ಈರೇಳು ಲೋಕವನೊಳಕೊಂಡ ಮಹಾಘನಲಿಂಗವು
ಭಕ್ತನ ಕರಸ್ಥಲಕ್ಕೆ ಬಂದು ಪೂಜೆಗೊಂಬ ಪರಿಯ ನೋಡಾ.
ಅಗಮ್ಯ ಅಗೋಚರ ಅಪ್ರಮಾಣ ಲಿಂಗಸಂಗದಲ್ಲಿ
ಇರಬಲ್ಲಾತನೇ ಭಕ್ತನು.
ಹೀಗಲ್ಲದೆ ಕೇಡಿಲ್ಲದೆ ಲಿಂಗಕ್ಕೆ ಕೇಡ ಕಟ್ಟಿ
ಹೋದೀತೋ ಇದ್ದೀತೋ ಅಳಿದೀತೋ
ಹೇಗೋ ಎಂತೋ ಎಂದು ಚಿಂತಿಸಿ ನುಡಿವರು ಭಿನ್ನವಿಜ್ಞಾನಿಗಳು.
ಆ ಲಿಂಗದೊಳಗೆ ಅಖಿಳಾಂಡಕೋಟಿ ಬ್ರಹ್ಮಾಂಡಗಳಡಗಿದವು.
ಸಾಕ್ಷಿ :
"ಲಿಂಗಮಧ್ಯೇ ಜಗತ್ಸರ್ವಂ ತ್ರೈಲೋಕ್ಯಂ ಸಚರಾಚರಂ |
ಲಿಂಗಬಾಹ್ಯಾತ್ ಪರಂ ನಾಸ್ತಿ ತಸ್ಮಾಲ್ಲಿಂಗಂ ಪ್ರಪೂಜಯೇತ್ ||"
ಎಂದುದಾಗಿ,
ಇಂತಪ್ಪ ಘನಲಿಂಗವ ಶ್ರೀಗುರು ಭಕ್ತಂಗೆ
ಕರ-ಮನ-ಭಾವಕ್ಕೆ ಪ್ರತ್ಯಕ್ಷವಾಗಿ ಮಾಡಿಕೊಟ್ಟ ಬಳಿಕ
ಎಂದಿಗೂ ಅಗಲಬೇಡಿಯೆಂದು ಗಣಸಾಕ್ಷಿಯಾಗಿ
ಮಾಡಿಕೊಟ್ಟ ಬಳಿಕ ಅಗಲಲುಂಟೆ?
ಅಗಲಿದಡೆ ಲಿಂಗವು ಗುರುತಲ್ಪಕವೆ ಸರಿ.
ಆವ ಶಾಸ್ತ್ರ ಆವ ಆಗಮ ಆವ ವಚನ ಹೇಳಿಲ್ಲವಾಗಿ,
ಮತ್ತಂ, ಸಂಪಿಗೆಯ ಪುಷ್ಪದ ಪರಿಮಳ ಬೇರೆ ಆಗಲುಂಟೆ?
ಇಂತಪ್ಪ ಮಹಾಘನಲಿಂಗವು ಹೇಗಿಪ್ಪುದೆಂದಡೆ :
ಅವರವರ ಮನ ಭಾವ ಹೇಗಿಪ್ಪುದೊ ಹಾಗಿಪ್ಪುದು.
ಇದಕ್ಕೆ ದೃಷ್ಟಾಂತ :
ಉದಕ ಒಂದೇ, ಹಲವು ವೃಕ್ಷದ ಹಣ್ಣು
ಮಧುರ ಒಗರು ಖಾರ ಹುಳಿ ಕಹಿ ಸವಿ.
ಉದಕ ಒಂದೇ, ಶ್ವೇತ ಪೀತ ಹರಿತ
ಮಾಂಜಿಷ್ಟ ಕಪೋತ ಮಾಣಿಕ್ಯ.
ಈ ಆರು ವರ್ಣಂಗಳಲ್ಲಿ ಬೆರೆದುದು ಅಭ್ರಕ ಒಂದೇ!
ಈ ಅಭ್ರಕ ಹೇಗೊ ಹಾಗೆ ಮನ, ಹಾಗೆ ಮಹಾಲಿಂಗ.
ಹೀಗೆಂದರಿದಾತ ನಮ್ಮ ಶಾಂತಕೂಡಲಸಂಗಮದೇವ
ಬಲ್ಲನಲ್ಲದೆ ಭಿನ್ನಜ್ಞಾನಿಗಳು ಎತ್ತ ಬಲ್ಲರು ನೋಡಾ!
Transliteration Īrēḷu lōkavanoḷakoṇḍa mahāghanaliṅgavu
bhaktana karasthalakke bandu pūjegomba pariya nōḍā.
Agamya agōcara apramāṇa liṅgasaṅgadalli
iraballātanē bhaktanu.
Hīgallade kēḍillade liṅgakke kēḍa kaṭṭi
hōdītō iddītō aḷidītō
hēgō entō endu cintisi nuḍivaru bhinnavijñānigaḷu.
Ā liṅgadoḷage akhiḷāṇḍakōṭi brahmāṇḍagaḷaḍagidavu.
Sākṣi:
Liṅgamadhyē jagatsarvaṁ trailōkyaṁ sacarācaraṁ |
liṅgabāhyāt paraṁ nāsti tasmālliṅgaṁ prapūjayēt ||
endudāgi,
intappa ghanaliṅgava śrīguru bhaktaṅge
kara-mana-bhāvakke pratyakṣavāgi māḍikoṭṭa baḷika
Endigū agalabēḍiyendu gaṇasākṣiyāgi
māḍikoṭṭa baḷika agalaluṇṭe?
Agalidaḍe liṅgavu gurutalpakave sari.
Āva śāstra āva āgama āva vacana hēḷillavāgi,
mattaṁ, sampigeya puṣpada parimaḷa bēre āgaluṇṭe?
Intappa mahāghanaliṅgavu hēgippudendaḍe:
Avaravara mana bhāva hēgippudo hāgippudu.
Idakke dr̥ṣṭānta:
Udaka ondē, halavu vr̥kṣada haṇṇu
madhura ogaru khāra huḷi kahi savi.
Udaka ondē, śvēta pīta harita
mān̄jiṣṭa kapōta māṇikya.
Ī āru varṇaṅgaḷalli beredudu abhraka ondē!
Ī abhraka hēgo hāge mana, hāge mahāliṅga.
Hīgendaridāta nam'ma śāntakūḍalasaṅgamadēva
ballanallade bhinnajñānigaḷu etta ballaru nōḍā!
