ಅಡ್ಡಗುಡ್ಡದ ಬೆಟ್ಟವನೊಡೆದು,
ಅರ್ಧಗಜ ಅಡ್ಡಗಲು, ಪೋಣೆಗಜ ನಿಡಿದು ಕಲ್ಲ ತಂದು,
ಅದರ ಮೇಲೆ ಲಿಂಗಾಕಾರ ಚಂದ್ರಸೂರ್ಯರ ಬರೆದು ಕಟಿಸಿ,
ಭೂಮಿಯಲ್ಲಿ ಚೌರಸ ಭೂಮಿಯ ಮಾಡಿ,
ನಾಲ್ಕುಮೂಲಿಯ ಸ್ಥಾನದಲ್ಲಿ
ಭೂಮಿಯೊಳಗೆ ಅರ್ಧಗಜ ಭೂಮಿಯನಗಿದು,
ಆ ಅಗಿದ ಭೂಮಿಯ ಸ್ಥಾನದಲ್ಲಿ ಬೆಳ್ಳಿ ಬಂಗಾರ
ಮೊದಲಾದ ಪಂಚಲೋಹವ ಹಾಕಿ,
ಆ ಲಿಂಗಮುದ್ರೆಯಕಲ್ಲು ತಂದು ಮಜ್ಜನವ ಮಾಡಿ,
ವಿಭೂತಿಯ ಧರಿಸಿ, ಪತ್ರಿ ಪುಷ್ಪದಿಂದ ಪೂಜೆ ಮಾಡಿ,
ಅಗಿದ ಭೂಮಿಯಲ್ಲಿ ನಡಿಸಿ, ಟೆಂಗನೊಡೆದು,
ನಾಲ್ವರು ಕೂಡಿ, ಶ್ಮಶಾನಭೂಮಿಯ ಪೂರ್ವವನಳಿದು
ರುದ್ರಭೂಮಿಯಾಯಿತ್ತು ಎಂದು
ಹೆಸರಿಟ್ಟುಕೊಂಡು ನುಡಿವಿರಿ.
ಅದೆಂತು ಶುದ್ಧವಾಯಿತು ಎನಗೆ ತಿಳಿಯದು,
ನೀವು ಪೇಳಿರಯ್ಯ
ಕಾಡನೊಳಗಾದ ಶಂಕರಪ್ರಿಯ ಚನ್ನಕದಂಬಲಿಂಗ
ನಿರ್ಮಾಯಪ್ರಭುವೆ.
