ಶಿವಾಶಿವಾ, ಗುರು ಲಿಂಗಾಂಗಿ ಜಂಗಮ ಭಕ್ತರ

ಶಿವಾಶಿವಾ, ಗುರು ಲಿಂಗಾಂಗಿ ಜಂಗಮ ಭಕ್ತರ ಭೇದವ ಪೇಳ್ವೆ ಕೇಳಿರಯ್ಯಾ. ಶೆರೆಯ ಕುಡಿದವನೇ ಗುರುವೆಂಬೆ. ಸುರೆಯ ಕುಡಿದವನೇ ಲಿಂಗಾಂಗಿಯೆಂಬೆ. ಕಂಡವ ತಿಂದವನೇ ಜಂಗಮವೆಂಬೆ. ಇಂತೀ ಮೂವರ ಕೊಂದು ತಿಂದವನ ಕೊಂದು ತಿಂದಾತನೇ ಭಕ್ತನೆಂಬೆ. ಇಂತಿದರ ಅನುಭಾವ ತಿಳಿಯಬಲ್ಲರೆ ಗುರು-ಲಿಂಗ-ಜಂಗಮ ಭಕ್ತನೆಂಬೆ. ಇಂತೀ ಚತುರ್ವಿಧದ ನಿರ್ಣಯವ ಹೇಳಿದಾತನೇ ಅನಾದಿಗುರುಲಿಂಗಜಂಗಮವೆಂಬೆ. ಆತನಲ್ಲಿ ಉಪದೇಶವ ಹಡೆಯಬೇಕು. ಇಂತಿದರ ಭೇದವ ತಿಳಿಯಬಲ್ಲಾತನೇ ಅನಾದಿ ಶಿಷ್ಯ ಭಕ್ತನೆಂಬೆ. ಇಂತಿವರಿಗೆ ಉಪದೇಶವ ಹೇಳಬೇಕು. ಇಂತಪ್ಪ ಗುರುಶಿಷ್ಯಸಂಬಂಧವೆಂತೆಂದೊಡೆ: ಶಿಖಿ-ಕರ್ಪುರ ಸಂಯೋಗದಂತೆ. ಪಯೋಧರಫಲ ಉದಕದಲ್ಲಿ ಲೀಯವಾದಂತೆ. ಲವಣ ಸಮುದ್ರದಲ್ಲಿ ಲೀಯವಾದಂತೆ. ಈ ಗುರುಶಿಷ್ಯರುಭಯರು ಕೂಡಿ ಪರಶಿವಸಾಗರದಲ್ಲಿ ನಿರ್ವಯಲಾದರೆಂದನಯ್ಯ ನಿಮ್ಮ ಶರಣ ಕಾಡನೊಳಗಾದ ಶಂಕರಪ್ರಿಯ ಚನ್ನಕದಂಬಲಿಂಗ ನಿರ್ಮಾಯಪ್ರಭುವೆ.

Transliteration Sthala Comment None