ಹಲವು ದೈವಂಗಳ ಪೂಜೆಯ ಮಾಡುವ ಗೊರವನ
ಗುರುದೇವನೆಂದು ನುಡಿದು ಕರೆವ
ವಿವೇಕವಿಹೀನ ದುರಾಚಾರಿಯ ಮುಖವ ನೋಡಲಾಗದು.
ಸರ್ವದೇವರಿಗೆ ಒಡೆಯನಾದಂತಹ
ಸದಾಶಿವನೆ ಗುರುದೇವನು.
ಶಿವಲಿಂಗಕ್ಕೆ ತಮ್ಮ ಪಾದತೀರ್ಥ ಪ್ರಸಾದವನೀವ
ವೀರಮಾಹೇಶ್ವರ ಜಂಗಮದೇವರು,
ತನಗೆ ಗುರುದೇವ ಮಹಾದೇವನು.
ಅದೆಂತೆಂದಡೆ:
“ಗುರುದೇವೋ ಮಹಾದೇವೋ ಗುರುದೇವಸ್ಸದಾಶಿವಃ
ಗುರುದೈವಾತ್ ಪರಂ ನಾಸ್ತಿ ತಸ್ಮೈ ಶ್ರೀಗುರವೇ ನಮಃ”
ಎಂತೆಂದುದಾಗಿ,
ಗುರುದೇವನೆಂಬ ಶಬ್ದವು ಉಳಿದವರಿಗೆ ಸಲ್ಲದು.
‘ಏಕೋ ದೇವೋ ನ ದ್ವಿತೀಯಃ’ ಎಂದು ಶುದ್ಧಶೈವನಿಷ್ಠಾಪರನಾಗಿ,
ಶಿವಮಹೇಶ್ವರನ ಎರಡನೆಯ ಶಿವನೆಂದು ಭಾವಿಸಿ
ಅವನೊಕ್ಕು ಮಿಕ್ಕುದ ಶೇಷಪ್ರಸಾದವೆಂದುಕೊಂಡು
ಅನ್ಯಾಯವನರಿಯದ ಶುದ್ಧಪತಿವ್ರತೆಯಂತೆ,
ಶಿವಲಿಂಗೈಕ್ಯಭಾವದಿ ಅರಿವಾಗಿ
ನಚ್ಚಿ ಮಚ್ಚಿ ಮನವು ಲಿಂಗದಲ್ಲಿ ನೆಲೆಗೊಂಡು ನಿಂದ
ಸುಜ್ಞಾನಭರಿತನ ಅಯ್ಯನೆಂಬುದು.
ಮಿಕ್ಕಿನ ಶೈವನೆಂಬುದು, ಮಿಕ್ಕಿನ ಕೀಳುದೈವದ
ಪೂಜೆಯ ಮಾಡುವ[ನ] ಗೊರವನೆಂಬುದು.
ಅದೆಂತೆಂದಡೆ:
ತೊತ್ತು ತೊಂಡರ ಕಾಲ ತೊಳೆದು
ಸೇವೆಯ ಮಾಡಿ ಬದುಕುವನ,
ಪಡಿದೊತ್ತಿನ ಮಕ್ಕಳೆಂದು ಎಂಬರಲ್ಲದೆ,
ರಾಜಕುಮಾರನೆಂದೆನ್ನರು.
ಆ ಪ್ರಕಾರದಲ್ಲಿ ವಿಪ್ರ, ಭ್ರಷ್ಟ, ನಂಟ,
ಶ್ವಪಚ ಮಾನವರ ವೇಷ ತಾಳಿ
ಹಲಬರ ಹೊಗಳಿ ಕೀಳು ದೈವದ ಕಾಲು ತೊಳೆದು
ಎಂಜಲ ತಿಂಬ ಭ್ರಷ್ಟಜಾತಿಯ ಗುರುದೇವನೆಂದು
ಹೇಸಿಕೆಯಿಲ್ಲದೆ ನುಡಿದು ಕರೆವ
ದುರಾಚಾರಿಗಳಿಗೆ ಶಿವಭಕ್ತಿ ಸಲ್ಲದು, ನರಕ ತಪ್ಪದು,
ಅಂಜದೆ ಕರೆಸಿಕೊಂಬ ಅಜ್ಞಾನಿ ಗೊರವಂಗೆ ಮೊದಲೆ
ನರಕ ತಪ್ಪದು ಕಾಣಾ
ಕೂಡಲಚೆನ್ನಸಂಗಮದೇವಾ.
Transliteration Halavu daivaṅgaḷa pūjeya māḍuva goravana
gurudēvanendu nuḍidu kareva
vivēkavihīna durācāriya mukhava nōḍalāgadu.
Sarvadēvarige oḍeyanādantaha
sadāśivane gurudēvanu.
Śivaliṅgakke tam'ma pādatīrtha prasādavanīva
vīramāhēśvara jaṅgamadēvaru,
tanage gurudēva mahādēvanu.
Adentendaḍe:
“Gurudēvō mahādēvō gurudēvas'sadāśivaḥ
gurudaivāt paraṁ nāsti tasmai śrīguravē namaḥ”
entendudāgi,
gurudēvanemba śabdavu uḷidavarige salladu.
‘Ēkō dēvō na dvitīyaḥ’ endu śud'dhaśaivaniṣṭhāparanāgi,
Śivamahēśvarana eraḍaneya śivanendu bhāvisi
avanokku mikkuda śēṣaprasādavendukoṇḍu
an'yāyavanariyada śud'dhapativrateyante,
śivaliṅgaikyabhāvadi arivāgi
nacci macci manavu liṅgadalli nelegoṇḍu ninda
sujñānabharitana ayyanembudu.
Mikkina śaivanembudu, mikkina kīḷudaivada
pūjeya māḍuva[na] goravanembudu.
Adentendaḍe:
Tottu toṇḍara kāla toḷedu
sēveya māḍi badukuvana,
paḍidottina makkaḷendu embarallade,
Rājakumāranendennaru.
Ā prakāradalli vipra, bhraṣṭa, naṇṭa,
śvapaca mānavara vēṣa tāḷi
halabara hogaḷi kīḷu daivada kālu toḷedu
en̄jala timba bhraṣṭajātiya gurudēvanendu
hēsikeyillade nuḍidu kareva
durācārigaḷige śivabhakti salladu, naraka tappadu,
an̄jade karesikomba ajñāni goravaṅge modale
naraka tappadu kāṇā
kūḍalacennasaṅgamadēvā.
