ತನಗೆ ಮುನಿವವರಿಗೆ ತಾ ಮುನಿಯಲೇಕಯ್ಯಾ?

ತನಗೆ ಮುನಿವವರಿಗೆ ತಾ ಮುನಿಯಲೇಕಯ್ಯಾ? ತನಗಾದ ಆಗೇನು? ಅವರಿಗಾದ ಚೇಗೇನು? ತನುವಿನ ಕೋಪ ತನ್ನ ಹಿರಿಯತನದ ಕೇಡು; ಮನದ ಕೋಪ ತನ್ನರುಹಿನ ಕೇಡು. ಮನೆಯೊಳಗಣ ಕಿಚ್ಚು ಮನೆಯ ಸುಟ್ಟಲ್ಲದೆ ನೆರೆಮನೆಯ ಸುಡುವುದೆ, ಕೂಡಲಸಂಗಮದೇವಾ?

ಕನ್ನಡ ವ್ಯಾಖ್ಯಾನ ಕೋಪದಿಂದ ಹಾನಿ ಅಣ್ಣನು ಬೋಧಿಸಿದ ಸಪ್ತಶೀಲಗಳಲ್ಲಿ ಮತ್ತೊಬ್ಬರ ಮೇಲೆ ಮುನಿಸ ತಾಳಬಾರದೆಂಬುದೂ ಒಂದು. ಹೀಗೆ ‘ಮುನಿಯಬೇಡ’ಎಂಬ ನಿಷೇಧಕ್ಕೆ ಕಾರಣವಿಲ್ಲದಿಲ್ಲ, ಆ ಕಾರನವೇನೆಂಬುದನ್ನೇ ಇಲ್ಲಿ ಹೇಳಲಾಗಿದೆ. ‘ತನಗೆ ಮುನಿವರಿಗೆ ತಾ ಮುನಿಯಲೇಕಯ್ಯಾ?’ ‘ತನಗಾದ ಆಗೇನು, ಅವರಿಗಾದ ಚೇಗೇನು?’ ಅಂದರೆ ನಮ್ಮ ಮೇಲೆ ಯಾರಾದರೂ ಕೋಪಿಸಿಕೊಂಡರೆ ಅದಕ್ಕೆ ಪ್ರತಿಯಾಗಿ ನಾವು ಅವರ ಮೇಲೇಕೆ ಕೋಪಗೊಳ್ಳಬೇಕು? ಒಂದು ಪಕ್ಷ ಅವರ ಮೇಲೆ ಕೋಪಗೊಂಡರೆ ಅದರಿಂದ ನಮಗಾಗುವ ಲಾಭವಾದರೂ ಏನು? ಅಥವಾ ಅವರಿಗಾಗುವ ಕೇಡಾದರೂ ಏನು? ವಿಚಾರ ಮಾಡಿ ನೋಡಿದರೆ ಹಾಗೆ ನಾವು ಕೋಪಗೊಳ್ಳುವುದು ನಮಗೇ ಹಾನಿಕರ. ‘...... ತನುವಿನ ಕೋಪ ತನ್ನ ಹಿರಿಯತನದ ಕೇಡು. ಮನದ ಕೋಪ ತನ್ನರುವಿನ ಕೇಡು......’ ಯಾರ ಮೇಲೆ ಕೋಪವಿದೆಯೋ ಆ ವ್ಯಕ್ತಿಗೆ ನಮ್ಮ ಶರೀರದಿಂದ (ತನುವಿನಿಂದ) ಉಂಟಾಗುವ ಪ್ರತಿಕ್ರಿಯೆಯೇ ...... ಹೊಡೆಯುವುದೋ ಅಥವಾ ಇನ್ನೇನಾದರೂ ಮಾಡುವುದೋ ತನುವಿನ ಕೋಪವೆನಿಸಿಕೊಳ್ಳುತ್ತದೆ. ಇದರಿಂದ ಪೆಟ್ಟುತಿಂದ ವ್ಯಕ್ತಿಯ ದೋಷದತ್ತ ಲೋಕದ ದೃಷ್ಟಿ ಬೀಳದೆ ತಿಳಿದವರಾಗಿ (ಹಿರಿಯರಾಗಿ) ಹಾಗೆ ಹೊಡೆಯಬಹುದೇ ಎಂದು ನಮ್ಮ ಪ್ರತಿಕ್ರಿಯೆಯ ಮೇಲೆಯೇ ಲೋಕದ ಕಣ್ಣು ಬೀಳುತ್ತದೆ. ಆದ್ದರಿಂದ ನಮ್ಮ ತನುವಿನ ಕೋಪ ನಮ್ಮನ್ನೇ ಆಕ್ಷೇಪಣೆಗೆ ಗುರಿ ಮಾಡುತ್ತದೆ. ಇನ್ನು ಮನದ ಕೋಪವೆಂದರೆ ಕೋಪ ಬಂದಾಗ ತಕ್ಷಣಬೇ ಯಾವ ಪ್ರತಿಕ್ರಿಯೆಯನ್ನೂ ಮಾಡದೆ ಅದನ್ನು ಮನಸ್ಸಿನಲ್ಲಿಯೇ ಉಳಿಸಿಕೊಳ್ಳುವುದು. ಇದರಿಂದ ಯಾವ ವ್ಯಕ್ತಿಯ ಮೇಲೆ ಕೋಪವಿದೆಯೋ ಅವನಿಗೆ ‘ಯಾವ ರೀತಿಯಲ್ಲಿ ತೊಂದರೆ ಕೊಡಲಿ, ಯಾವ ಬಗೆಯಲ್ಲಿ ಅವನು ಹಾಳಾಗುವಂತೆ ಮಾಡಲಿ’ ಇತ್ಯಾದಿ ಕೆಟ್ಟ ಕೆಟ್ಟ ಯೋಚನೆಗಳೇ ನಮ್ಮ ಮನಸ್ಸಲ್ಲಿ ಇಣುಕುತ್ತಾ ಒಳ್ಳೆಯ ವಿಚಾರಗಳೇ ಬಾರದಂತಾಗುತ್ತವೆ. ಹೀಗೆ ಮನದ ಕೋಪದಿಂದ ನಮ್ಮ ಅರುವಿಗೆ ಅಂದರೆ ಜ್ಞಾನಕ್ಕೆ ಕೇಡುಂಟಾಗುತ್ತದೆ. ‘......ಮನೆಯೊಳಗಣ ಕಿಚ್ಚು ಮನೆ ಸುಟ್ಟಲ್ಲದೆ ನೆರಮನೆಯ ಸುಡುವುದೇ ಕೂಡಲಸಂಗಮದೇವಾ?’ ನಮ್ಮ ಮನೆಯಲ್ಲಿರುವ ಬೆಂಕಿಯು ನಮ್ಮ ಮನೆಯನ್ನು ಮೊದಲು ಸುಟ್ಟೇ ನೆರೆಮನೆಯನ್ನು ಸುಡುವುದು. ಹಾಗೆಯೇ ನಮ್ಮ ಕೋಪದಿಂದ ಇತರೆಯವರಿಗೇನಾದರೂ ಕೇಡು ಉಂಟಾಗುವುದೇ. ಆದರೆ ಮೇಲೆ ಹೇಳಿರುವಂತೆ ಮೊದಲು ನಮಗೆ ಕೇಡು ಉಂಟಾಗುವುದು. ಹೀಗೆ ನಮ್ಮ ಕೋಪ ನಮಗೇ ಅಪಾಯಕಾರಿ. ಈ ಬಗ್ಗೆ ಸರ್ವಜ್ಞನ ನುಡಿಯೂ ಈ ರೀತಿ ಇದೆ. ‘ಕೋಪವೆಂಬುದು ಕೇಳು ಪಾಪದ ನೆಲೆಗಟ್ಟು! ಕೂಪದೊಳು ನೇಣು ಹರಿದಂತೆ ನರಕದೊಳು! ಕೋಪಿ ತಾನಳಿವ ಸರ್ವಜ್ಞ!!’ - ಶ್ರೀ ತರಳಬಾಳು ಜಗದ್ಗುರು ಡಾ. ಶಿವಮೂರ್ತಿ ಶಿವಾಚಾರ್ಯ ಮಹಾಸ್ವಾಮಿಗಳವರು.

Music English Hindi Telugu Tamil Urdu Transliteration Dictionary Sthala Explanation Comment None