ಪ್ರಾಣಲಿಂಗ ಪ್ರಾಣಲಿಂಗವೆಂಬರು,
ಪ್ರಾಣಲಿಂಗವೆಂಬುದಾರಿಗುಂಟಯ್ಯಾ?
ಮೂವರಿಗೆ ಹುಟ್ಟಿದ ಲಿಂಗವು
ತನ್ನ ಪ್ರಾಣಲಿಂಗವಾದ ಪರಿಯಿನ್ನೆಂತೊ?
ವಸುಧೆಗೆ ಹುಟ್ಟಿದ ಲಿಂಗವನು ವಶಕ್ಕೆ ತಂದು,
ತನ್ನ ದೆಸೆಯಲ್ಲಿ ನಿಲಿಸುವ ಪರಿಯಿನ್ನೆಂತೊ?
ಭೂಮಿಗೆ ಹುಟ್ಟಿ ಶಿಲೆಯಾದ,
ಕಲುಕುಟಿಗ ಮುಟ್ಟಿ ರೂಪಾದ,
ಗುರುಮುಟ್ಟಿ ತೇಜವಾದ.
ಹಿಂದೆ ಮುಟ್ಟಿದವರಿಗೆಲ್ಲ
ಪ್ರಾಣಲಿಂಗವಾದ ಪರಿಯಿನ್ನೆಂತೊ?
ತನ್ನ ಪ್ರಾಣ ಮುಂದೆ ಹೋಗಿ ಲಿಂಗ ಹಿಂದುಳಿದಡೆ
ಪ್ರಾಣ ಲಿಂಗವಾದ ಪರಿಯಿನ್ನೆಂತೊ?
ಹಸಿವು ತೃಷೆ ವಿಷಯ ನಿದ್ರೆ ಜಾಡ್ಯ,
ಇಂತಿವೆಲ್ಲವನತಿಗಳೆದು ನಿರ್ಮಲದೇಹಿಯಾಗಿ
ಹೃದಯಕಮಲದೊಳು ವಿಮಲವಪ್ಪ ಶ್ರೀಗುರುಮೂರ್ತಿ,
ಪರಂಜ್ಯೋತಿ ಎಂದೆನಿಸುವ ಲಿಂಗವ,
ಮಲಿನವಿಡಿಯದ ಕಾಯದ ಸೆಜ್ಜೆಯೊಳು
ದೃಢದೊಳ್ಬಿಜಯಂಗೈಸಿ,
ಸಪ್ತಧಾತು ಅಷ್ಟಮದವಿಲ್ಲದೆ ಜ್ಞಾನದೋಗರವನರ್ಪಿಸಿ,
ಸುಜ್ಞಾನಬುದ್ಧಿಯೊಳು ಪ್ರಸಾದವ ಸ್ವೀಕಾರವ ಮಾಡಿ,
ನಿತ್ಯಸುಖಿಯಾಗಿ ಆಡುತಿಪ್ಪ.
ಇದು ಕಾರಣ, ಕೂಡಲಚೆನ್ನಸಂಗಯ್ಯನಲ್ಲಿ
ಬಸವಣ್ಣನೊಬ್ಬನೆ ಪ್ರಾಣಲಿಂಗ ಸಂಬಂಧಿ.
ಪ್ರಾಕ್‍ಶುದ್ಧಿಗಳೆಲ್ಲ
ಲಿಂಗಲಾಂಛನಧಾರಿಗಳೆಂದೆನಿಸುವರು.
Transliteration Prāṇaliṅga prāṇaliṅgavembaru,
prāṇaliṅgavembudāriguṇṭayyā?
Mūvarige huṭṭida liṅgavu
tanna prāṇaliṅgavāda pariyinnento?
Vasudhege huṭṭida liṅgavanu vaśakke tandu,
tanna deseyalli nilisuva pariyinnento?
Bhūmige huṭṭi śileyāda,
kalukuṭiga muṭṭi rūpāda,
gurumuṭṭi tējavāda.
Hinde muṭṭidavarigella
prāṇaliṅgavāda pariyinnento?
Tanna prāṇa munde hōgi liṅga hinduḷidaḍe
Prāṇa liṅgavāda pariyinnento?
Hasivu tr̥ṣe viṣaya nidre jāḍya,
intivellavanatigaḷedu nirmaladēhiyāgi
hr̥dayakamaladoḷu vimalavappa śrīgurumūrti,
paran̄jyōti endenisuva liṅgava,
malinaviḍiyada kāyada sejjeyoḷu
dr̥ḍhadoḷbijayaṅgaisi,
saptadhātu aṣṭamadavillade jñānadōgaravanarpisi,
sujñānabud'dhiyoḷu prasādava svīkārava māḍi,
nityasukhiyāgi āḍutippa.
Idu kāraṇa, kūḍalacennasaṅgayyanalli
basavaṇṇanobbane prāṇaliṅga sambandhi.
Prākśud'dhigaḷella
liṅgalān̄chanadhārigaḷendenisuvaru.
