ಬಾಲಸಂಗಯ್ಯ ಅಪ್ರಮಾಣ ದೇವ   
Index   ವಚನ - 327    Search  
 
ಅನಂತಕೋಟಿ ಬ್ರಹ್ಮರ ಮಾಯೆ ನುಂಗಿ ನುಂಗಿ ಉಗುಳುವಂದು ಮಾಯಾರಹಿತನೆಂಬ ಗಣೇಶ್ವರನಾಗಿದ್ದೆನು. ಅನಂತಕೋಟಿ ವಿಷ್ಣ್ವಾದಿಗಳ ಮಾಯೆ ನುಂಗುವಂದು ಮಾಯಾಹರನೆಂಬುವ ಗಣೇಶ್ವರನಾಗಿದ್ದೆನು. ಅನಂತಕೋಟಿ ಇಂದ್ರಾದಿಗಳ ದೇವರ್ಕಳ ಮಾಯೆ ಒದ್ದೊದ್ದು ಕೊಲುವಂದು ಮಾಯಾತೀತನೆಂಬ ಗಣೇಶ್ವರನಾಗಿದ್ದೆನು. ಅನಂತಕೋಟಿ ಋಷಿಗಳ ತಪವ ಮುರಿದು ಕೆಡಹಿ ಉಚ್ಛಿಷ್ಟವ ಮಾಡುವಂದು ಮಾಯಾದಹನನೆಂಬ ಗಣೇಶ್ವರನಾಗಿದ್ದೆನು. ಇವರೆಲ್ಲರು ಮಾಯೆಯ ಕಾಲ ಸರಮಾಲೆಯಾದಂದು ಮಾಯಾಭಸ್ಮ ಗಣೇಶ್ವರನಾಗಿದ್ದೆನು ಕಾಣಾ ಅಪ್ರಮಾಣಕೂಡಲಸಂಗಮದೇವಾ.
Transliteration Sthala Comment None