ಸೀಮೆ ನೇಮಂಗಳ ಹೊದ್ದದ
ನಿಜವೀರಶೈವದೀಕ್ಷೆಯನು
ಗುರು ತನ್ನ ಶಿಷ್ಯಂಗಿತ್ತು,
ಮತ್ತೆ ಆ ಶಿಷ್ಯನ ನೇಮಸ್ಥನ ಮಾಡಿದಲ್ಲಿ,
ಆ ನಿಜದೀಕ್ಷೆಗೆಟ್ಟು ಆ ಗುರುಶಿಷ್ಯರೀರ್ವರೂ ಪತಿತರಾಗಿ
ಶ್ವಾನಯೋನಿಯಲ್ಲಿ ಶತಸಹಸ್ರವೇಳೆ ಬಂದು,
ನರಕವಿಪ್ಪತ್ತೆಂಟುಕೋಟಿಯನೈದುವರು.
ಅದೆಂತೆಂದಡೆ:
"ನೇಮಸ್ಥಂ ಚನ ದೀಕ್ಷಯಾದೀ ಶ್ವಾನಜನ್ಮಸು ಜಾಯತೇ
ಅಷ್ಟವಿಂಶತಿಕೋಟ್ಯಸ್ತು ನರಕಂ ಯಾಂತಿ ಧ್ರುವಂ" ಎಂದುದಾಗಿ,
ನಿಜಗೆಟ್ಟು ಪತಿತರಾಗಿ ನರಕಕ್ಕಿಳಿವ
ಪಾತಕರನೆನಗೆ ತೋರದಿರಾ
ಕೂಡಲಚೆನ್ನಸಂಗಯ್ಯಾ.
