ಲಿಂಗಸ್ಥಲ ಭಾವಸ್ವರೂಪವಾದಲ್ಲಿ,
ಪ್ರಾಣಲಿಂಗಿ ಶರಣ ಐಕ್ಯನೆಂಬ ತ್ರಿವಿಧವ ತಾಳ್ದು,
ಮೂರ್ತಿ ಕುರುಹುಗೊಂಬಲ್ಲಿ,
ನಾನಾ ಮಧುರ ರಸದಂಡ ವೃಕ್ಷಂಗಳಲ್ಲಿ ಮಿಕ್ಕಾದ
ಲತೆ ಪಚ್ಚೆ ಪೈರುಗಳಲ್ಲಿ ಕುಸುಮಗಂಧ ಮೃಗಗಂಧಂಗಳು
ಸ್ಥಾವರ ಮುಂತಾದ ಸುಗಂಧ ಸುವಾಸನೆಗಳಿಗೆಲ್ಲಕ್ಕೂ
ತದ್ರೂಪಿಂಗೆ ಹಿಂಗದಂತೆ ಬಂದೊದಗಿದ ಸಂಗದಂತೆ
ಕುರುಹುಗೊಂಡೆಯಲ್ಲಾ.
ಕಾಯದ ಜೀವದ ಉಭಯದ ಮಧ್ಯದಲ್ಲಿ ನಿಂದು ದೇವನಾದೆಯಲ್ಲಾ.
ನಿನ್ನ ಲೀಲೆ ಕಾರಣವಾಗಿ, ಸಂದೇಹಿಗಳಿಗೆ ಸಂಕಲ್ಪಿಯಾಗಿ,
ನಿರಂಗಿಗೆ ನಿರಾಲಂಬನಾಗಿ, ಸಮ್ಯಕ್‍ಜ್ಞಾನ ಮುಕುರದಂತೆ
ಸಂಬಂಧಿಸಿದೆಯಲ್ಲಾ,
ನಿರಂಗ ನಿಃಕಳಂಕ ಮಲ್ಲಿಕಾರ್ಜುನಾ, ನಿನ್ನಿರವ ನೀನೇ ಬಲ್ಲೆ.
Transliteration Liṅgasthala bhāvasvarūpavādalli,
prāṇaliṅgi śaraṇa aikyanemba trividhava tāḷdu,
mūrti kuruhugomballi,
nānā madhura rasadaṇḍa vr̥kṣaṅgaḷalli mikkāda
late pacce pairugaḷalli kusumagandha mr̥gagandhaṅgaḷu
sthāvara muntāda sugandha suvāsanegaḷigellakkū
tadrūpiṅge hiṅgadante bandodagida saṅgadante
Kuruhugoṇḍeyallā.
Kāyada jīvada ubhayada madhyadalli nindu dēvanādeyallā.
Ninna līle kāraṇavāgi, sandēhigaḷige saṅkalpiyāgi,
niraṅgige nirālambanāgi, samyakjñāna mukuradante
sambandhisideyallā,
niraṅga niḥkaḷaṅka mallikārjunā, ninnirava nīnē balle.
