ನಿಮ್ಮ ಶರಣನು ಲಿಂಗಭರಿತನು,
ವಿಚಾರಿಸಿ, ಅರಿದು, ಧ್ಯಾನದಿಂದ ಜಪಿಸಿ,
ಆ ಮಹಾವಸ್ತುವನು ಕಂಡು
ಒಲಿದೊಲಿಸಿ, ಕೂಡಿ ಸುಖಿಸಿಹೆನೆಂಬನ್ನೆವರ
ಶ್ರೀಗುರುಸ್ವಾಮಿಯ ಕರುಣಾಮೃತಸಾಗರ ಮೇರೆವರಿದು
ವಿಚಾರಿಸಿ ಶಿವನಾಯಿತ್ತು, ಅರಿವು ಶಿವನಾಯಿತ್ತು;
ಜ್ಞಾತೃ ಜ್ಞಾನ ಜ್ಞೇಯ ಶಿವನಾಯಿತ್ತು,
ಜಪಮಂತ್ರ ಶಿವನಾಯಿತ್ತು,
ಜಪಿಸುವ ಜಿಹ್ವೆ ಶಿವನಾಯಿತ್ತು,
ಕಂಡೆಹೆನೆಂಬ ಕಣ್ಣು ಶಿವನಾಯಿತ್ತು.
ಈ ಪರಿ ನೋಡ ನೋಡಲು ಮತ್ತೆ ಚೋದ್ಯ
ಪ್ರಾಣಲಿಂಗವಾಗಿ ಸದ್ಗುರು ತಾನೆ ಕೃಪೆಮಾಡಿ
ಕರಸ್ಥಲಕ್ಕೆ ಬಿಜಯಂಗೈದು
ಪ್ರಾಣಲಿಂಗವಾದನು, ಕಾಯಲಿಂಗವಾದನು.
ಮನ ಬುದ್ಧಿ ಚಿತ್ತ ಅಹಂಕಾರ
ಜ್ಞಾನ ಭಾವವೆಲ್ಲ ಲಿಂಗವಾಯಿತ್ತು.
ಸರ್ವಾಂಗಲಿಂಗವಾಗಿ ಸಲಹಿದನು.
ಶ್ರೀಗುರುಲಿಂಗವು ಒಲಿದೊಲಿಸಿ ಕೂಡುವ ಪರಿ ಎಂತಯ್ಯಾ?
ಒಲಿಸುವ ಪರಿ ದಾಸೋಹ, ಒಲಿದ ಪರಿ ಪ್ರಸಾದ,
ಕೂಟದ ಪರಿ ನಿರ್ವಂಚಕತ್ವ,
ಒಲಿದೊಲಿಸಿ ಕೂಡಿದ ಪರಿ ಪರಿಣಾಮವಯ್ಯಾ,
ಉರಿಲಿಂಗಪೆದ್ದಿಪ್ರಿಯ ವಿಶ್ವೇಶ್ವರಾ.
Transliteration Nim'ma śaraṇanu liṅgabharitanu,
vicārisi, aridu, dhyānadinda japisi,
ā mahāvastuvanu kaṇḍu
olidolisi, kūḍi sukhisihenembannevara
śrīgurusvāmiya karuṇāmr̥tasāgara mērevaridu
vicārisi śivanāyittu, arivu śivanāyittu;
jñātr̥ jñāna jñēya śivanāyittu,
japamantra śivanāyittu,
japisuva jihve śivanāyittu,
kaṇḍ'̔ehenemba kaṇṇu śivanāyittu.
Ī pari nōḍa nōḍalu matte cōdya
prāṇaliṅgavāgi sadguru tāne kr̥pemāḍiKarasthalakke bijayaṅgaidu
prāṇaliṅgavādanu, kāyaliṅgavādanu.
Mana bud'dhi citta ahaṅkāra
jñāna bhāvavella liṅgavāyittu.
Sarvāṅgaliṅgavāgi salahidanu.
Śrīguruliṅgavu olidolisi kūḍuva pari entayyā?
Olisuva pari dāsōha, olida pari prasāda,
kūṭada pari nirvan̄cakatva,
olidolisi kūḍida pari pariṇāmavayyā,
uriliṅgapeddipriya viśvēśvarā.
