ಏಕಮೂರ್ತಿಸ್ತ್ರಯೋ ಭಾಗಾ
ಗುರುರ್ಲಿಂಗಂತು ಜಂಗಮಃ' ಎಂದುದಾಗಿ,
ಪರತರಪರಂಜ್ಯೋತಿಯಪ್ಪ
ಮಹಾಲಿಂಗವೆ ಲೋಕಾನುಗ್ರಹಕ್ಕಾಗಿ-
ಅಗ್ಗಣಿಯೆ ಅಣಿಕಲ್ಲಾದಂತೆ,
ಕರಗಿದ ತುಪ್ಪವೆ ಹೆತ್ತುಪ್ಪವಾದಂತೆ.
ಗುರು ಲಿಂಗ ಜಂಗಮವಾಗಿ
ಪರಿಣಮಿಸಿರ್ಪುದು ಕಾಣಾ!
ಆ ಗುರುತತ್ವದಿರವನರಿದು ಗುರುವಾಗಿ
ಗುರುಲಿಂಗವ ಪೂಜಿಸಬೇಕು.
ಲಿಂಗತತ್ವದಿಂಗಿತವನರಿದು ಲಿಂಗವಾಗಿ
ಶಿವಲಿಂಗವ ಪೂಜಿಸಬೇಕು.
ಜಂಗಮತತ್ವದಿಂಗಿತವನರಿದು ಜಂಗಮವಾಗಿ
ಜಂಗಮವ ಪೂಜಿಸಬೇಕು.
ಇಂತೀ ತ್ರಿವಿಧಲಿಂಗವ ಪೂಜಿಸಿ ತ್ರಿವಿಧ
ಪಾದೋದಕವ ಪಡೆಯಬೇಕು.
ಇದೇ ಅಂತರಂಗದ ಆತ್ಮತೀರ್ಥ, ಕಾಣಾ!
"ಅಂತಸ್ಥಂ ಮಾಂ ಪರಿತ್ಯಜ್ಯ ಬಹಿಸ್ಥಂ ಯಸ್ತು ಸೇವತೇ|
ಹಸ್ತಸ್ಥಪಿಂಡಮುತ್ಸ್ರುಜ್ಯ ಲಿಹೇತ್ಕೂರ್ಪರಮಾತ್ಮನಃ"|| ಎಂದುದಾಗಿ,
ಪರಿಶುದ್ಧವಾದ ಅಂತರಂಗದ ಆತ್ಮತೀರ್ಥವನುಳಿದು,
ಬಹಿರಂಗದ ಜಡತೀರ್ಥವ ಸೇವಿಸಿದಡೆ
ಷಡ್ರಸದಿಂದೊಡಗೂಡಿದ ಪರಮಾನ್ನದ
ಪಿಂಡವನುಳಿದು ಮೋಳಕೈಯ ನೆಕ್ಕಿದಂತಕ್ಕು ಕಾಣಾ,
ಕೂಡಲಚೆನ್ನಸಂಗಮದೇವಾ.
Transliteration Ēkamūrtistrayō bhāgā
gururliṅgantu jaṅgamaḥ' endudāgi,
parataraparan̄jyōtiyappa
mahāliṅgave lōkānugrahakkāgi-
aggaṇiye aṇikallādante,
karagida tuppave hettuppavādante.
Guru liṅga jaṅgamavāgi
pariṇamisirpudu kāṇā!
Ā gurutatvadiravanaridu guruvāgi
guruliṅgava pūjisabēku.
Liṅgatatvadiṅgitavanaridu liṅgavāgi
śivaliṅgava pūjisabēku.
Jaṅgamatatvadiṅgitavanaridu jaṅgamavāgi
jaṅgamava pūjisabēku.
Intī trividhaliṅgava pūjisi trividha
pādōdakava paḍeyabēku.
Idē antaraṅgada ātmatīrtha, kāṇā!
Antasthaṁ māṁ parityajya bahisthaṁ yastu sēvatē|
hastasthapiṇḍamutsrujya lihētkūrparamātmanaḥ|| endudāgi,
pariśud'dhavāda antaraṅgada ātmatīrthavanuḷidu,
bahiraṅgada jaḍatīrthava sēvisidaḍe
ṣaḍrasadindoḍagūḍida paramānnada
piṇḍavanuḷidu mōḷakaiya nekkidantakku kāṇā,
kūḍalacennasaṅgamadēvā.
