ಅನ್ನಮಯ ಪ್ರಾಣಮಯ ಮನೋಮಯ
ವಿಜ್ಞಾನಮಯ ಆನಂದಮಯ
ಎಂಬ ಪಂಚಕೋಶ ಕೆಡುವುದಕ್ಕೆ ವಿವರ:
ಸರ್ವಪದಾರ್ಥವನು ಸಾವಧಾನ ಮುಖದಲ್ಲಿ
ಲಿಂಗಾರ್ಪಿತ ಮಾಡಿ
ಲಿಂಗ ಭೋಗೋಪಭೋಗಿಯಾದಲ್ಲಿ ಅನ್ನಮಯಕೋಶ ಕೆಟ್ಟಿತ್ತು.
ಪ್ರಾಣಮಯ ಲಿಂಗಾಂಗವಾಗಿ ಲಿಂಗಪ್ರಾಣಿಯಾದಲ್ಲಿ
ಪ್ರಾಣಮಯಕೋಶ ಕೆಟ್ಟಿತ್ತು.
ಮನೋಮಧ್ಯದಲ್ಲಿ ಲಿಂಗದ ನೆನಹು ನೆಲೆಗೊಂಡು
ಮನವೆ ಲಿಂಗವಾದಲ್ಲಿ ಮನೋಮಯಕೋಶ ಕೆಟ್ಟಿತ್ತು.
ಸುಜ್ಞಾನ ಪರಿಪೂರ್ಣವಾಗಿ ಜ್ಞಾನ ಜ್ಞೇಯಂಗಳೆರಡೂ ಒಂದಾದಲ್ಲಿ
ವಿಜ್ಞಾನಮಯಕೋಶ ಕೆಟ್ಟಿತ್ತು.
ಪರಮಾನಂದ ಪದದಲ್ಲಿ ಓಲಾಡುತ್ತ ಆ ಶಿವಾನಂದದಲ್ಲಿ
ಇರಲಿಕ್ಕಾಗಿ ಆನಂದಮಯಕೋಶ ಕೆಟ್ಟಿತ್ತು.
ಇಂತೀ ಪಂಚಕೋಶ ಪ್ರಕೃತಿಗುಣ ಕೆಟ್ಟು ಲಿಂಗಗುಣ ನಿಂದುದು,
ನಿಜಗುರು ಸ್ವತಂತ್ರಸಿದ್ಧಲಿಂಗೇಶ್ವರ, ನಿಮ್ಮ ಶರಣಂಗೆ.
Transliteration Annamaya prāṇamaya manōmaya
vijñānamaya ānandamaya
emba pan̄cakōśa keḍuvudakke vivara:
Sarvapadārthavanu sāvadhāna mukhadalli
liṅgārpita māḍi
liṅga bhōgōpabhōgiyādalli annamayakōśa keṭṭittu.
Prāṇamaya liṅgāṅgavāgi liṅgaprāṇiyādalli
prāṇamayakōśa keṭṭittu.
Manōmadhyadalli liṅgada nenahu nelegoṇḍu
manave liṅgavādalli manōmayakōśa keṭṭittu.
Sujñāna paripūrṇavāgi jñāna jñēyaṅgaḷeraḍū ondādalli
vijñānamayakōśa keṭṭittu.
Paramānanda padadalli ōlāḍutta ā śivānandadalli
iralikkāgi ānandamayakōśa keṭṭittu.
Intī pan̄cakōśa prakr̥tiguṇa keṭṭu liṅgaguṇa nindudu,
nijaguru svatantrasid'dhaliṅgēśvara, nim'ma śaraṇaṅge.
