ಶಿವಭಕ್ತಿಯುಳ್ಳವಂಗೆ;
ಕಾಮ ಬೇಡ, ಕ್ರೋಧ ಬೇಡ, ಲೋಭ ಬೇಡ;
ಮೋಹ ಬೇಡ, ಮದ ಬೇಡ, ಮತ್ಸರ ಬೇಡ.
ಶಿವಭಕ್ತಿಯುಳ್ಳವಂಗೆ;
ಕಾಮ ಬೇಕು, ಕ್ರೋಧ ಬೇಕು, ಲೋಭ ಬೇಕು,
ಮೋಹ ಬೇಕು, ಮದ ಬೇಕು, ಮತ್ಸರ ಬೇಕು.
ಬೇಕೆಂಬುದಕ್ಕಾವ ಗುಣ?
ಕಾಮ ಬೇಕು ಲಿಂಗದಲ್ಲಿ,
ಕ್ರೋಧ ಬೇಕು ಕರಣಂಗಳಲ್ಲಿ,
ಲೋಭ ಬೇಕು ಪಾದೋದಕ ಪ್ರಸಾದದಲ್ಲಿ,
ಮೋಹ ಬೇಕು ಗುರುಲಿಂಗ ಜಂಗಮದಲ್ಲಿ,
ಮದ ಬೇಕು ಶಿವಚಾರದಿಂದ ಘನವಿಲ್ಲವೆಂದು,
ಮತ್ಸರ ಬೇಕು ಹೊನ್ನು
ಹೆಣ್ಣು ಮಣ್ಣಿನಲ್ಲಿ-ಇಂತೀ ಷಡ್ಗುಣವಿರಬೇಕು.
ಬೇಡವೆಂಬುದಕ್ಕಾವುದು ಗುಣ?
ಕಾಮ ಬೇಡ ಪರಸ್ತ್ರೀಯರಲ್ಲಿ,
ಕ್ರೋಧ ಬೇಡ ಗುರುವಿನಲ್ಲಿ,
ಲೋಭ ಬೇಡ ತನು ಮನ ಧನದಲ್ಲಿ,
ಮೋಹ ಬೇಡ ಸಂಸಾರದಲ್ಲಿ,
ಮದ ಬೇಡ ಶಿವಭಕ್ತರಲ್ಲಿ,
ಮತ್ಸರ ಬೇಡ ಸಕಲಪ್ರಾಣಿಗಳಲ್ಲಿ-
ಇಂತೀ ಷಡ್ಗುಣವನರಿದು ಮೆರೆಯಬಲ್ಲಡೆ
ಆತನೇ ಸಹಜ ಸದ್ಭಕ್ತ
ಕಾಣಾ ಕೂಡಲಚೆನ್ನಸಂಗಮದೇವಾ.
Transliteration Śivabhaktiyuḷḷavaṅge;
kāma bēḍa, krōdha bēḍa, lōbha bēḍa;
mōha bēḍa, mada bēḍa, matsara bēḍa.
Śivabhaktiyuḷḷavaṅge;
kāma bēku, krōdha bēku, lōbha bēku,
mōha bēku, mada bēku, matsara bēku.
Bēkembudakkāva guṇa?
Kāma bēku liṅgadalli,
krōdha bēku karaṇaṅgaḷalli,
lōbha bēku pādōdaka prasādadalli,
mōha bēku guruliṅga jaṅgamadalli,
mada bēku śivacāradinda ghanavillavendu,
Matsara bēku honnu
heṇṇu maṇṇinalli-intī ṣaḍguṇavirabēku.
Bēḍavembudakkāvudu guṇa?
Kāma bēḍa parastrīyaralli,
krōdha bēḍa guruvinalli,
lōbha bēḍa tanu mana dhanadalli,
mōha bēḍa sansāradalli,
mada bēḍa śivabhaktaralli,
matsara bēḍa sakalaprāṇigaḷalli-
intī ṣaḍguṇavanaridu mereyaballaḍe
ātanē sahaja sadbhakta
kāṇā kūḍalacennasaṅgamadēvā.
Music
Courtesy: Album Name - Vachana Dhare Vol -3 Singer : B.S.Mallikarjuna, Nanditha, Meghana Music : M.S. Maruthi Label : Ashwini audio
