ಹಸಿವು ತೃಷೆ ವಿಷಯವೆಂಬ ಮರಂಗಳನೆ ಕಂಡು,
ಪರಿಣಾಮವೆಂಬ ಕೊಡಲಿಯಲ್ಲಿ ತತ್ತರಿದರಿದು,
ಕಾಮ ಕ್ರೋಧ ಲೋಭ ಮೋಹ ಮದಮತ್ಸರಂಗಳ
ತರಿದೊಟ್ಟಿದನೊಂದೆಡೆಯಲ್ಲಿ.
ಪಂಚೇಂದ್ರಿಯ, ಷಡುವರ್ಗ, ಸಪ್ತಧಾತು,
ಅಷ್ಟಮದವೆಂಬ ಬಳ್ಳಿಯ ಸೀಳಿ,
ಏಳು ಕಟ್ಟಿನ ಮೋಳಿಗೆಯನೆ ಹೊತ್ತು ನಡೆದನಯ್ಯಾ.
ಆಶೆ ಆಮಿಷ ತಾಮಸವೆಂಬ ತುರಗವನೇರಿ
ಆತುರದ ತುರವನೆ ಕಳೆದನಯ್ಯಾ.
ಈ ಮಹಾಮಹಿಮಂಗೆ,
ಜಗದ ಜತ್ತಿಗೆಯ, ಹಾದರಗಿತ್ತಿಯ,
ಹದಿನೆಂಟು ಜಾತಿಯ ಮನೆಯಲ್ಲಿ ತೊತ್ತಾಗಿಹ
ಶಿವದ್ರೋಹಿಯ ಲಿಂಗವಂತರ
ಮನೆಯಲ್ಲಿ ಹೊಗಿಸುವರೆ?
ಎಲೆ ಲಿಂಗತಂದೆ, ಜಡವಿಡಿದು ಕೆಟ್ಟೆನಯ್ಯಾ,
ಭಕ್ತಿಯ ಕುಲವನರಿಯದೆ.
ಎಲೆ ಲಿಂಗದಾಜ್ಞಾಧಾರಕಾ,
ಎಲೆ ಲಿಂಗಸನುಮತಾ, ಎಲೆ ಲಿಂಗೈಕಪ್ರತಿಗ್ರಾಹಕಾ.
ಕೂಡಲಚೆನ್ನಸಂಗಯ್ಯನಲ್ಲಿ,
ಮೋಳಿಗೆಯ ಮಾರಿತಂದೆಗಳ ಶ್ರೀಪಾದಕ್ಕೆ
ನಮೋ ನಮೋ, ಜಯಜಯತು.
Transliteration Hasivu tr̥ṣe viṣayavemba maraṅgaḷane kaṇḍu,
pariṇāmavemba koḍaliyalli tattaridaridu,
kāma krōdha lōbha mōha madamatsaraṅgaḷa
taridoṭṭidanondeḍeyalli.
Pan̄cēndriya, ṣaḍuvarga, saptadhātu,
aṣṭamadavemba baḷḷiya sīḷi,
ēḷu kaṭṭina mōḷigeyane hottu naḍedanayyā.
Āśe āmiṣa tāmasavemba turagavanēri
āturada turavane kaḷedanayyā.
Ī mahāmahimaṅge,
jagada jattigeya, hādaragittiya,
hadineṇṭu jātiya maneyalli tottāgiha
śivadrōhiya liṅgavantara
Maneyalli hogisuvare?
Ele liṅgatande, jaḍaviḍidu keṭṭenayyā,
bhaktiya kulavanariyade.
Ele liṅgadājñādhārakā,
ele liṅgasanumatā, ele liṅgaikapratigrāhakā.
Kūḍalacennasaṅgayyanalli,
mōḷigeya māritandegaḷa śrīpādakke
namō namō, jayajayatu.
