ಪದಾರ್ಥದ ಪೂರ್ವವ ಕಳೆದಲ್ಲದೆ ಹಿಡಿಯಬಾರದು.
ಮುಟ್ಟಿ ಕೊಡಬಾರದು. ಮುಟ್ಟದೆ ಕೊಡಬಾರದು.
ಅಂದೆಂತೆಂದೆಡೆ:
ತನ್ನ ಹಸ್ತದೊಳಗೆ ಲಿಂಗದ ಹಸ್ತವ ಕೂಡಿ
ಮುಟ್ಟದೆ ಮುಟ್ಟಿಸುವ ಕ್ರಮವನರಿದು ಕೊಡಬೇಕು.
ರುಚಿಗಳ ತಾನರಿದು ಕೊಡಬಾರದು.
ತಾನರಿಯದೆ ಕೊಡಬಾರದು.
ಅದೆಂತೆಂದಡೆ:
ತನ್ನ ಜಿಹ್ವೆಯಲ್ಲಿ ಲಿಂಗದ ಜಿಹ್ವೆಯ ಕೂಡಿ ರುಚಿಗಳನರ್ಪಿಸುವ
ಕ್ರಮವನರಿದು ಕೊಡಬೇಕು.
ಅನರ್ಪಿತವ ಸೋಂಕಬಾರದು.
ಅರ್ಪಿತಕ್ಕೆ ಬಂದುದ ನೂಕಬಾರದು.
ಇಂತಿವರ ವಿಚಾರವನರಿದು ಅರ್ಪಿಸಿ
ಪ್ರಸಾದವ ಭೋಗಿಸುವಾತನೆ,
ನಿಜಗುರು ಸ್ವತಂತ್ರಸಿದ್ಧಲಿಂಗೇಶ್ವರನಲ್ಲಿ
ಸರ್ವ ಸುಯಿಧಾನಿ.
Transliteration Padārthada pūrvava kaḷedallade hiḍiyabāradu.
Muṭṭi koḍabāradu. Muṭṭade koḍabāradu.
Andentendeḍe:
Tanna hastadoḷage liṅgada hastava kūḍi
muṭṭade muṭṭisuva kramavanaridu koḍabēku.
Rucigaḷa tānaridu koḍabāradu.
Tānariyade koḍabāradu.
Adentendaḍe:
Tanna jihveyalli liṅgada jihveya kūḍi rucigaḷanarpisuva
kramavanaridu koḍabēku.
Anarpitava sōṅkabāradu.
Arpitakke banduda nūkabāradu.
Intivara vicāravanaridu arpisi
prasādava bhōgisuvātane,
nijaguru svatantrasid'dhaliṅgēśvaranalli
sarva suyidhāni.
