ಕರಸ್ಥಲದಲ್ಲಿ ಲಿಂಗವಧರಿಸಿ
ಅನ್ಯದೈವಕ್ಕೆ ತಲೆವಾಗದಾತನ
ಲಿಂಗವಂತನೆಂಬೆನಯ್ಯಾ.
ಕರಸ್ಥಲದಲ್ಲಿ ಲಿಂಗವ ಧರಿಸಿ ಭವಿಸಂಗವ ಮಾಡದಾತನ
ಲಿಂಗವಂತನೆಂಬೆನಯ್ಯಾ.
ಕರಸ್ಥಲದಲ್ಲಿ ಲಿಂಗವ ಧರಿಸಿದಾತ
ಜಡಶೈವರ ಹೊದ್ದಲಾಗದು,
ಶೈವರು ಹೇಳಿದ ಶಾಸ್ತ್ರವ ಓದಲಾಗದು,
ಅನ್ಯಮಂತ್ರ ಅನ್ಯಜಪಮಾಲಿಕೆಯ ಮಾಡಲಾಗದು,
ಲಿಂಗಬಾಹ್ಯ ಸತಿಸುತರ ಸೋಂಕಲಾಗದು.
ಕರಸ್ಥಲದಲ್ಲಿ ಲಿಂಗವ ಧರಿಸಿದಾತ
ಉದಯಾಸ್ತಮಾನವೆನ್ನದೆ
ಶಿವಪೂಜೆ ಶಿವಮಂತ್ರ ಶಿವಾರ್ಪಣ ಶಿವಶಾಸ್ತ್ರ
ಶಿವಯೋಗದಲ್ಲಿರುವಾತನೆ ಲಿಂಗವಂತನೆಂಬೆನಯ್ಯಾ.
ಇದಮೀರಿ; ಕರಸ್ಥಲದಲ್ಲಿ ಲಿಂಗವ ಧರಿಸಿ
ತನ್ನ ಮನೆಯಲ್ಲಿ ಅನ್ಯದೈವ ಭವಿಮಿಶ್ರ ಅನ್ಯಬೋಧೆ
ಭವಿಶಾಸ್ತ್ರವುಳ್ಳಾತನ ಶುದ್ಧಭವಿಯೆಂಬೆನಯ್ಯಾ.
ಅದೆಂತೆಂದಡೆ;
"ಅಭಕ್ತಜನಸಂಗಶ್ಚ ಆಮಂತ್ರಸ್ಯ ಅನಾಗಮಃ|
ಅನ್ಯದೈವಪರಿತ್ಯಾಗೋ ಲಿಂಗಭಕ್ತಸ್ಯ ಲಕ್ಷಣಂ||
ಶಿವಸ್ಯ ಶಿವಮಂತ್ರಸ್ಯ ಶಿವಾಗಮಸ್ಯ ಪೂಜನಂ|
ಶಿವಶೇಷಶೀಲಸಂಬಂಧೋ ಲಿಂಗಭಕ್ತಸ್ಯ ಲಕ್ಷಣಂ||
ಲಿಂಗಧಾರೀ ಸುಭಕ್ತಶ್ಚ ಲಿಂಗಬಾಹ್ಯಸತೀಸುತಃ|
ಅಲಿಂಗಿನೀ ಚುಂಬಕಶ್ಚ ರೌರವಂ ನರಕಂ ವ್ರಜೇತ್"||
ಎಂದುದಾಗಿ,
ಗುರುವಾಕ್ಯವ ಮೀರಿ ನಡೆವ
ಮಹಾಪಾತಕರ ಮುಖವ ತೋರದಿರಾ,
ಸೆರೆಗೊಡ್ಡಿ ಬೇಡಿಕೊಂಬೆ,
ದಯದಿಂದ ನೋಡಿ ರಕ್ಷಿಸು
ಕೂಡಲಚೆನ್ನಸಂಗಮದೇವಾ.
Transliteration Karasthaladalli liṅgavadharisi
an'yadaivakke talevāgadātana
liṅgavantanembenayyā.
Karasthaladalli liṅgava dharisi bhavisaṅgava māḍadātana
liṅgavantanembenayyā.
Karasthaladalli liṅgava dharisidāta
jaḍaśaivara hoddalāgadu,
śaivaru hēḷida śāstrava ōdalāgadu,
an'yamantra an'yajapamālikeya māḍalāgadu,
liṅgabāhya satisutara sōṅkalāgadu.
Karasthaladalli liṅgava dharisidāta
udayāstamānavennade
Śivapūje śivamantra śivārpaṇa śivaśāstra
śivayōgadalliruvātane liṅgavantanembenayyā.
Idamīri; karasthaladalli liṅgava dharisi
tanna maneyalli an'yadaiva bhavimiśra an'yabōdhe
bhaviśāstravuḷḷātana śud'dhabhaviyembenayyā.
Adentendaḍe;
abhaktajanasaṅgaśca āmantrasya anāgamaḥ|
an'yadaivaparityāgō liṅgabhaktasya lakṣaṇaṁ||
śivasya śivamantrasya śivāgamasya pūjanaṁ|
śivaśēṣaśīlasambandhō liṅgabhaktasya lakṣaṇaṁ||
liṅgadhārī subhaktaśca liṅgabāhyasatīsutaḥ|
aliṅginī cumbakaśca rauravaṁ narakaṁ vrajēt||
endudāgi,
Guruvākyava mīri naḍeva
mahāpātakara mukhava tōradirā,
seregoḍḍi bēḍikombe,
dayadinda nōḍi rakṣisu
kūḍalacennasaṅgamadēvā.
