ಭಕ್ತ ಮಾಹೇಶ್ವರ ಪ್ರಸಾದಿ ಈ ಮೂರು ಭಕ್ತನಂಗ.
ಪ್ರಾಣಲಿಂಗಿ ಶರಣ ಐಕ್ಯ ಈ ಮೂರು ಜಂಗಮದಂಗ.
ಮೂರಕ್ಕಾರು ಸತಿಪತಿಭೇದವನರಿವುದು.
ಆ ಆರರ ಒದಗು ಇಪ್ಪತ್ತೈದರ ಬೀಜ.
ಈ ಭೇದವನರಿದ ಮತ್ತೆ ನೂರೊಂದು ಆರರಲ್ಲಿ ಅಡಗಿ,
ಆ ಆರು ಐದರಲ್ಲಿ ನಿಂದು, ಐದು ಮೂರರಲ್ಲಿ ನಿಂದು ಭೇದಿಸಿ,
ಮೂರು ಒಂದರಲ್ಲಿ ನಿಂದು ಸಂದೇಹವಳಿಯಿತ್ತು.
ಇಂತು ಎನ್ನ ಭ್ರಮೆ ಹಿಂಗಿತ್ತು.
ಇಂತಿವರ ನಾನಾ ಸ್ಥಳ ಕುಳಂಗಳೆಲ್ಲವು ಆದಿಗತೀತವಾದ ಮತ್ತೆ
ಭಾವದ ಗುರುವೆನಲೇಕೆ ? ಅವತಾರದ ಲಿಂಗವೆನಲೇಕೆ ?
ಅರಿದು ಮರೆದವ ಜಂಗಮವೆನಲೇಕೆ ?
ಇಂತಿವ ಕಂಡೂ ಕಾಣದ, ನಂಬಿಯೂ ನಂಬದ ಸಂದೇಹಿಗೇಕೆ,
ಗುರು ಲಿಂಗ ಜಂಗಮ ?
ಪ್ರಥಮ ಕ್ರಿಯೆಯಲ್ಲಿ ಮೋಸ, ಜ್ಞಾನಕ್ಕೆ ಲಾಭವೆ ?
ಇದು ದೃಷ್ಟದ ದರ್ಪಣದ ಒಳಹೊರಗಿನಂತೆ ತಿಳಿದು ನೋಡೆ,
ಉಭಯಸ್ಥಲವೈಕ್ಯ ನಿಃಕಳಂಕ ಮಲ್ಲಿಕಾರ್ಜುನಾ.
Transliteration Bhakta māhēśvara prasādi ī mūru bhaktanaṅga.
Prāṇaliṅgi śaraṇa aikya ī mūru jaṅgamadaṅga.
Mūrakkāru satipatibhēdavanarivudu.
Ā ārara odagu ippattaidara bīja.
Ī bhēdavanarida matte nūrondu āraralli aḍagi,
ā āru aidaralli nindu, aidu mūraralli nindu bhēdisi,
mūru ondaralli nindu sandēhavaḷiyittu.
Intu enna bhrame hiṅgittu.
Intivara nānā sthaḷa kuḷaṅgaḷellavu ādigatītavāda matte
bhāvada guruvenalēke? Avatārada liṅgavenalēke?
Aridu maredava jaṅgamavenalēke?
Intiva kaṇḍū kāṇada, nambiyū nambada sandēhigēke,
guru liṅga jaṅgama?
Prathama kriyeyalli mōsa, jñānakke lābhave?
Idu dr̥ṣṭada darpaṇada oḷahoraginante tiḷidu nōḍe,
ubhayasthalavaikya niḥkaḷaṅka mallikārjunā.
