ಅಂಥ ಬ್ರಹ್ಮಾಂಡವ ಇನ್ನೂರು ಕೋಟಿಯ ಮೇಲೆ
ಮೂರುಸಾವಿರದಾ ತೊಂಬತ್ತೆಂಟು ಬ್ರಹ್ಮಾಂಡನೊಳಕೊಂಡುದೊಂದು
ಬ್ರಹ್ಮನೆಂಬ ಭುವನ.
ಆ ಭುವನದೊಳು ವೇದನಾಥನೆಂಬ ಮಹಾರುದ್ರಮೂರ್ತಿ ಇಹನು.
ಆ ರುದ್ರಮೂರ್ತಿಯ ಓಲಗದಲ್ಲಿ
ಸಾವಿರಕೋಟಿಯ ಮೇಲೆ ತೊಂಬತ್ತುನೂರಾ ನಾಲ್ವತ್ನಾಲ್ಕುಕೋಟಿ
ನಾರಾಯಣ ರುದ್ರ ಬ್ರಹ್ಮರಿಹರು ನೋಡಾ.
ಸಾವಿರ ಕೋಟಿಯ ಮೇಲೆ ತೊಂಬತ್ತುನೂರಾ ನಾಲ್ವತ್ನಾಲ್ಕುಕೋಟಿ
ವೇದಪುರುಷರು ಮುನೀಂದ್ರರು
ಇಂದ್ರಚಂದ್ರಾದಿತ್ಯರು ದೇವರ್ಕಳಿಹರು ನೋಡಾ
ಅಪ್ರಮಾಣಕೂಡಲಸಂಗಮದೇವಾ.
