ಪ್ರಣವದ ಚಿನ್ನಾದವೆ ಅಕಾರ

ಪ್ರಣವದ ಚಿನ್ನಾದವೆ ಅಕಾರ, ಪ್ರಣವದ ಚಿದ್ಬಿಂದುವೆ ಉಕಾರ, ಪ್ರಣವದ ಚಿತ್ಕಲೆಯೆ ಮಕಾರ. ಪ್ರಣವದ ಬಟ್ಟೆಯೆ ಬಕಾರ, ಪ್ರಣವದ ಸೋಪಾನವೆ ಸಕಾರ, ಪ್ರಣವದ ವರ್ತನೆಯೆ ವಕಾರ. ಪ್ರಣವದ ಬಹಳಾಕಾರವೆ ಬಕಾರ ಪ್ರಣವದ ಸಾಹಸವೆ ಸಕಾರ, ಪ್ರಣವದ ವಶವೆ ವಕಾರ. ಪ್ರಣವದ ಬರವೆ ಬಕಾರ, ಪ್ರಣವದ ಸರವೆ ಸಕಾರ, ಪ್ರಣವದ ಇರವೆ ವಕಾರ. ಪ್ರಣವದ ಬಲ್ಮೆಯೆ ಬಕಾರ, ಪ್ರಣವದ ಸಲ್ಮೆಯೆ ಸಕಾರ, ಪ್ರಣವದ ಒಲ್ಮೆಯೆ ವಕಾರ. ಪ್ರಣವದ ಪಶ್ಯಂತಿವಾಕೇ ಬಕಾರ, ಪ್ರಣವದ ಸೂಕ್ಷ್ಮವಾಕೇ ಸಕಾರ, ಪ್ರಣವದ ವೈಕಲ್ಯವಾಕೇ ವಕಾರ. ಪ್ರಣವದ ಬಹಳ ಜ್ಞಾನವೆ ಬಕಾರ, ಪ್ರಣವದ ಸಹಜ ಜ್ಞಾನವೆ ಸಕಾರ, ಪ್ರಣವದ ಶುದ್ಧ ಜ್ಞಾನದೀಪ್ತಿಯೆ ವಕಾರ. ಪ್ರಣವದ ಮೂಲವೆ ಬಕಾರ, ಪ್ರಣವದ ಶಾಖೆಯೆ ಸಕಾರ, ಪ್ರಣವದ ಫಲವೆ ವಕಾರ. ಪ್ರಣವದ ಬಹಳ ನಾದವೆ ಬಕಾರ, ಪ್ರಣವದ ಸುನಾದವೆ ಸಕಾರ, ಪ್ರಣವದ ಸುನಾದವೆ ವಕಾರ. ಪ್ರಣವದ ಭಕ್ತಿಯೆ ಬಕಾರ, ಪ್ರಣವದ ಸುಜ್ಞಾನವೆ ಸಕಾರ, ಪ್ರಣವದ ವೈರಾಗ್ಯವೆ ವಕಾರ. ಪ್ರಣವದ ಶಬ್ದವೆ ಬಕಾರ, ಪ್ರಣವದ ನಿಶ್ಯಬ್ದವೆ ಸಕಾರ, ಪ್ರಣವದ ಶಬ್ದ ನಿಶ್ಯಬ್ದದ ವಾಕುಗಳೆ ವಕಾರ. ಇಂತಪ್ಪ ಪ್ರಣವ ಮಂತ್ರಂಗಳೇ ಬಸವಾ ಎಂಬ ಪ್ರಣವ ನಾದತ್ರಯಸಂಬಂಧವಾದುದಂ ತ್ರಿಪುರಾಂತಕಲಿಂಗದಲ್ಲಿ ಅರಿದು ಸುಖಿಯಾಗಿ ಆನು ಬಸವಾ, ಬಸವಾ, ಬಸವಾ, ಎಂದು ಜಪಿಸುತ್ತಿದ್ದೆನಯ್ಯಾ.

Transliteration Comment None