ಮತ್ತಂ, ಕ್ರಮದಿಂ ಹ್ರೌಂ ಎಂಬ ಮೂಲಪ್ರಸಾದವಾಚಕದಲ್ಲಿ
ಕರ್ಮಸಾದಾಖ್ಯ ವಾಚ್ಯಮಂ ನ್ಯಾಸಂಗೆಯ್ವುದು.
ಹಂ ಎಂಬ ತತ್ವಪ್ರಸಾದವಾಚಕದಲ್ಲಿ ಕರ್ತೃಸಾದಾಖ್ಯ ವಾಚ್ಯಮಂ
ನ್ಯಾಸಂಗೆಯ್ವುದು.
ಹೌಂ ಎಂಬಾದಿ ಪ್ರಸಾದವಾಚಕದಲ್ಲಿ ಮೂರ್ತಿಸಾದಾಖ್ಯ ವಾಚ್ಯಮಂ
ನ್ಯಾಸಂಗೆಯ್ವುದು.
ಹಂಸ ಎಂಬಾತ್ಮಪ್ರಸಾದವಾಚಕದಲ್ಲಿ
ಅಮೂರ್ತಿ ಸಾದಾಖ್ಯವಾಚ್ಯಮಂ ನ್ಯಾಸಂಗೆಯ್ವುದು.
ಹ ಎಂಬ ಶುದ್ಧಪ್ರಸಾದವಾಚಕದಲ್ಲಿ ಶಿವಸಾದಾಖ್ಯ ವಾಚ್ಯಮಂ
ನ್ಯಾಸಂಗೆಯ್ವುದಿಂತು
ಪಂಚಪ್ರಸಾದದಲ್ಲಿ ಪಂಚಸಾದಾಖ್ಯ ತತ್ವಮಂ
ನ್ಯಾಸೀಕರಿಸಿದೆಯಯ್ಯಾ, ಪರಶಿವಲಿಂಗಯ್ಯ.
