ಶ್ರೀಗುರುಕಾರುಣ್ಯವ ಪಡೆದು ಲಿಂಗಸ್ವಾಯತವಾದ ಬಳಿಕ
ಸರ್ವಾಂಗಲಿಂಗಮೂರ್ತಿ ಪರಶಿವನು.
ಇನ್ನು ಮತ್ತೆ ಸಾಮಾನ್ಯಕ್ರೀಯ ವರ್ತಿಸುವ
ಅಜ್ಞಾನಿಗಳನು ಏನೆಂದೆನ್ನಬಹುದಯ್ಯಾ?
ಹೃದಯ ಭ್ರೂಮಧ್ಯ ಬ್ರಹ್ಮರಂಧ್ರದಲ್ಲಿ ಶಿವನಿಪ್ಪನು.
ಇಡಾ ಪಿಂಗಲಾ ಸುಷುಮ್ನಾ ನಾಡಿಯಲ್ಲಿ
ಪ್ರಾಣವಾಯುಗಳಡಸಿಕೊಂಡು ಹೋಗಿ
ಕೂಡಿ ಒಂದಪ್ಪ ಆಯಸವ ನೋಡಾ.
ಬಹಿರಂಗದಲ್ಲಿ ಮುಕ್ತಿಕ್ಷೇತ್ರಂಗಳ ಹೊಕ್ಕು
ಲಿಂಗದರ್ಶನ ಸ್ಪರ್ಶನಯುಕ್ತರ ಆಯಸವ ನೋಡಾ.
ಶಿವ ಶಿವ ಶ್ರೀಗುರು ಸಾಮಾನ್ಯವೇ?
ಸಾಮಾನ್ಯವಾಗಿ ಕಾಣಲಹುದೆ?
ಇಹಿಂಗೆ ಜ್ಞಾನ? ಈ ಪರಿಯ ಕೇಳುವುದೆ?
ಅದೃಷ್ಟವ ದೃಷ್ಟಮಾಡಿ ಕೊಟ್ಟನು ಶ್ರೀಗುರು.
ಅಪವಿತ್ರೋದಕ, ಗಂಗೆಯ ಕೂಡಿ ಗಂಗೆಯಾಯಿತ್ತು ನೋಡಿರಿ,
ಕಾಷ್ಠ, ಅಗ್ನಿಯ ಕೂಡಿ ಅಗ್ನಿಯಾಯಿತ್ತು ನೋಡಿರಿ,
ಸದ್ಭಕ್ತನು ಲಿಂಗವ ಕೂಡಿ ಲಿಂಗವಾದನು.
'ನಗರೀನಿರ್ಜರಾದ್ಯಂಬು ಗಂಗಾಂ ಪ್ರಾಪ್ಯ ಯಥಾ ತಥಾ
ದೀಕ್ಷಾಯೋಗಾತ್ತಥಾ ಶಿಷ್ಯಃ ಶೂದ್ರೋ[s]ಪಿ ಶಿವತಾಂ ವ್ರಜೇತ್
ಭಕ್ತದೇಹೀ ಮಹಾದೇವೋ ತದ್ದೇಹೋ ಲಿಂಗಮೇವ ಚ
ಅಂತರ್ಬಹಿಶ್ಚ ಲಿಂಗಂ ಚ ಸರ್ವಾಂಗಂ ಲಿಂಗಮೇವ ಚ'
ಇಂತೆಂದುದಾಗಿ, ಇನ್ನು ಸಂದೇಹ ಬೇಡ.
ಶ್ರೀಗುರುಕಾರುಣ್ಯದಿಂದ ಲಿಂಗವ ಧರಿಸಿ
ಲಿಂಗಾರ್ಚನೆಯ ಮಾಡಿ ಸರ್ವಾಂಗಲಿಂಗವಾಗಿಪ್ಪುದಯ್ಯಾ
ಉರಿಲಿಂಗಪೆದ್ದಿಪ್ರಿಯ ವಿಶ್ವೇಶ್ವರಾ.
Transliteration Śrīgurukāruṇyava paḍedu liṅgasvāyatavāda baḷika
sarvāṅgaliṅgamūrti paraśivanu.
Innu matte sāmān'yakrīya vartisuva
ajñānigaḷanu ēnendennabahudayyā?
Hr̥daya bhrūmadhya brahmarandhradalli śivanippanu.
Iḍā piṅgalā suṣumnā nāḍiyalli
prāṇavāyugaḷaḍasikoṇḍu hōgi
kūḍi ondappa āyasava nōḍā.
Bahiraṅgadalli muktikṣētraṅgaḷa hokku
liṅgadarśana sparśanayuktara āyasava nōḍā.
Śiva śiva śrīguru sāmān'yavē?
Sāmān'yavāgi kāṇalahude?
Ihiṅge jñāna? Ī pariya kēḷuvude?
Adr̥ṣṭava dr̥ṣṭamāḍi koṭṭanu śrīguru.
Apavitrōdaka, gaṅgeya kūḍi gaṅgeyāyittu nōḍiri,
kāṣṭha, agniya kūḍi agniyāyittu nōḍiri,
sadbhaktanu liṅgava kūḍi liṅgavādanu.
'Nagarīnirjarādyambu gaṅgāṁ prāpya yathā tathā
dīkṣāyōgāttathā śiṣyaḥ śūdrō[s]pi śivatāṁ vrajēt
bhaktadēhī mahādēvō taddēhō liṅgamēva ca
antarbahiśca liṅgaṁ ca sarvāṅgaṁ liṅgamēva ca'
intendudāgi, innu sandēha bēḍa.
Śrīgurukāruṇyadinda liṅgava dharisi
Liṅgārcaneya māḍi sarvāṅgaliṅgavāgippudayyā
uriliṅgapeddipriya viśvēśvarā.
