ಪ್ರಾಣಲಿಂಗ, ಲಿಂಗಪ್ರಾಣ
`ಇಷ್ಟಂ ಪ್ರಾಣಸ್ತಥಾ ಭಾವಸ್ತ್ರಿಧಾ ಚೈಕಂʼ ಎಂದುದಾಗಿ
ಪಂಚಭೂತಕಾಯವಳಿದು ಪ್ರಸಾದಕಾಯವ ಮಾಡಿ
ಭಕ್ತದೇಹಿಕನೆನಿಸಿದನು.
ಈ ಸತ್ಕ್ರೀಯನು ಶ್ರೀಗುರು ಕರುಣಿಸಿ ಮಾಡಿದನಾಗಿ
ಪ್ರಾಣಲಿಂಗ, ಕಾಯಭಕ್ತನು ಇದೂ ಸ್ವಭಾವ.
ದಾಸೋಹಿಯಾಗಿ ಅರ್ಚನೆ ಪೂಜನೆ ಸರ್ವದ್ರವ್ಯ
ಸಕಲಭೋಗವನೂ ಅರ್ಪಿತವ ಮಾಡುತ್ತಿಹನು,
ಪ್ರಸಾದವ ಭೋಗಿಸುತ್ತಿಹನು.
ಸತ್ಕ್ರೀಯಲ್ಲಿ ಲಿಂಗಕ್ಕೆ ಕಾಯಶೂನ್ಯನಾಗಿ
ಭಕ್ತಕಾಯ ಮಮಕಾಯನೆಂದು ಅವಗ್ರಹಿಸಿಕೊಂಡ ಭಕ್ತಂಗೆ
ಬೇರೆ ಪ್ರಾಣವಿಲ್ಲಾಗಿ ಪ್ರಾಣವೆಂದು ಅವಗ್ರಹಿಸಿಕೊಂಡ.
ಇಂತಹ ಪ್ರಾಣಲಿಂಗವು, ಕಾಯಭಕ್ತನು
ತನ್ನೊಳಗೆ ತಾನೇ ಐಕ್ಯವಾಯಿತ್ತು.
ಭಕ್ತನೇ ಲಿಂಗ, ಲಿಂಗವೇ ಭಕ್ತನು,
ದಾಸೋಹಕ್ರೀಯೆ ಸೋಹಕ್ರೀ,
ಸೋಹಕ್ರೀಯೆ ದಾಸೋಹಕ್ರೀ.
ಈ ಕ್ರೀಯನು ಅದ್ವೈತವೆನ್ನಿ, ಸೋಹವೆನ್ನಿ, ದಾಸೋಹವೆನ್ನಿ
ಬಲ್ಲವರುಗಳು ಬಲ್ಲಂತೆ ನಿಮ್ಮ
ನಿಮ್ಮ ಅರಿವಿನ ಹವಣಿಂಗೆ ನುಡಿಯಿರಿ.
ಆ ಲಿಂಗಾಯತವ, ಆ ಲಿಂಗದ ಮರ್ಮವ
ಅರ್ಪಿತದ ಮರ್ಮವ, ಪ್ರಸಾದದ ಮಹಿಮೆಯ
ಮಹಾಪರಿಣಾಮದ ಕ್ರೀಯು ಸಾಮಾನ್ಯರಿಗೆ ಅರಿಯಬಾರದು.
ಈ ಮಹಾ ಕ್ರೀ ವಾಙ್ಮನೋತೀತ.
ಈ ಮಹಾಕುಳವ ಮಹಾನುಭಾವರೇ ಬಲ್ಲರು,
ಉರಿಲಿಂಗಪೆದ್ದಿಪ್ರಿಯ ವಿಶ್ವೇಶ್ವರಾ.
Transliteration Prāṇaliṅga, liṅgaprāṇa
`iṣṭaṁ prāṇastathā bhāvastridhā caikaṁʼ endudāgi
pan̄cabhūtakāyavaḷidu prasādakāyava māḍi
bhaktadēhikanenisidanu.
Ī satkrīyanu śrīguru karuṇisi māḍidanāgi
prāṇaliṅga, kāyabhaktanu idū svabhāva.
Dāsōhiyāgi arcane pūjane sarvadravya
sakalabhōgavanū arpitava māḍuttihanu,
prasādava bhōgisuttihanu.
Satkrīyalli liṅgakke kāyaśūn'yanāgi
bhaktakāya mamakāyanendu avagrahisikoṇḍa bhaktaṅge
bēre prāṇavillāgi prāṇavendu avagrahisikoṇḍa.Intaha prāṇaliṅgavu, kāyabhaktanu
tannoḷage tānē aikyavāyittu.
Bhaktanē liṅga, liṅgavē bhaktanu,
dāsōhakrīye sōhakrī,
sōhakrīye dāsōhakrī.
Ī krīyanu advaitavenni, sōhavenni, dāsōhavenni
ballavarugaḷu ballante nim'ma
nim'ma arivina havaṇiṅge nuḍiyiri.
Ā liṅgāyatava, ā liṅgada marmava
arpitada marmava, prasādada mahimeya
mahāpariṇāmada krīyu sāmān'yarige ariyabāradu.
Ī mahā krī vāṅmanōtīta.
Ī mahākuḷava mahānubhāvarē ballaru,
uriliṅgapeddipriya viśvēśvarā.
