ಅಯ್ಯಾ, ಮಣ್ಣೆಂಬ ಆಸೆಯಲ್ಲಿ

ಅಯ್ಯಾ, ಮಣ್ಣೆಂಬ ಆಸೆಯಲ್ಲಿ ಮೋಹಿಸಿತಯ್ಯ ಎನ್ನ ಜೀವಾತ್ಮನು. ಹೆಣ್ಣೆಂಬ ಆಸೆಯಲ್ಲಿ ಕರಗಿ ಕೊರಗಿತಯ್ಯ ಎನ್ನ ಅಂತರಾತ್ಮನು. ಹೊನ್ನೆಂಬ ಆಸೆಯ ಪಾಶಮಲದಲ್ಲಿ ಕಂದಿ ಕುಂದಿತಯ್ಯ ಎನ್ನ ಪರಮಾತ್ಮನು. ಧನಧಾನ್ಯವೆಂಬ ಆಸೆಯಿಂದ ಪುಡಿಪುಡಿಯಾಯಿತಯ್ಯ ಎನ್ನ ನಿರ್ಮಲಾತ್ಮನು. ತಂದೆ ತಾಯಿ ಬಂಧು ಬಳಗವೆಂಬ ಆಸೆಯ ಕೊಳದಲ್ಲಿ ಹೊಡದಾಡಿ ಸತ್ತಿತಯ್ಯ ಎನ್ನ ಜ್ಞಾನಾತ್ಮನು. ಅಣ್ಣ-ತಮ್ಮ ಅಕ್ಕ-ತಂಗಿ ಅತ್ತೆ-ಅತ್ತಿಗೆ-ನಾದಿನಿಯೆಂಬ ಆಸೆಯ ಸಂಕೋಲೆಯಲ್ಲಿ ಸಿಲ್ಕಿತಯ್ಯ ಎನ್ನ ಭೂತಾತ್ಮನು. ಇಂತೀ ಜಡಾತ್ಮರ ಸಂಗದಿಂದ ನಿಜಗೆಟ್ಟೆನಯ್ಯ! ಗುರುವೆ, ಇನ್ನೆನಗೆ ಗತಿಯಾವುದೊ? ಶ್ರೀಗುರುಲಿಂಗಜಂಗಮವೆ ಹರಹರ ಶಿವಶಿವ ಜಯಜಯ ಕರುಣಾಕರ ಮತ್ಪ್ರಾಣನಾಥ ಮಹಾ ಶ್ರೀಗುರುಸಿದ್ಧಲಿಂಗೇಶ್ವರ.

Transliteration Comment None