ಎಂಜಲ ತಿಂಬ ಜಡದೊಳಗೆ ಹದಿನೆಂಟುಜಾತಿಯ
ಎಂಜಲು ಭುಂಜಿಸಿ, ಉತ್ತಮರೆನಿಸಿಕೊಂಬ ಭವಜೀವಿಗಳು ಕೇಳಿರೊ.
ಕುಂಜರನಾಗಿ ನಡೆದು ಸುಜಾತರೆನಿಸಿಕೊಂಬಿರಿ.
ಅಜವಧೆ ಗೋವಧೆ ಮಾಡುವ ಅನಾಚಾರಿಗಳು ನೀವು ಕೇಳಿರೊ.
ಬ್ರಾಹ್ಮಣ ವಾಕ್ಯವ ಕಲಿತು ಬ್ರಾಹ್ಮಣರೆನಿಸಿಕೊಂಬಿರಿ.
ವರ್ಮವಿಡಿದು ನೋಡಹೋದಡೆ ನಿಮ್ಮಿಂದ ಕರ್ಮಿಗಳಲ್ಲ.
ನಿಮ್ಮ ಧರ್ಮದ ಬಟ್ಟೆಯ ನೀವರಿಯದೆ ಹೋದಿರಿ.
ಚಿತ್ತವಲ್ಲದೆ ಶಿವಭಕ್ತರ ಬುದ್ಧಿಯವಿಡಿದು
ನಡೆಯಲೊಲ್ಲದೆ ಕೆಟ್ಟುಹೋದಿರಿ.
ಸುಧೆಹೀನ ಶುದ್ಧವೆಂದು ಕೊಂಬಿರಿ.
ಸುರೆಯ ಸೇವಿಸುವ ಬೋವರೆಂಜಲು ಎಣ್ಣೆ ಶುದ್ಧವೆಂದು ಕೊಂಬಿರಿ.
ಬುದ್ದಲೆಯ ಎಂಜಲು ಹಾಲು ಮೊಸರು ಮಜ್ಜಿಗೆ ಶುದ್ಧವೆಂಬಿರಿ.
ಶೂದ್ರರೆಂಜಲು ಹಾಲು ಮೊಸರು ತುಪ್ಪ
ಆವ ಜಾತಿಯ ಮನೆಯಲ್ಲಿರ್ದಡೆ ಶುದ್ಧವೆಂದುಕೊಂಬಿರಿ.
ಹೊಲೆಯ ಭಕ್ಷಿಸಿ ಮಿಕ್ಕ ತೊಗಲಲ್ಲಿ
ಬುದ್ದಲೆಯೊಳಗೆ ತುಪ್ಪವ ತುಂಬಿಹುದೊ
ಆ ಹೊಲೆಯರ ಎಂಜಲು ತೊಗಲ ಸಗ್ಗಳೆಯಲ್ಲಿ ಉದಕವ ಕೊಂಬಿರಿ.
ಹದಿನೆಂಟುಜಾತಿಗೆ ಅಧಿಕವೆನಿಸಿಕೊಂಬಿರಿ.
ದ್ವಿಜರೆಲ್ಲರಿಗೆ ಲೆಕ್ಕವಿಲ್ಲದ ನರಕವೆಂದ, ಕಲಿದೇವರದೇವಯ್ಯ.
Transliteration En̄jala timba jaḍadoḷage hadineṇṭujātiya
en̄jalu bhun̄jisi, uttamarenisikomba bhavajīvigaḷu kēḷiro.
Kun̄jaranāgi naḍedu sujātarenisikombiri.
Ajavadhe gōvadhe māḍuva anācārigaḷu nīvu kēḷiro.
Brāhmaṇa vākyava kalitu brāhmaṇarenisikombiri.
Varmaviḍidu nōḍahōdaḍe nim'minda karmigaḷalla.
Nim'ma dharmada baṭṭeya nīvariyade hōdiri.
Cittavallade śivabhaktara bud'dhiyaviḍidu
naḍeyalollade keṭṭuhōdiri.
Sudhehīna śud'dhavendu kombiri.
Sureya sēvisuva bōvaren̄jalu eṇṇe śud'dhavendu kombiri.
Buddaleya en̄jalu hālu mosaru majjige śud'dhavembiri.
Śūdraren̄jalu hālu mosaru tuppa
āva jātiya maneyallirdaḍe śud'dhavendukombiri.
Holeya bhakṣisi mikka togalalli
buddaleyoḷage tuppava tumbihudo
ā holeyara en̄jalu togala saggaḷeyalli udakava kombiri.
Hadineṇṭujātige adhikavenisikombiri.
Dvijarellarige lekkavillada narakavenda, kalidēvaradēvayya.
