ತಾ ಗುರುವಾಹಾಗ ತನ್ನ ಗುರುವ ತಾನರಿತು,
ತನಗೆ ಇಹದಲ್ಲಿ ಸುಖ,
ತನ್ನ ಗುರುವಿಂಗೆ ಪರದಲ್ಲಿ ಪರಿಣಾಮವನೈದಿಸುವ
ಉಭಯ ಗುರು ತಾನಾಗಿ
ಇದಿರಿಂಗೆ ಪ್ರತಿಸ್ವರೂಪವ ಕೊಡುವಲ್ಲಿ,
ತನ್ನಯ ನಿಜರೂಪ ಪ್ರಾಣಪ್ರತಿಷ್ಠೆಯ ಮಾಡಿ
ಮಾಂಸಪಿಂಡವ ಕಳೆದು ಮಂತ್ರಪಿಂಡವ ಮಾಡುವಲ್ಲಿ,
ಕಾಯದ ಸೂತಕವ ಕಳೆದು, ಮನದ ವಿಕಾರವ ಹಿಂಗಿಸಿ,
ತನ್ನಿರವನರಿತು ಅರಿದರಿವ ಶಿಷ್ಯನ
ಹೃತ್ಕಮಲ ಮಧ್ಯದಲ್ಲಿ ನೆಲೆಗೊಳಿಸಿ,
ಅರಿವಿನ ಭೇದದಿಂದ ಶಿಲೆಯ ಸೂತಕವ ಕಳೆದು
ಇಷ್ಟಪ್ರಾಣವ ಬೆಸುವ ಬೆಸುಗೆಯ ತೋರಿ,
ಉಡುವ ತೊಡುವ, ಕೊಡುವ ಕೊಂಬ,
ಮುಟ್ಟುವ ಅರ್ಪಿತಭೇದವ ದೃಷ್ಟದಿಂದ ತೋರಿ,
ಗುರುವೆಂಬ ಭಾವ ತನಗೆ ತಲೆದೋರದೆ
ಹರಶರಣರ ಮುಂದಿಟ್ಟು
ನಿನ್ನಯ ಪರಿದೋಷವ ಪರಿಹರಿಸಿಕೊ ಎಂದು
ತ್ರಿವಿಧದ ಭೇದವ ತೋರಿ,
ತಾನು ಶುಕ್ತಿ ನುಂಗಿದ ಜಲದಂತೆ,
ಭ್ರಮರ ನುಂಗಿದ ಗಂಧದಂತೆ,
ದ್ಯುತಿಕೊಂಡ ದ್ಯುಮಣಿಯಂತೆ,
ನಾಮ ರೂಪು ಭಾವವಳಿದು
ತಾನು ತಾನಾದಡೆ ಗುರುಸ್ಥಲ.
ಅದ ನಿನ್ನ ನೀನರಿ,
ಪುಣ್ಯಾರಣ್ಯದಹನ ಭೀಮೇಶ್ವರಲಿಂಗ ನಿರಂಗಸಂಗ.
Transliteration Tā guruvāhāga tanna guruva tānaritu,
tanage ihadalli sukha,
tanna guruviṅge paradalli pariṇāmavanaidisuva
ubhaya guru tānāgi
idiriṅge pratisvarūpava koḍuvalli,
tannaya nijarūpa prāṇapratiṣṭheya māḍi
mānsapiṇḍava kaḷedu mantrapiṇḍava māḍuvalli,
kāyada sūtakava kaḷedu, manada vikārava hiṅgisi,
tanniravanaritu aridariva śiṣyana
Hr̥tkamala madhyadalli nelegoḷisi,
arivina bhēdadinda śileya sūtakava kaḷedu
iṣṭaprāṇava besuva besugeya tōri,
uḍuva toḍuva, koḍuva komba,
muṭṭuva arpitabhēdava dr̥ṣṭadinda tōri,
guruvemba bhāva tanage taledōrade
haraśaraṇara mundiṭṭu
ninnaya paridōṣava pariharisiko endu
Trividhada bhēdava tōri,
tānu śukti nuṅgida jaladante,
bhramara nuṅgida gandhadante,
dyutikoṇḍa dyumaṇiyante,
nāma rūpu bhāvavaḷidu
tānu tānādaḍe gurusthala.
Ada ninna nīnari,
puṇyāraṇyadahana bhīmēśvaraliṅga niraṅgasaṅga.
