ಜಕ್ಕಣಯ್ಯ   
Index   ವಚನ - 89    Search  
 
ಸರ್ವಾಂಗಪಟ್ಟಣದೊಳಗೆ ಐದು ಮೊದಲಗಿತ್ತೇರಿಗೆ ಒಬ್ಬಮದಲಿಂಗ ನೋಡಾ! ಬ್ರಹ್ಮ ವಿಷ್ಣು ರುದ್ರ ಈಶ್ವರರೆಂಬ ನಾಲ್ಕು ಕಂಬವ ನಿಲಿಸಿ ಆಕಾಶವೆಂಬ ಚಪ್ಪರವಂಗೈದು, ಕಾಮಕ್ರೋಧಲೋಭಮೋಹಮದಮತ್ಸರಗಳೆಂಬ ಆರು ತೊಂಡಲಂಗಳ ಕಟ್ಟಿ, ಜ್ಞಾನಶೃಂಗಾರವೆಂಬ ಹಾಲಗಂಬವ ನಿಲಿಸಿ, ಭಕ್ತನೆಂಬ ಅಡ್ಡಣಿಗೆಯ ಮೇಲೆ ಮಹೇಶ್ವರನೆಂಬ ಹರಿವಾಣವನಿಕ್ಕಿ, ಮಹಾಪ್ರಸಾದವ ನೆಲೆಯಂಗೊಂಡು ಪ್ರಾಣಲಿಂಗಿಯೆಂಬ ತುಪ್ಪವನೆರೆದು, ಶರಣನೆಂಬ ಸಕ್ಕರೆಯ ತಳೆದು, ಆಚಾರಲಿಂಗದೇವರು ಗುರುಲಿಂಗದೇವರು ಶಿವಲಿಂಗದೇವರು ಜಂಗಮಲಿಂಗದೇವರು ಪ್ರಸಾದಲಿಂಗದೇವರು ಈ ಐವರು ಮದಲಿಂಗನ ಕೂಡ ಭೂಮಾಸವಿಯೂಟವ ಸವಿವುತಿರ್ಪರು ನೋಡಾ. ಐದು ಮೊದಲಗಿತ್ತೇರಿಗೂ ಮದಲಿಂಗಂಗೂ ಸೇಸೆಯನಿಕ್ಕಿ ನಮಃ ಶಿವಾಯವೆಂಬ ಪಂಚದೀಪವ ಬೆಳಗಿ ಓಂ ನಮಃಶಿವಾಯಯೆಂದು ಬರೆದಿದ್ದೆನಯ್ಯ ಝೇಂಕಾರ ನಿಜಲಿಂಗಪ್ರಭುವೆ.
Transliteration Sthala Comment None