ಲಂಬಿಕಾ ಯೋಗಿಗಳ ಡೊಂಬರಿಗೆ ಸರಿಯೆಂಬೆ.
ಹಠಯೋಗಿಗಳ ಅಟಮಟಗಾರರೆಂದೆಂಬೆ.
ಅಷ್ಟಾಂಗ ಯೋಗಿಗಳ ಕಷ್ಟ ಕರ್ಮಿಗಳೆಂದೆಂಬೆ.
ಪವನ ಯೋಗಿಗಳ ಪ್ರಪಂಚಿಗಳೆಂದೆಂಬೆ.
ಲಯ ಯೋಗಿಗಳ ನಾಯಿಗಿಂದ ಕಡೆ ಎಂಬೆ.
ಅದೇನು ಕಾರಣವೆಂದರೆ;
ಲಯಯೋಗವೆಂಬುವದು
ನಾನಾ ದರುಶನದಲ್ಲಿ ವರ್ತಿಸುವುದಾಗಿ
ಆದ ಶಿವಯೋಗಿಗಳು ಒಲ್ಲರು.
ಮಂತ್ರ ಯೋಗವೆಂಬುವದು ಸರ್ವ ಸಂದೇಹಕ್ಕಿಕ್ಕಿ ಕೊಲುತಿಪ್ಪುದು.
ಅದೇನು ಕಾರಣವೆಂದಡೆ:
ಮಂತ್ರವೇ ಲಿಂಗ, ಲಿಂಗವೇ ಮಂತ್ರವೆಂದರಿದು
ಲಿಂಗನೆನಹ ಸಂಬಂಧಿಸಿಕೊಳ್ಳಲರಿಯದೆ
ಲಿಂಗ ವಿರಹಿತವಾಗಿ ಮಾಡುತಿಪ್ಪರಾಗಿ.
ಅದು ಅಂಗ ಲಿಂಗ ಸಂಬಂಧಿಗಳು ಮಚ್ಚರು ನೋಡಾ.
ಅದೇನು ಕಾರಣವೆಂದರೆ:
ಕೆಲವು ಶೈವರುಗಳು ಮಾಡುವರಾಗಿ
ರಾಜಯೋಗವೆಂಬುವದು ಗಾಜು ಗೋಜು ನೋಡಾ.
ಅದನು ಲಿಂಗವಿರಹಿತವಾಗಿ
ಜ್ಞಾತೃ ಜ್ಞಾನ, ಜ್ಞೇಯ ಒಂದಾದಲ್ಲಿಯೆ ಯೋಗವೆನುತಿಪ್ಪರಾಗಿ.
ಇವು ಒಂದೂ ಲಿಂಗಾಂಗ ಯೋಗದ ಹೆಜ್ಜೆಯಲ್ಲ ನೋಡಾ.
ಅದು ಕಾರಣ, ಲಿಂಗನಿಷ್ಠರು ಮಚ್ಚರು.
ಅದೇನು ಕಾರಣವೆಂದಡೆ:
ಲಿಂಗವ ತೆಗೆದಡೆ ಲಿಂಗದೊಡನೆ ಪ್ರಾಣ ಹೋಗದಾಗಿ,
ಅದೆಲ್ಲಿಯ ಯೋಗವಯ್ಯ ಭ್ರಾಂತುಯೋಗ.
ಇದು ಕಾರಣ, ನಿಮ್ಮ ಶರಣರು ಲಿಂಗಪ್ರಾಣಿಗಳು;
ಪ್ರಾಣಲಿಂಗಸಂಬಂಧಿಗಳು; ಪ್ರಸಾದಮುಕ್ತರು
ಈ ಮೂರು ಪ್ರಕಾರದಲ್ಲಿ ಕೂಡುತ್ತಿಪ್ಪರು ಶಿವಯೋಗಿಗಳು.
ಇದುಕಾರಣ ನಿಮ್ಮ ಶರಣರು
ಸ್ವಾನುಭಾವಜ್ಞಾನ ಶುದ್ಧಶಿವಯೋಗದಲ್ಲಿ
ಸ್ವರೂಪಜ್ಞಾನಿಗಳು ಕಾಣಾ,
ಮಹಾಲಿಂಗಗುರು ಶಿವಸಿದ್ಧೇಶ್ವರ ಪ್ರಭುವೇ.
Transliteration Lambikā yōgigaḷa ḍombarige sariyembe.
Haṭhayōgigaḷa aṭamaṭagārarendembe.
Aṣṭāṅga yōgigaḷa kaṣṭa karmigaḷendembe.
Pavana yōgigaḷa prapan̄cigaḷendembe.
Laya yōgigaḷa nāyiginda kaḍe embe.
Adēnu kāraṇavendare;
layayōgavembuvadu
nānā daruśanadalli vartisuvudāgi
āda śivayōgigaḷu ollaru.
Mantra yōgavembuvadu sarva sandēhakkikki kolutippudu.
Adēnu kāraṇavendaḍe:
Mantravē liṅga, liṅgavē mantravendaridu
liṅganenaha sambandhisikoḷḷalariyade
liṅga virahitavāgi māḍutipparāgi.
Adu aṅga liṅga sambandhigaḷu maccaru nōḍā.
Adēnu kāraṇavendare:
Kelavu śaivarugaḷu māḍuvarāgi
rājayōgavembuvadu gāju gōju nōḍā.
Adanu liṅgavirahitavāgi
jñātr̥ jñāna, jñēya ondādalliye yōgavenutipparāgi.
Ivu ondū liṅgāṅga yōgada hejjeyalla nōḍā.
Adu kāraṇa, liṅganiṣṭharu maccaru.
Adēnu kāraṇavendaḍe:
Liṅgava tegedaḍe liṅgadoḍane prāṇa hōgadāgi,
adelliya yōgavayya bhrāntuyōga.
Idu kāraṇa, nim'ma śaraṇaru liṅgaprāṇigaḷu;
prāṇaliṅgasambandhigaḷu; prasādamuktaru
ī mūru prakāradalli kūḍuttipparu śivayōgigaḷu.
Idukāraṇa nim'ma śaraṇaru
svānubhāvajñāna śud'dhaśivayōgadalli
svarūpajñānigaḷu kāṇā,
mahāliṅgaguru śivasid'dhēśvara prabhuvē.
