ತನುಕರಣ ಭುವನಭೋಗಂಗಳ ಶಕ್ತಿಯುಳ್ಳನ್ನಕ್ಕ

ತನುಕರಣ ಭುವನಭೋಗಂಗಳ ಶಕ್ತಿಯುಳ್ಳನ್ನಕ್ಕ ರೋಷದ ಪಾಶ ಬಿಡದು ನೋಡಯ್ಯಾ. ಕರ್ಮಕ್ಷಯವಾಗದೆ ಜನ್ಮಜರಾಮರಣಂಗಳುಳ್ಳನ್ನಕ್ಕ ಬಿಂದುಪಾಶ ಬಿಡದು ನೋಡಯ್ಯಾ. ಅಭಿಮಾನವೆರಸಿ ಆನೆಂಬಹಂಕಾರವುಳ್ಳನ್ನಕ್ಕ ಕರ್ಮಪಾಶ ಬಿಡದು ನೋಡಯ್ಯಾ. ಕಾಯಭಾವವುಳ್ಳನ್ನಕ್ಕ ಮಾಯಾಪಾಶ ಬಿಡದು ನೋಡಯ್ಯಾ. ಪರಮಶಿವನ ಸ್ವಯಂಪ್ರಕಾಶ ಕಾಣಿಸದನ್ನಕ್ಕ ಮಲಪಾಶ ಬಿಡದು ನೋಡಯ್ಯಾ. ಇಂತೀ ಪಂಚಪಾಶಪ್ರಪಂಚುಳ್ಳನ್ನಕ್ಕ ಸೌರಾಷ್ಟ್ರ ಸೋಮೇಶ್ವರಲಿಂಗವ ಕೂಡಿ ತಾನಾಗಬಾರದು ವಾಗದ್ವೈತಿಗಳಿಗೆ.

Music Transliteration Comment None