamārgadalli
ācarisi beḷevuttidda kāraṇa
vivardhatē emba vikāra keṭṭittu.
Dēhēndriyādigaḷella liṅgadalli aḍagi śithilavāgalu
apakṣīyatē emba vikāra keṭṭittu.
Liṅgāṅgada aikyavanaridu liṅgadalli līyavāgalu
vinaśyati emba vikāra keṭṭittu.
Intī liṅgasaṅgadinda ṣaḍbhāva vikāraṅgaḷaḷidu
nim'mavikāraveḍegoṇḍittu
nijaguru svatantrasid'dhaliṅgēśvara, nim'ma bhaktaṅge.
