ನಿರಾಳ ನಿರಂಜನವಿಲ್ಲದಂದು,

ನಿರಾಳ ನಿರಂಜನವಿಲ್ಲದಂದು, ನಾದ ಬಿಂದು ಕಳೆಗಳಿಲ್ಲದಂದು, ಅತ್ಯತಿಷ್ಟದ್ಧಶಾಂಗುಲವೆಂಬ ವಿರಾಟ್ಪುರುಷನುತ್ಪತ್ಯವಾಗದಂದು, ಮಹಾಜ್ಯೋತಿರ್ಮಯಲಿಂಗವೆಂಬ ನಾಮ ತಲೆದೋರದಂದು, ಕುಳ ನಿರಾಕುಳ ಅಪ್ರಮಾಣ ಅಗೋಚರ ವಾಚಾತೀತ ಮನೋತೀತವೆಂಬ ಶಬ್ದಸಂದಣಿ ನಾಮಸೀಮೆಗಳೇನೂ ಎನಲಿಲ್ಲದಂದು, ಬ್ರಹ್ಮ ಪರಬ್ರಹ್ಮವೆಂಬ ಭಿನ್ನನಾಮ ತಲೆದೋರದಂದು, ಅಖಂಡ ಗೋಳಕಾಕಾರಲಿಂಗ ಉತ್ಪತ್ಯವಾಗದಂದು, ಆ ಲಿಂಗದ ಪಂಚಸಂಜ್ಞೆ ತಲೆದೋರದಂದು, ಬ್ರಹ್ಮ ವಿಷ್ಣು ರುದ್ರ ಈಶ್ವರ ಸದಾಶಿವ ಮೊದಲಾದ ಸಮಸ್ತದೇವರ್ಕಳಿಗೂ ಜನನಸ್ಥಲವಾದ ನಿರ್ವಾಣಪದವಿಲ್ಲದಂದು, ಶಿವಸಂಬಂಧ ಶಕ್ತಿ ಸಂಬಂಧವಾಗಿಹ ಓಂಕಾರ ಉತ್ಪತ್ಯವಾಗದಂದು, ಶಿವಶಕ್ತಿರಹಿತವಾಗಿಹ ಮಹದೋಂಕಾರ ಉತ್ಪತ್ಯವಾಗದಂದು, ಅತಿಸೂಕ್ಷ್ಮ ಪಂಚಾಕ್ಷರ, ಪ್ರಣವಪಂಚಾಕ್ಷರ ಉತ್ಪತ್ಯವಾಗದಂದು, ನಿರಂಜನಾತೀತಪ್ರಣವವಾಗಿದ್ದನಯ್ಯಾ ಇಲ್ಲದಂತೆ ನಮ್ಮ ಅಪ್ರಮಾಣಕೂಡಲಸಂಗಮದೇವ.

Transliteration Comment None