ಅರಸನ ಹೆಂಡತಿಯ ತಂದು
ಹೊಲೆಯಗೆ ಮದುವೆಯ ಮಾಡಿದೆ.
ಹೊಲೆಯನ ಹೆಂಡತಿಯ ತಂದು
ಅರಸಗೆ ಮದುವೆಯ ಮಾಡಿದೆ.
ಅಣ್ಣನ ಹೆಂಡತಿಯ ತಂದು ತಮ್ಮಗೆ ಮದುವೆಯ ಮಾಡಿದೆ.
ತಮ್ಮನ ಹೆಂಡತಿಯ ತಂದು ಅಣ್ಣಗೆ ಮದುವೆಯ ಮಾಡಿದೆ.
ಒಡೆಯನ ಹೆಂಡತಿಯ ತಂದು
ಆಳಿಗೆ ಮದುವೆಯ ಮಾಡಿದೆ.
ಆಳಿನ ಹೆಂಡತಿಯ ತಂದು
ಒಡೆಯಗೆ ಮದುವೆಯ ಮಾಡಿದೆ.
ಇಂತಿವರ ಮದುವೆಯ ಸಂಭ್ರಮದೊಳಗೆ
ಕಂಬ ಸುಟ್ಟು ಹಂದರ ಉಳಿಯಿತ್ತು.
ಭೂಮಿ ಸುಟ್ಟು ಹಸಿಜಗುಲಿ ಉಳಿಯಿತ್ತು.
ಐದುಮಂದಿ ಐದಗಿತ್ತೇರು ತಮ್ಮ ಶಾಲಿಯ ಕಳೆದು,
ಕುಪ್ಪಸ ತೆಗೆದು, ಹೆಂಡಗಾರನ ಬೆನ್ನು ಹತ್ತಿ
ಹೋದುದು ಕಂಡು ಬೆರಗಾದೆನಯ್ಯಾ
ಕಾಡನೊಳಗಾದ ಶಂಕರಪ್ರಿಯ ಚನ್ನಕದಂಬಲಿಂಗ
ನಿರ್ಮಾಯಪ್ರಭುವೆ.
