ಗೃಹ ಗ್ರಾಮ ನಾಡು ದೇಶಂಗಳೆಂಬ ಭೂಮಿಯ
ಆಗು_ಚೇಗೆಯ ರಾಗ_ದ್ವೇಷ,
ಮರಳಿ ಭೂಮಿಯ ಆಶೆ, ಅಲ್ಪಭೂಮಿಯ ಆಶೆ.
ಅಲ್ಪಭೂಮಿ ಅಲ್ಪಂಗಲ್ಲದೆ
ಪಂಚಾಶತಕಕೋಟಿ ಯೋಜನ ಭೂಮಿಯನೂ ಒಳಕೊಂಡ ಬ್ರಹ್ಮಾಂಡ
ಅಂತಹ ಬ್ರಹ್ಮಾಂಡವನೇಕವನೂ
ಆಭರಣವ ಮಾಡಿಯಿಟ್ಟುಕೊಂಡಿಪ್ಪ,
ಅಂತಹ ಆಭರಣದಿಂದ ಪೂಜೆಗೊಂಡಿಪ್ಪ,
ಲಿಂಗವೇ ಪ್ರಾಣವಾಗಿ ಭೂಮಿಯಲ್ಲಿ ನಿಂದ ಲಿಂಗೈಕ್ಯಂಗೆ
ಭೂಮಿಯ ಚಿಂತೆ ಇನ್ನೆಲ್ಲಿಯದೋ? ಕಾಣೆ.
ಕೋಟಿ ಕ್ಷಿತಿಪರಿಯಂತರ ಧನದಾಗುನಿರೋಧ
ಆಗುಚೇಗೆಯ ನಿರೋಧಸುಖದುಃಖ ತನುಮನಧನಕಾಂಕ್ಷೆ ಅಲ್ಪಂಗಲ್ಲದೆ
ಮಹಾಲಕ್ಷ್ಮಿಯೊಡೆಯನಾಗಿ, ಮಹದೈಶ್ವರ್ಯಸಂಪನ್ನನಾಗಿ,
ಹಿರಣ್ಯಪತಿಯೇ ಪ್ರಾಣವಾಗಿ, ಹಿರಣ್ಯಪತಿಯೇ ಕಾಯವಾದ
ಮಹಾಲಿಂಗೈಕ್ಯಂಗೆ ಧನದ ಚಿಂತೆ ಇನ್ನೆಲ್ಲಿಯದು?
ಉತ್ತಮ ಮಧ್ಯಮ ಕನಿಷ್ಠ ನಿಕೃಷ್ಟ
ಹಸ್ತಿನಿ ಚಿತ್ತಿನಿ ಶಂಕಿನಿ ಪದ್ಮಿನಿಯರೆಂಬ ನಾಲ್ಕು ತೆರದ ಸ್ತ್ರೀಯರ ಸಂಗ;
ಪಾತರ, ದಾಸಿ, ವೇಶ್ಯಾಗಮನ, ಪರಸ್ತ್ರೀ ಪರಸಂಗ
ಅವಿಚಾರ ಅನ್ಯಜಾತಿಯ ಸಂಗ ಇವುಗಳಿಗಾಶಿಸುವ
ಕ್ರೂರಾತ್ಮಂಗೆ ಹೆಣ್ಣಿನ ಚಿಂತೆಯಲ್ಲದೆ,
ಇಚ್ಛಾಶಕ್ತಿ ಜ್ಞಾನಶಕ್ತಿ ಕ್ರಿಯಾಶಕ್ತಿಯ ವರ್ತನೆಯ ಮೀರಿ
ಮಹಾಶಕ್ತಿ ತಾನಾಗಿ(ಹ) ಮಹಾಪುರುಷನಲ್ಲಿ
ಮಹಾಸಂಗವಾದ ಮಹಾಶರಣಂಗೆ ಹೆಣ್ಣಿನ ಚಿಂತೆ ಇನ್ನೆಲ್ಲಿಯದೋ?
ವೇದಶಾಸ್ತ್ರ ಪುರಾಣಾಗಮಾದಿಯಾಗಿ
ಅಷ್ಟಾದಶವಿದ್ಯಂಗಳನೋದುವ ಕೇಳುವ ವಿಚಾರಿಸುವ ತಿಳಿವ
ವಿದ್ಯದ ಚಿಂತೆ ಅಲ್ಪಮತಿಯ ಅಲ್ಪಂಗಲ್ಲದೆ
ವಾಗ್ದೇವತೆಗೆ ಅಧಿದೈವಮಪ್ಪ ಮಹಾವಿದ್ಯೆಯೇ ದೇಹವಪ್ಪ
ವಿದ್ಯಾರೂಪ ಮಹಾದೇವನೇ ಪ್ರಾಣವಾಗಿ, ಮಹಾದೇವನೇ ಕಾಯವಾಗಿ ಮಹಾದೇವನೇ
ಜಿಹ್ವೆಯಾಗಿ, ಮಹಾದೇವನೇ ಮನವಾಗಿಹ
ಮಹಾಲಿಂಗೈಕ್ಯಂಗೆ ಇನ್ನುಳಿದ ಚಿಂತೆ ಇನ್ನೆಲ್ಲಿಯದೋ?
ಭಕ್ತಕಾಯ ಶಿವನಾಗಿ ಶಿವನೇ ಪ್ರಾಣವಾಗಿ ನಿಂದ ಸದ್ಭಕ್ತಂಗೆ
ಆವ ಚಿಂತೆಯೂ ಇಲ್ಲ, ಆತ ನಿಶ್ಚಿಂತ, ಪರಮಸುಖಪರಿಣಾಮಿ
ಸತ್ಯನು ನಿತ್ಯನು ಉರಿಲಿಂಗಪೆದ್ದಿಪ್ರಿಯ ವಿಶ್ವೇಶ್ವರ.
Transliteration Gr̥ha grāma nāḍu dēśaṅgaḷemba bhūmiya
āgu_cēgeya rāga_dvēṣa,
maraḷi bhūmiya āśe, alpabhūmiya āśe.
Alpabhūmi alpaṅgallade
pan̄cāśatakakōṭi yōjana bhūmiyanū oḷakoṇḍa brahmāṇḍa
antaha brahmāṇḍavanēkavanū
ābharaṇava māḍiyiṭṭukoṇḍippa,
antaha ābharaṇadinda pūjegoṇḍippa,
Liṅgavē prāṇavāgi bhūmiyalli ninda liṅgaikyaṅge
bhūmiya cinte innelliyadō? Kāṇe.
Kōṭi kṣitipariyantara dhanadāgunirōdha
āgucēgeya nirōdhasukhaduḥkha tanumanadhanakāṅkṣe alpaṅgallade
mahālakṣmiyoḍeyanāgi, mahadaiśvaryasampannanāgi,
hiraṇyapatiyē prāṇavāgi, hiraṇyapatiyē kāyavāda
mahāliṅgaikyaṅge dhanada cinte innelliyadu?
Uttama madhyama kaniṣṭha nikr̥ṣṭa
Hastini cittini śaṅkini padminiyaremba nālku terada strīyara saṅga;
pātara, dāsi, vēśyāgamana, parastrī parasaṅga
avicāra an'yajātiya saṅga ivugaḷigāśisuva
krūrātmaṅge heṇṇina cinteyallade,
icchāśakti jñānaśakti kriyāśaktiya vartaneya mīri
mahāśakti tānāgi(ha) mahāpuruṣanalli
Mahāsaṅgavāda mahāśaraṇaṅge heṇṇina cinte innelliyadō?
Vēdaśāstra purāṇāgamādiyāgi
aṣṭādaśavidyaṅgaḷanōduva kēḷuva vicārisuva tiḷiva
vidyada cinte alpamatiya alpaṅgallade
vāgdēvatege adhidaivamappa mahāvidyeyē dēhavappa
vidyārūpa mahādēvanē prāṇavāgi, mahādēvanē kāyavāgiMahādēvanē
jihveyāgi, mahādēvanē manavāgiha
mahāliṅgaikyaṅge innuḷida cinte innelliyadō?
Bhaktakāya śivanāgi śivanē prāṇavāgi ninda sadbhaktaṅge
āva cinteyū illa, āta niścinta, paramasukhapariṇāmi
satyanu nityanu uriliṅgapeddipriya viśvēśvara.
