ಅಯ್ಯಾ, ತನ್ನ ಅಜ್ಞಾನ ಮೂಲಹಂಕಾರದಿಂದ
ಗುರುಚರಪರಭಕ್ತಗಣಂಗಳ
ಕಂಡಡೆ ತಲೆವಾಗದಯ್ಯ ಎನ್ನ ಮನವು.
ತನ್ನ ಬೈರೂಪದ ಬಿಂಕದಿಂದ
ಗುರುಹಿರಿಯರು ಮಾತನಾಡಿದಡೆ
ಭೃತ್ಯಭಾವದಿಂದ ಮಾತನಾಡದಯ್ಯ ಎನ್ನ ಮನವು.
ಹಾ! ಹಾ! ಯತಿಗಳು ದಾರಿಯಲ್ಲಿ ಬಂದಡೆ
ತನ್ನ ಗರುವಿನಿಂದ ಅವರಿಗೆ ಹಾದಿಯ ಬಿಡದಯ್ಯ ಎನ್ನ ಮನವು
ಹರಗುರುವಾಕ್ಯವಿಡಿದು ಆಚರಿಸುವ
ನಿಜನಿಷ್ಠ ಶೀಲವ್ರತಿಗಳ ಕಂಡಡೆ ತನ್ನ ಗರುವಿನಿಂದ
ಉರಿಮಾರಿಯಂತೆ, ಕೋಣ ಮಲತು ಗರುವಿನಿಂದ ತಿರುಗುವಂತೆ,
ಅವರ ಮೇಲೆ ಮಚ್ಚರಿಸಿತಯ್ಯ ಎನ್ನ ಮನವು,
ಇಂತಾ ಪರಮಪಾತಕ ಮನದ ಸಂಗದಿಂದ
ನೊಂದು ಬೆಂದು ಕಂಗೆಟ್ಟು ಕಂದಿ ಕುಂದಿ ತೊಳಲಿ ಬಳಲಿದೆನಯ್ಯ
ಇಂತಹ ಕುಮನಸಂಗವ ಪರಿಹರಿಸಿ ಸಲಹಯ್ಯ
ಶ್ರೀಗುರುಲಿಂಗಜಂಗಮನೆ
ಹರಹರ ಶಿವಶಿವ ಜಯಜಯ ಕರುಣಾಕರ
ಮತ್ಪ್ರಾಣನಾಥ ಮಹಾಶ್ರೀಗುರುಸಿದ್ಧಲಿಂಗೇಶ್ವರ.
Transliteration Ayyā, tanna ajñāna mūlahaṅkāradinda
gurucaraparabhaktagaṇaṅgaḷa
kaṇḍaḍe talevāgadayya enna manavu.
Tanna bairūpada biṅkadinda
guruhiriyaru mātanāḍidaḍe
bhr̥tyabhāvadinda mātanāḍadayya enna manavu.
Hā! Hā! Yatigaḷu dāriyalli bandaḍe
tanna garuvininda avarige hādiya biḍadayya enna manavu
haraguruvākyaviḍidu ācarisuva
nijaniṣṭha śīlavratigaḷa kaṇḍaḍe tanna garuvininda
Urimāriyante, kōṇa malatu garuvininda tiruguvante,
avara mēle maccarisitayya enna manavu,
intā paramapātaka manada saṅgadinda
nondu bendu kaṅgeṭṭu kandi kundi toḷali baḷalidenayya
intaha kumanasaṅgava pariharisi salahayya
śrīguruliṅgajaṅgamane
harahara śivaśiva jayajaya karuṇākara
matprāṇanātha mahāśrīgurusid'dhaliṅgēśvara.
