ಉತ್ತರ ದಕ್ಷಿಣ ಪೂರ್ವ ಪಶ್ಚಿಮವೆಂಬ
ನಾಲ್ಕು ದೇಶವ ತಿರುಗಿದಡೇನು ಫಲವಿಲ್ಲ.
ಅಷ್ಟಾಷಷ್ಠಿಕೋಟಿ ತೀರ್ಥಂಗಳಲ್ಲಿ ಸ್ನಾನವ ಮಾಡಿದಡೂ
ಜನನ-ಮರಣ ಪುಣ್ಯ ಪಾಪಂಗಳು ಬಿಡವು.
ಅದೆಂತೆಂದಡೆ:
ಅನೇಕ ಕಾಲವು ಅಷ್ಟಾಷಷ್ಠಿಕೋಟಿ ತೀರ್ಥಂಗಳೊಳಗೆ
ಮತ್ಸ್ಯ ಕೂರ್ಮ ಮಂಡೂಕಂಗಳಿಹವು.
ಆ ಮತ್ಸ್ಯ ಕೂರ್ಮ ಮಂಡೂಕಂಗಳಿಗೆ
ಜನನ-ಮರಣ ಪುಣ್ಯಪಾಪಂಗಳು ಬಿಡದೆಹೋದವು.
ಇದು ಕಾರಣ ಗುರುಪಾದಸೇವೆಯ ಮಾಡಿ,
ಗುರುಕಾರುಣ್ಯವ ಪಡೆದು
ನಿರಾಳ ನಿರಂಜನ ನಿರಾಮಯ ನಿರಾಮಯಾತೀತವೆಂಬ
ಗಂಗೆಯಲ್ಲಿ ಮುಳಗಿದಡೆ
ನಿರಾಳ ನಿರಂಜನ ನಿರಾಮಯ
ನಿರಾಮಯಾತೀತವಾಗಿಹುದು ನೋಡಾ ಜನನವು,
ಅಪ್ರಮಾಣಕೂಡಲಸಂಗಮದೇವಾ.
Transliteration Uttara dakṣiṇa pūrva paścimavemba
nālku dēśava tirugidaḍēnu phalavilla.
Aṣṭāṣaṣṭhikōṭi tīrthaṅgaḷalli snānava māḍidaḍū
janana-maraṇa puṇya pāpaṅgaḷu biḍavu.
Adentendaḍe:
Anēka kālavu aṣṭāṣaṣṭhikōṭi tīrthaṅgaḷoḷage
matsya kūrma maṇḍūkaṅgaḷihavu.
Ā matsya kūrma maṇḍūkaṅgaḷige
janana-maraṇa puṇyapāpaṅgaḷu biḍadehōdavu.
Idu kāraṇa gurupādasēveya māḍi,
gurukāruṇyava paḍedu
nirāḷa niran̄jana nirāmaya nirāmayātītavemba
gaṅgeyalli muḷagidaḍe
nirāḷa niran̄jana nirāmaya
nirāmayātītavāgihudu nōḍā jananavu,
apramāṇakūḍalasaṅgamadēvā.
