ಇನ್ನು ಜ್ಞಾನಾವಸ್ಥೆಯ ದರ್ಶನವದೆಂತೆಂದಡೆ:
ತನ್ನ ತಾನರಿದು ಪರಮಜ್ಞಾನವ ತಿಳಿವುದೇ ಜ್ಞಾನಜಾಗ್ರ.
ಆ ಪರಮಜ್ಞಾನ ನಿವಾಸಿಯಾಗಿಹುದೇ ಜ್ಞಾನಸ್ವಪ್ನ.
ಆ ಪರಮಜ್ಞಾನ ನಿವಾಸದಲ್ಲಿ ಲೀಯವಾಗಿಹುದೇ ಜ್ಞಾನಸುಷುಪ್ತಿ.
ಆ ಜ್ಞಾನಸುಷುಪ್ತಿಯಲ್ಲಿ ತಲೆದೋರಿದ
ಸುಜ್ಞಾನವೇ ಜ್ಞಾನತೂರ್ಯ.
ಆ ಸುಜ್ಞಾನವನ್ನೊಳಗೊಂಡ ನಿಃಶಬ್ದವೇ ಜ್ಞಾನವ್ಯೋಮ.
ಆ ಜ್ಞಾನವ್ಯೋಮವನೊಳಗೊಂಡ ಮಹಾಜ್ಞಾನವೆ
ಜ್ಞಾನವ್ಯೋಮಾತೀತವೆಂದು ಶ್ರುತಿಗಳು ಸಾರುತ್ತಿಹುದು ನೋಡಾ
ಅಪ್ರಮಾಣಕೂಡಲಸಂಗಮದೇವಾ.
