ಧರಣಿಯನಾಳುವ ಅರಸಿಂಗೆ,
ಮಾರಿಯ ಭಯ, ಭೂರಿಯ ಭಯ, ಚೋರ ಭಯ.
ಅಗ್ನಿಯ ಭಯ, ಹಿರಿದಪ್ಪ ಅರಿರಾಯರ ಭಯ.
ಇವೈದು ಭಯಕಂಜಿ, ಅಷ್ಟದಳಮಂಟಪದ ಕೋಣೆಯ
ನೆರೆ ಪೂರ್ವದಿಕ್ಕಿನ ರಾಜ್ಯಕ್ಕೊಳಿತಂ ಬಯಸಿ,
ಅಗ್ನಿಕೋಣೆಯ ರಾಜ್ಯವ ಭಕ್ಷಿಪೆನೆಂದು,
ಯಮ ದಿಕ್ಕಿನ ರಾಜ್ಯವ ಕ್ರೋಧದಲ್ಲುರುಹುವೆನೆಂದು,
ನೈಋತ್ಯ ದಿಕ್ಕಿನ ರಾಜ್ಯವ ಮರತು ಮಲಗಿಸುವೆನೆಂದು,
ವರುಣ ದಿಕ್ಕಿನ ರಾಜ್ಯಕ್ಕೆ ಸತ್ಯವ ಬಯಸಿ,
ವಾಯುವ್ಯ ದಿಕ್ಕಿನ ರಾಜ್ಯವ ಗಾಳಿಗಿಕ್ಕಿ ಹಾರಿಸುವೆನೆಂದು,
ಕುಬೇರ ದಿಕ್ಕಿನ ರಾಜ್ಯಕ್ಕೆ ಧರ್ಮನು ಬಯಸಿ
ಈಶಾನ್ಯ ಕೋಣೆಯ ರಾಜ್ಯದ ಹೆಣ್ಣ ವಿಷಯತೂರ್ಯದಲ್ಲಿ
ದಳೆಯ ಹಿಡಿವೆನೆಂದು,
ಅಷ್ಟದಿಕ್ಕಿನ ರಾಜ್ಯದ ನಟ್ಟನಡುವೆ ಕಷ್ಟಬಡುತಿರ್ಪ
ಅರಸಿನ ಕಳವಳಿಕೆ; ಬುದ್ಧಿಗುಡುವ ಮಂತ್ರಿ,
ಕಪಿಚಾಷ್ಠಿ ತಂತ್ರಿ, ತಾಮಸಬುದ್ಧಿ ದಳವಾಯಿಗಳು,
ದಶಗುಣಿಗಳು ಮನ್ನೆಯ ನಾಯಕರು,
ಮದಡರು ಪಾಯದಳ.
ಪರಿಯಾಟಗೊಳಿಸುವ ಅರಸಿನ
ಪ್ರಜೆ ಪರಿವಾರ ಮಂತ್ರಿಮನ್ನೆಯರನೆಲ್ಲ
ಕೈಸೆರೆಯ ಹಿಡಿದು ಆಳುವ ಅಂಗನೆ
ರಾಜ್ಯಾಧಿಪತಿಯಾದುದೇನು ಚೋದ್ಯ ಹೇಳಾ!
ಪರಮಗುರು ಪಡುವಿಡಿ ಸಿದ್ಧಮಲ್ಲಿನಾಥಪ್ರಭುವೆ.
Transliteration Dharaṇiyanāḷuva arasiṅge,
māriya bhaya, bhūriya bhaya, cōra bhaya.
Agniya bhaya, hiridappa arirāyara bhaya.
Ivaidu bhayakan̄ji, aṣṭadaḷamaṇṭapada kōṇeya
nere pūrvadikkina rājyakkoḷitaṁ bayasi,
agnikōṇeya rājyava bhakṣipenendu,
yama dikkina rājyava krōdhadalluruhuvenendu,
nai'r̥tya dikkina rājyava maratu malagisuvenendu,
varuṇa dikkina rājyakke satyava bayasi,
vāyuvya dikkina rājyava gāḷigikki hārisuvenendu,
kubēra dikkina rājyakke dharmanu bayasi
īśān'ya kōṇeya rājyada heṇṇa viṣayatūryadalli
daḷeya hiḍivenendu,
Aṣṭadikkina rājyada naṭṭanaḍuve kaṣṭabaḍutirpa
arasina kaḷavaḷike; bud'dhiguḍuva mantri,
kapicāṣṭhi tantri, tāmasabud'dhi daḷavāyigaḷu,
daśaguṇigaḷu manneya nāyakaru,
madaḍaru pāyadaḷa.
Pariyāṭagoḷisuva arasina
praje parivāra mantrimanneyaranella
kaisereya hiḍidu āḷuva aṅgane
rājyādhipatiyādudēnu cōdya hēḷā!
Paramaguru paḍuviḍi sid'dhamallināthaprabhuve.
