ಗುರುಲಿಂಗಜಂಗಮಾರ್ಚನೆಯ ಕ್ರಮವ
ದಯೆಯಿಂದ ಕರುಣಿಪುದು ಸ್ವಾಮಿ.
ಕೇಳೈ ಮಗನೆ :
ತಾನಿದ್ದ ಊರಲ್ಲಿ ಗುರುವು ಇದ್ದಡೆ
ನಿತ್ಯ ತಪ್ಪದೆ ದರುಶನವ ಮಾಡುವುದು.
ಗುರುಪೂಜೆಯ ಮಾಡುವಾಗ ಆ ಗುರುವಿನೊಳಗೆ
ಲಿಂಗ-ಜಂಗಮವುಂಟೆಂದು ಭಾವಿಸಿ
ತನು-ಮನ-ಧನವನೊಪ್ಪಿಸಿ ಅರ್ಚಿಸಿದ್ದುದೆ ಗುರುಪೂಜೆ.
ಲಿಂಗಪೂಜೆಯ ಮಾಡುವಾಗ ಆ ಲಿಂಗದೊಳಗೆ
ಜಂಗಮ-ಗುರುವುಂಟೆಂದುಭಾವಿಸಿ
ತನು-ಮನ-ಧನವನೊಪ್ಪಿಸಿ ಅರ್ಚಿಸಿದ್ದುದೆ ಲಿಂಗಪೂಜೆ.
ಇನ್ನು ಜಂಗಮದ ಪೂಜೆ ಮಾಡುವಾಗ
ಆ ಜಂಗಮದೊಳಗೆ ಗುರು-ಲಿಂಗವುಂಟೆಂದು ಭಾವಿಸಿ
ತನು-ಮನ-ಧನವನೊಪ್ಪಿಸಿ ಅರ್ಚಿಸಿದ್ದುದೆ ಜಂಗಮಪೂಜೆ.
ಈ ತ್ರಿವಿಧಮೂರ್ತಿ ಭಕ್ತನ ತ್ರಿವಿಧ ತನುವಿಗೋಸ್ಕರವಾಗಿ
ಇಷ್ಟ ಪ್ರಾಣ ಭಾವಲಿಂಗಸ್ವರೂಪವಾಗಿಹರೆಂದು
ನಿರೂಪಿಸಿದಿರಿ ಸ್ವಾಮಿ.
ಆ ತ್ರಿವಿಧಲಿಂಗದ ಪೂಜೆಯ [ಕ್ರಮವ]
ಕರುಣಿಪುದು ಎನ್ನ ಶ್ರೀಗುರುವೇ.
ಕೇಳೈ ಮಗನೆ:
ಇಷ್ಟಲಿಂಗದ ಪೂಜೆಯ ಮಾಡುವಾಗ ಆ ಇಷ್ಟಲಿಂಗದೊಳಗೆ
ಪ್ರಾಣಲಿಂಗ ಭಾವಲಿಂಗವುಂಟೆಂದು ಭಾವಿಸಿ
ಕರ-ಮನ-ಭಾವದೊಳಗಿರಿಸಿ ಪೂಜಿಸುವುದು ಇಷ್ಟಲಿಂಗದಪೂಜೆ.
ಪ್ರಾಣಲಿಂಗದ ಪೂಜೆಯ ಮಾಡುವಾಗ ಆ ಪ್ರಾಣಲಿಂಗದೊಳಗೆ
ಇಷ್ಟಲಿಂಗ ಭಾವಲಿಂಗವುಂಟೆಂದು ಭಾವಿಸಿ
ಭಾವ-ಮನ-ಕರದೊಳಗಿರಿಸಿ ಪೂಜಿಸುವುದು ಪ್ರಾಣಲಿಂಗದಪೂಜೆ.
ಭಾವಲಿಂಗದ ಪೂಜೆಯ ಮಾಡುವಾಗ ಆ ಭಾವಲಿಂಗದೊಳಗೆ
ಇಷ್ಟಲಿಂಗ ಪ್ರಾಣಲಿಂಗವುಂಟೆಂದು ಭಾವಿಸಿ
ಕರ-ಮನ-ಭಾವದೊಳಗಿರಿಸಿ ಪೂಜಿಸುವುದು ಭಾವಲಿಂಗದಪೂಜೆ.
ಸಾಕ್ಷಿ:
"ಏಕಮೂರ್ತಿಸ್ತ್ರಯೋ ಭಾಗಾಃ ಗುರುರ್ಲಿಂಗಂತು ಜಂಗಮಃ |
ಜಂಗಮಶ್ಚ ಗುರುರ್ಲಿಂಗಂ ತ್ರಿವಿಧಂ ಲಿಂಗಮುಚ್ಯತೇ ||"
ಎಂದುದಾಗಿ, ತ್ರಿವಿಧವು ಒಂದೇ ಎಂದರಿದಾತ
ನಮ್ಮ ಶಾಂತಕೂಡಲಸಂಗಮದೇವ
Transliteration Guruliṅgajaṅgamārcaneya kramava
dayeyinda karuṇipudu svāmi.
Kēḷai magane:
Tānidda ūralli guruvu iddaḍe
nitya tappade daruśanava māḍuvudu.
Gurupūjeya māḍuvāga ā guruvinoḷage
liṅga-jaṅgamavuṇṭendu bhāvisi
tanu-mana-dhanavanoppisi arcisiddude gurupūje.
Liṅgapūjeya māḍuvāga ā liṅgadoḷage
jaṅgama-guruvuṇṭendubhāvisi
tanu-mana-dhanavanoppisi arcisiddude liṅgapūje.
Innu jaṅgamada pūje māḍuvāga
ā jaṅgamadoḷage guru-liṅgavuṇṭendu bhāvisi
tanu-mana-dhanavanoppisi arcisiddude jaṅgamapūje.
Ī trividhamūrti bhaktana trividha tanuvigōskaravāgi
Iṣṭa prāṇa bhāvaliṅgasvarūpavāgiharendu
nirūpisidiri svāmi.
Ā trividhaliṅgada pūjeya [kramava]
karuṇipudu enna śrīguruvē.
Kēḷai magane:
Iṣṭaliṅgada pūjeya māḍuvāga ā iṣṭaliṅgadoḷage
prāṇaliṅga bhāvaliṅgavuṇṭendu bhāvisi
kara-mana-bhāvadoḷagirisi pūjisuvudu iṣṭaliṅgadapūje.
Prāṇaliṅgada pūjeya māḍuvāga ā prāṇaliṅgadoḷage
iṣṭaliṅga bhāvaliṅgavuṇṭendu bhāvisi
bhāva-mana-karadoḷagirisi pūjisuvudu prāṇaliṅgadapūje.
Bhāvaliṅgada pūjeya māḍuvāga ā bhāvaliṅgadoḷage
Iṣṭaliṅga prāṇaliṅgavuṇṭendu bhāvisi
kara-mana-bhāvadoḷagirisi pūjisuvudu bhāvaliṅgadapūje.
Sākṣi:
Ēkamūrtistrayō bhāgāḥ gururliṅgantu jaṅgamaḥ |
jaṅgamaśca gururliṅgaṁ trividhaṁ liṅgamucyatē ||
endudāgi, trividhavu ondē endaridāta
nam'ma śāntakūḍalasaṅgamadēva
