ಭಕ್ತನಾಗಿ ಬಯಕೆಯ ಮಾಡಿ
ನೋಡುವದು ಭಕ್ತಿಯ ಸ್ಥಲವಲ್ಲ.
ಬಯಸಿ ಮಾಡುವುದೆ ಭಕ್ತಿಯ ಕೇಡು.
ಕೂಡಿಸಿ ಮಾಡುವುದೆ [ಕೂಡಿದ ಕೇಡು]
[ಸಾಯಸ]ವಿಲ್ಲದೆ ಸಮತೆಯ ಮಾಡಿ,
ಬೋನವ ನೀಡಿಹೆನೆಂಬುದು ಸಜ್ಜನತ್ವದ ಕೇಡು.
ಇಂಥ ಬಯಕೆಯ ಮಾಡಿ ನೀಡುವವನ ಭಕ್ತಿ
ಬರಿಯ ಮಡಕೆಯನಟ್ಟು ಹೊರಗೆ
ಹುಲಿಯೇದಿಸಿದಂತಾಯಿತ್ತು? ಕಾಣಾ.
ಅವನು ಭಕ್ತಿ ಜಪತಪ ನೇಮನಿತ್ಯ ಅನುಷ್ಠಾನಾರ್ಚನೆ
ಷೋಡಶ ಉಪಚಾರವ ಮಾಡಿ ಮುಕ್ತಿಯ ಪಡೆದೆನೆಂದು
ಗುರುವಿನಲ್ಲಿ ಆಜ್ಞೆಯ ಮಾಡಿಕೊಂಡು,
ಸಮಯಾಚಾರಕ್ಕೆ ಜಂಗಮದೇವರ ತಂದು,
ಪ್ರಸಾದ ಕೃತ್ಯವೆಂದು ಕಟ್ಟು ಮಾಡಿ ತನ್ನಲ್ಲಿ ಇಟ್ಟುಕೊಂಡು
ಆಯತದ ಅಗ್ಘವಣಿ ಆಯತವೆಂದು ಮಾಡುವನ್ನಕ್ಕ [ಶೀಲವೆ?]
ಆ ಜಂಗಮದೇವರ ತಂದು ತನ್ನ ಮನೆಯಲ್ಲಿಟ್ಟುಕೊಂಡು,
ಆ ಜಂಗಮಕ್ಕೆ ಇಚ್ಛಾಭೋಜನವ ನೀಡಿ ತೃಪ್ತಿಯಂ ಬಡಿಸಿ,
ಮುಂದೆ ಕೃತ್ಯವ ಮಾಡುವುದೇ ಸತ್ಯ ಸದಾಚಾರ ಶೀಲ,
ಧರ್ಮದ ನಡೆ ಧರ್ಮದ ನುಡಿ.
ಇದು ತಪ್ಪದೇ ಒಪ್ಪುದು ಕಾಣಾ.
ಇದರ ಅಂತುವನರಿಯದೆ,
ತನ್ನ ಮನೆಯ ಆಯತದ ಬೋನವಾಗುವನ್ನಕ್ಕ
ಆ ಜಂಗಮದೇವರ ಹಸಿದು ಬಳಲಿಸು ಎಂದು
ಆಯತವ ಕಟ್ಟಿಕೊಟ್ಟನೆ ನಿಮ್ಮ ಗುರುನಾಥನು?
ಇಂಥ ಕಟ್ಟಳೆಯ ಕಟ್ಟಿದಾತ ಗುರುವಲ್ಲ,
ಕಟ್ಟಿಕೊಂಡಾತ ಭಕ್ತನಲ್ಲ, ಭವಿ.
ಇಂತೀ ಗುರುವಲ್ಲ ನರನು, ಇಂತಿವರು ಭಕ್ತರಲ್ಲ.
ಒಲಿದು ಭಕ್ತಿಯ ಮಾಡಿಹನೆಂದು
ಭಕ್ತನ ಅಂತವನರಿಯದೆ ಮುಂದುಗಾಣದೆ
ಕೃತ್ಯವ ಕಟ್ಟುವ ಗುರುವಿಗೆ ಮುಂದೆಬಹ ನರಕ
ಇವರಿಗೆ ಇಂದೇ ಅಘೋರನರಕ ಕಾಣಾ
ಮಹಾದಾನಿ ಕೂಡಲಚೆನ್ನಸಂಗಮದೇವಯ್ಯಾ.
Transliteration Bhaktanāgi bayakeya māḍi
nōḍuvadu bhaktiya sthalavalla.
Bayasi māḍuvude bhaktiya kēḍu.
Kūḍisi māḍuvude [kūḍida kēḍu]
[sāyasa]villade samateya māḍi,
bōnava nīḍ'̔ihenembudu sajjanatvada kēḍu.
Intha bayakeya māḍi nīḍuvavana bhakti
bariya maḍakeyanaṭṭu horage
huliyēdisidantāyittu? Kāṇā.
Avanu bhakti japatapa nēmanitya anuṣṭhānārcane
ṣōḍaśa upacārava māḍi muktiya paḍedenendu
guruvinalli ājñeya māḍikoṇḍu,
Samayācārakke jaṅgamadēvara tandu,
prasāda kr̥tyavendu kaṭṭu māḍi tannalli iṭṭukoṇḍu
āyatada agghavaṇi āyatavendu māḍuvannakka [śīlave?]
Ā jaṅgamadēvara tandu tanna maneyalliṭṭukoṇḍu,
ā jaṅgamakke icchābhōjanava nīḍi tr̥ptiyaṁ baḍisi,
munde kr̥tyava māḍuvudē satya sadācāra śīla,
dharmada naḍe dharmada nuḍi.
Idu tappadē oppudu kāṇā.
Idara antuvanariyade,
tanna maneya āyatada bōnavāguvannakka
ā jaṅgamadēvara hasidu baḷalisu endu
āyatava kaṭṭikoṭṭane nim'ma gurunāthanu?
Intha kaṭṭaḷeya kaṭṭidāta guruvalla,
kaṭṭikoṇḍāta bhaktanalla, bhavi.
Intī guruvalla naranu, intivaru bhaktaralla.
Olidu bhaktiya māḍ'̔ihanendu
bhaktana antavanariyade mundugāṇade
kr̥tyava kaṭṭuva guruvige mundebaha naraka
ivarige indē aghōranaraka kāṇā
mahādāni kūḍalacennasaṅgamadēvayyā.
