ಪ್ರಾಣ ಅಪಾನ ವ್ಯಾನ ಉದಾನ ಸಮಾನ ನಾಗ ಕೂರ್ಮ
ಕ್ರಕರ ದೇವದತ್ತ ಧನಂಜಯ - ಇಂತೀ ದಶವಾಯುಗಳು.
ಅಲ್ಲಿ ಪ್ರಾಣವಾಯು ಇಂದ್ರನೀಲವರ್ಣ ಕಂಠದ
ಅಧೋ ಭಾಗೆಯಲ್ಲಿರ್ದ
ಹೃದಯ ಪಾದ ನಾಭಿ ನಾಶಿಕವಧರಂಗಳಲ್ಲಿ ಉಚ್ಛ್ವಾಸ
ನಿಶ್ವಾಸಂಗಳಿಂದ ಚರಿಸುತ್ತಿಹುದು.
ಅಪಾನವಾಯು ಇಂದ್ರಗೋಪವರ್ಣ, ವಾಯು ಶಿಶ್ನ ಉರ
ಜಾನು ಪಾದ ಜಂಘೆ ನಾಭಿಮೂಲ ಜಠರದಲ್ಲಿರ್ದು
ಮಲ ಮೂತ್ರಂಗಳ ಪೊರಮಡಿಸುತ್ತಿಹುದು.
ವ್ಯಾನವಾಯು ಗೋಕ್ಷೀರವರ್ಣ, ಕರ್ಣ ಅಕ್ಷಿ ಘ್ರಾಣ
ಗಂಡಾಗ್ರ ಗುಲ್ಫಂಗಳಲ್ಲಿ ವರ್ತಿಸುತ್ತ ಹಿಡಿವುದು ಬಿಡುವುದು
ಇವು ಮೊದಲಾದ ವ್ಯಾಪಾರಂಗಳ ಮಾಡುತ್ತಿಹುದು.
ಉದಾನವಾಯು ಎಳೆಮಿಂಚಿನವರ್ಣ, ಹಸ್ತಪಾದಾದಿ
ಸರ್ವಸಂದುಗಳಲ್ಲಿರ್ದು
ಸಂದು ಸಂದುಗಳಿಗೆ ಪಟುತ್ವಮಂ ಪುಟ್ಟಿಸುತ್ತಿಹುದು.
ಸಮಾನವಾಯು ಶುದ್ಧ ಸ್ಫಟಿಕವರ್ಣ, ದೇಹ ಮಧ್ಯದಲ್ಲಿರ್ದು
ಸರ್ವ ಸಂದುಗಳಲ್ಲಿ ವ್ಯಾಪಿಸಿಕೊಂಡು, ಕೊಂಡಂತಹ ಅನ್ನರಸವ
ಸರ್ವಾಂಗಕ್ಕೆ ಸಮಾನವಂ ಮಾಡಿ ಅಷ್ಟಕೋಟಿ
ರೋಮನಾಳಂಗಳಿಗೂ
ಹಂಚಿಕ್ಕಿ ಅಂಗವಂ ಪೋಷಿಸುತ್ತಿಹುದು.
ನಾಗವಾಯು ಬಾಲಸೂರ್ಯನ ವರ್ಣ, ಕಂಠಸ್ಥಾನದಲ್ಲಿರ್ದು
ವರ್ಧಿ ನಿರೋಧಂಗಳಿಂದುದ್ಗಾರಮಂ ಮಾಡಿಸುತ್ತಿಹುದು.
ಕೂರ್ಮವಾಯು ಕುಂದೇಂದುವಿನ ವರ್ಣ, ನೇತ್ರಮೂಲದಲ್ಲಿರ್ದು
ಉನ್ಮೀಲನ ನಿಮೀಲನಾಡಿಗಳನು ಮಾಡುತ್ತಿಹುದು.
ಕೃಕರವಾಯು ನೀಲವರ್ಣ ಕಾಯದಲ್ಲಿರ್ದು ಕ್ಷುಧಾದಿ
ಧರ್ಮಂಗಳಂ ಮಾಡುತ್ತಿಹುದು.
ದೇವದತ್ತವಾಯು ಸ್ಫಟಿಕವರ್ಣ, ತಾಳಮೂಲದಲ್ಲಿರ್ದು
ಅಗುಳಿಕೆಯಾರಡಿಗಳಂ ಪುಟ್ಟಿಸುತ್ತಿಹುದು.
ಧನಂಜಯವಾಯು ಸಪ್ತ ಜಾಂಬೂನದ ವರ್ಣ,
ಶೋಕರಾಗಂಗಳ ಪುಟ್ಟಿಸಿ ಹಾಡಿಸುತ್ತಿಹುದು.
ಇಂತೀ ದಶವಾಯುಗಳ ದೇಹವನುದ್ಧರಿಸುತ್ತಿಹವು.
ಈ ವಾಯುವನೇರಿ ಜೀವನು
ಈಡಾಪಿಂಗಳ ಮಾರ್ಗದಲ್ಲಿ ವ್ಯವಹರಿಸುತ್ತಿಹನು.
ಈ ವಾಯುಗತಿಯನರಿದು ಯೋಗಿಸುವುದೇ ಯೋಗ.
ಕಪಿಲಸಿದ್ಧಮಲ್ಲಿಕಾರ್ಜುನನೆಂಬ
ನಿಜವನೈದುವದೇ ಮಾರ್ಗವು.
Transliteration Prāṇa apāna vyāna udāna samāna nāga kūrma
krakara dēvadatta dhanan̄jaya - intī daśavāyugaḷu.
Alli prāṇavāyu indranīlavarṇa kaṇṭhada
adhō bhāgeyallirda
hr̥daya pāda nābhi nāśikavadharaṅgaḷalli ucchvāsa
niśvāsagaḷinda carisuttihudu.
Apānavāyu indragōpavarṇa, vāyu śiśna ura
jānu pāda jaṅghe nābhimūla jaṭharadallirdu
mala mūtraṅgaḷa poramaḍisuttihudu.
Vyānavāyu gōkṣīravarṇa, karṇa akṣi ghrāṇa
gaṇḍāgra gulphaṅgaḷalli vartisutta hiḍivudu biḍuvudu
ivu modalāda vyāpāragaḷu māḍutihudu.
Udānavāyu eḷemin̄cinavarṇa, hastapādādi
sarvasandugaḷallirdu
sandu sandugaḷige paṭutvamaṁ puṭṭisuttihudu.
Samānavāyu śud'dha sphaṭikavarṇa, dēha madhyadallirdu
sarva sandugaḷalli vyāpisikoṇḍu, koṇḍantaha annarasava
sarvāṅgakke samānavaṁ māḍi aṣṭakōṭi
rōmanāḷaṅgaḷigū
han̄cikki aṅgavaṁ pōṣisuttihudu.
Nāgavāyu bālasūryana varṇa, kaṇṭhasthānadallirdu
vardhi nirōdhaṅgaḷindudgāramaṁ māḍisuttihudu.
Kūrmavāyu kundenduvina varṇa, nētramūladallirdu
unmīlana nimīlanāḍigaḷanu māḍutihudu.
Kr̥karavāyu nīlavarṇa kāyadallirdu kṣudhādi
dharmaṅgaḷaṁ māḍutihudu.
Dēvadattavāyu sphaṭikavarṇa, tāḷamūladallirdu
aguḷikeyāraḍigaḷaṁ puṭṭisuttihudu.
Dhanan̄jayavāyu sapta jāmbūnada varṇa,
śōkarāgaṅgaḷa puṭṭisi hāḍisuttihudu.
Intī daśavāyugaḷa dēhavanud'dharisuttihavu.
Ī vāyuvanēri jīvana
īḍāpiṅgaḷa mārgadalli vyavaharisuttihanu.
Ī vāyugatiyanaridu yōgisuvudē yōga.
Kapilasid'dhamallikārjunanemba
nijavanaiduvadē mārgavu.
