ಅಖಂಡ ಗೋಳಕಾಕಾರ ಮಹಾಲಿಂಗದ ಪೂಜೆ ಎಂತೆಂದಡೆ:
ಸದ್ಯೋಜಾತಮುಖದಿಂದಾದ ಪೃಥ್ವಿ
ಲಿಂಗಕ್ಕೆ ಪತ್ರಿ ಪುಷ್ಪ ಬೇಕೆಂದು
ಅನಂತ ಪತ್ರಿ ಪುಷ್ಪಗಳಿಂದ ಅರ್ಚಿಸುತ್ತಿಹುದು.
ವಾಮದೇವಮುಖದಿಂದಾದಪ್ಪು
ಲಿಂಗಕ್ಕೆ ಮಜ್ಜನಕ್ಕೆರೆಯಬೇಕೆಂದು
ಸಪ್ತಸಮುದ್ರ ದಶಗಂಗೆಗಳ ಕುಂಭವ ಮಾಡಿ,
ಕೆರೆ ಬಾವಿಗಳ ಪಂಚಪಾತ್ರೆಯ ಮಾಡಿ,
ಮಜ್ಜನ ನೀಡಿಸುತ್ತಿಹುದು.
ಅಘೋರಮುಖದಿಂದಾದ ಅಗ್ನಿ
ಲಿಂಗಕ್ಕೆ ಧೂಪ ದೀಪ ಆರತಿಗಳಾಗಬೇಕೆಂದು,
ಕಾಷ್ಠದಲ್ಲಿ ಪಾಷಾಣದಲ್ಲಿ ಬೆಳಗುತ್ತಿಹುದು.
ತತ್ಪುರುಷಮುಖದಿಂದಾದ ವಾಯು
ಲಿಂಗಕ್ಕೆ ಜಪವ ಮಾಡುತ್ತಿಹುದು.
ಈಶಾನ್ಯ ಮುಖದಿಂದಾದ ಆಕಾಶ
ಲಿಂಗಕ್ಕೆ ಭೇರಿ ಮೊದಲಾದ ನಾದಂಗಳ ಬಾರಿಸುತ್ತಿಹುದು.
ಗೋಪ್ಯಮುಖದಿಂದಾದ ಆತ್ಮನು ಲಿಂಗಕ್ಕೆ ಸಿಂಹಾಸನವಾಗಿರ್ಪುದು.
ಮನ ಚಕ್ಷುವಿನಿಂದಾದ ಚಂದ್ರ-ಸೂರ್ಯರು ದೀವಿಗೆಯಾಗಿಹರು.
ಇಂತಪ್ಪ ಘನವಸ್ತು ಎರಡಾಗಿ
ತನ್ನ ವಿನೋದಕ್ಕೆ ಅರ್ಪಿಸಿಕೊಂಬಾತನು ತಾನೇ,
ಅರ್ಪಿಸುವಾತನು ತಾನೇ.
ಇಂತಪ್ಪ ಘನಲಿಂಗವು ಕರಸ್ಥಲದೊಳಗೆ
ಚುಳುಕಾಗಿ ನಿಂದ ನಿಲವ ಎನ್ನೊಳರುಹಿದಾತ
ನಮ್ಮ ಶಾಂತಕೂಡಲಸಂಗಮದೇವ
Transliteration Akhaṇḍa gōḷakākāra mahāliṅgada pūje entendaḍe:
Sadyōjātamukhadindāda pr̥thvi
liṅgakke patri puṣpa bēkendu
ananta patri puṣpagaḷinda arcisuttihudu.
Vāmadēvamukhadindādappu
liṅgakke majjanakkereyabēkendu
saptasamudra daśagaṅgegaḷa kumbhava māḍi,
kere bāvigaḷa pan̄capātreya māḍi,
majjana nīḍisuttihudu.
Aghōramukhadindāda agni
liṅgakke dhūpa dīpa āratigaḷāgabēkendu,
kāṣṭhadalli pāṣāṇadalli beḷaguttihudu.
Tatpuruṣamukhadindāda vāyu
liṅgakke japava māḍuttihudu.
Īśān'ya mukhadindāda ākāśa
Liṅgakke bhēri modalāda nādaṅgaḷa bārisuttihudu.
Gōpyamukhadindāda ātmanu liṅgakke sinhāsanavāgirpudu.
Mana cakṣuvinindāda candra-sūryaru dīvigeyāgiharu.
Intappa ghanavastu eraḍāgi
tanna vinōdakke arpisikombātanu tānē,
arpisuvātanu tānē.
Intappa ghanaliṅgavu karasthaladoḷage
cuḷukāgi ninda nilava ennoḷaruhidāta
nam'ma śāntakūḍalasaṅgamadēva
