ಅಂಗದ ಮೇಲೆ ಶ್ರೀಗುರು ಲಿಂಗ ಸಂಬಂಧವ ಮಾಡಿ
ಅಂಗಾಶ್ರಯವನಳಿದು ಲಿಂಗಾಶ್ರಯವ ಮಾಡಿದ ಬಳಿಕ
ಅಂಗಭೋಗಂಗಳ ಬಿಟ್ಟು, ಲಿಂಗ ಕ್ರಿಯೆಗಳನುಳ್ಳವರಾಗಿ
ಅಂಗಾರ್ಚನೆಯನತಿಗಳೆದು ಲಿಂಗಾರ್ಚನೆಯ ಮಾಡುತ್ತ,
ಅಂಗ ಮುಂತಲ್ಲವೆಂದು ಲಿಂಗ ಮುಂತಾಗಿಯೆ
ಎಲ್ಲ ಕ್ರೀಗಳನು ಗಮಿಸಿ ಸದ್‍ವ್ರತವನಾಚರಿಸುತ್ತ,
ನಿಜವೀರಶೈವ ಸಂಪನ್ನರಪ್ಪ ಭಕ್ತಜಂಗಮಾರಾಧ್ಯ
ಸ್ಥಳಂಗಳನುಳ್ಳವರಾಗಿರ್ದು
ಮತ್ತೆ ಮರಳಿ, ಅಂಗವನೆ ಆಶ್ರಯಿಸಿ,
ಅಂಗಭೋಗಂಗಳನು, ಅಂಗಾರ್ಪಿತ ಭುಂಜನೆಗಳನು
ಭಕ್ತ ಜಂಗಮಾರಾಧ್ಯ ಸ್ಥಳಂಗಳನ್ನುಳ್ಳವರಾಗಿರ್ದು
ಮತ್ತೆ, ಮರಳಿ, ಅಂಗವನೆ ಆಶ್ರಯಿಸಿ
ಅಂಗಭೋಗಂಗಳನು,ಅಂಗಕ್ರೀಗಳನು,ಅಂಗದರ್ಚನೆಗಳನು,
ಅಂಗ ಮುಂತಾದ ಗಮನಂಗಳನು, ಅಂಗಾರ್ಪಿತ ಭುಂಜನೆಗಳನು,
ಭಕ್ತ ಜಂಗಮಾರಾಧ್ಯರುಗಳು ಲಿಂಗವಿರಹಿತರಾಗಿ ಮಾಡಿದಡೆ
ಲಿಂಗವಿಲ್ಲ, ಲಿಂಗಾರ್ಚನೆಯಿಲ್ಲ, ಲಿಂಗಪ್ರಸಾದವಿಲ್ಲ.
ಲಿಂಗ ಮುಂತಾದ ಮುಕ್ತಿಗಮನ, ಇಹಪರದಲ್ಲಿಯೂ ಇಲ್ಲ.
ಇದನರಿದು, ಲಿಂಗಭೋಗವೇ ಭೋಗ,
ಲಿಂಗಾರ್ಚನೆಯೇ ಪೂಜೆ, ಲಿಂಗಾರ್ಪಿತವಾದುದೇ ಪ್ರಸಾದ,
ಲಿಂಗಮುಂತಾಗಿಯೇ ಎಲ್ಲ ಕ್ರೀಗಳನು ಮಾಡುವುದಯ್ಯಾ,
ಸಿಮ್ಮಲಿಗೆಯ ಚೆನ್ನರಾಮಾ.
Transliteration Aṅgada mēle śrīguru liṅga sambandhava māḍi
aṅgāśrayavanaḷidu liṅgāśrayava māḍida baḷika
aṅgabhōgaṅgaḷa biṭṭu, liṅga kriyegaḷanuḷḷavarāgi
aṅgārcaneyanatigaḷedu liṅgārcaneya māḍutta,
aṅga muntallavendu liṅga muntāgiye
ella krīgaḷanu gamisi sadvratavanācarisutta,
nijavīraśaiva sampannarappa bhaktajaṅgamārādhya
sthaḷaṅgaḷanuḷḷavarāgirdu
matte maraḷi, aṅgavane āśrayisi,
aṅgabhōgaṅgaḷanu, aṅgārpita bhun̄janegaḷanu
Bhakta jaṅgamārādhya sthaḷaṅgaḷannuḷḷavarāgirdu
matte, maraḷi, aṅgavane āśrayisi
aṅgabhōgaṅgaḷanu,aṅgakrīgaḷanu,aṅgadarcanegaḷanu,
aṅga muntāda gamanaṅgaḷanu, aṅgārpita bhun̄janegaḷanu,
bhakta jaṅgamārādhyarugaḷu liṅgavirahitarāgi māḍidaḍe
liṅgavilla, liṅgārcaneyilla, liṅgaprasādavilla.
Liṅga muntāda muktigamana, ihaparadalliyū illa.
Idanaridu, liṅgabhōgavē bhōga,
liṅgārcaneyē pūje, liṅgārpitavādudē prasāda,
liṅgamuntāgiyē ella krīgaḷanu māḍuvudayyā,
sim'maligeya cennarāmā
