ಲಿಂಗದೊಳಗೆ ಅಖಿಳಾಂಡಕೋಟಿ ಬ್ರಹ್ಮಾಂಡಗಳಡಗಿಹವು.
ಲಿಂಗವು ತಾನು ಬ್ರಹ್ಮಾಂಡದೊಳಡಗಿ
ಆ ಬ್ರಹ್ಮಾಂಡವು ಲಿಂಗವು ತನ್ನೊಳಡಗಿದ ಭೇದವು
ಶಾಸ್ತ್ರವ ಬಲ್ಲವರಿಗೆ ಕಾಣಿಸದು,
ಆಗಮಯುಕ್ತರಿಗೆ ತಿಳಿಯದು ;
ಕರ್ಮ ಭೂಭಾರಿಗಳಿಗೆ ಸಲ್ಲದು.
ಇದನ್ನು ಭಕ್ತಗಣಂಗಳಿಗೆ ಗುರು ಪ್ರತ್ಯಕ್ಷಮಂ ಮಾಡಿ
ತೋರಿಸಿದ ಭೇದವು ಎಂತೆಂದಡೆ :
ಕರಿ ಕನ್ನಡಿಯೊಳಡಗಿದ ಹಾಗೆ ;
ಮುಗಿಲ ಮರೆಯ ಸೂರ್ಯನ ಹಾಗೆ
ನೇತ್ರದ ಕೊನೆಯೊಳಗೆ ಆಕಾಶವಡಗಿದ ಹಾಗೆ,
ನೆಲದ ಮರೆಯ ನಿಧಾನದ ಹಾಗೆ
ಬೀಜದೊಳಡಗಿದ ವೃಕ್ಷದ ಹಾಗೆ.
ಈ ಭೇದವು ಗುರುಭಕ್ತರಂಶಿಕರಾದವರಿಗೆ ಸಾಧ್ಯವಲ್ಲದೆ
ಉಳಿದ ಭಿನ್ನ ಜ್ಞಾನಿಗಳೆತ್ತ ಬಲ್ಲರು ಎಂದಾತ
ನಮ್ಮ ಶಾಂತಕೂಡಲಸಂಗಮದೇವ.
Transliteration Liṅgadoḷage akhiḷāṇḍakōṭi brahmāṇḍagaḷaḍagihavu.
Liṅgavu tānu brahmāṇḍadoḷaḍagi
ā brahmāṇḍavu liṅgavu tannoḷaḍagida bhēdavu
śāstrava ballavarige kāṇisadu,
āgamayuktarige tiḷiyadu;
karma bhūbhārigaḷige salladu.
Idannu bhaktagaṇaṅgaḷige guru pratyakṣamaṁ māḍi
tōrisida bhēdavu entendaḍe:
Kari kannaḍiyoḷaḍagida hāge;
mugila mareya sūryana hāge
nētrada koneyoḷage ākāśavaḍagida hāge,
nelada mareya nidhānada hāge
Bījadoḷaḍagida vr̥kṣada hāge.
Ī bhēdavu gurubhaktaranśikarādavarige sādhyavallade
uḷida bhinna jñānigaḷetta ballaru endāta
nam'ma śāntakūḍalasaṅgamadēva.
